¹ Koi ikodou na wekaqu, dou kakua ni vaduiduitaki ira na tamata ena nomudou tauria na vabauti Jisu Karisito, na noda Turaga sa varokorokotaki. ² Ia kevaka sa curu ki na nomudou valenilotu e dua na tamata sa vamama koula, ka vaisulu enai sulu vaiukuuku, a sa curu voki lia kinia na tamata dravudravua, enai sulu ca; ³ ia dou sa varokorokotaki koya sa vaisulu enai sulu vaiukuuku, ka tukunia vua, Mo tiko ena yasana vinaka koya; ia dou sa tukunia vua na tamata dravudravua, Mo mani tu yani na vanua koya, se mai tiko e ruku ni tutu ni yavaqu: ⁴ dou sa qai yali li ni caka na vivaduiduitaki, ka sa yaco kinia mo dou daulewa e na vakasama ca? ⁵ Dou rogocia, oi ikodou na wekaqu lomani, Sa yali beka ni digitaki ira na Kalou era sa dravudravua ena ka vavuravura me ra vutuniyau ena vabautia me ra taukenia voki lia na matanitu sa yalatakia ko koya vi ira era sa lomani koya? ⁶ Ia dou sa becia na tamata dravudravua. ⁷ Era sa yali beka ni vasaurarataki ikodou ko ira na vutuniyau, ka yarataki ikodou ki na vale ni vilewai? Era sa yali beka ni vosavacatakia na yaca varokoroko dou sa vayacani kinia? ⁸ Kevaka dou na muria sara na vunau vaturaga me vaka nai Vola Tabu, Mo lomania na kai nomu me vataki iko, dou na qai caka vinaka: ⁹ ia kevaka dou sa digitaki ira na tamata, dou sa qai valavala ca, ka sa beitakia vi ikodou na vunau nai valavala ca. ¹⁰ Ia ko koya ena muria na vunau taucoko, ka sa cala lia ena tikinia e dua loa lia, sa beitaki me vaka sa talaidredre ki na vunau kece lia. ¹¹ Ni sai koya lia sa tukunia, Kakua ni caka vibutakoci, sa tukunia voki lia, Kakua ni laba. Ia kevaka ko sa yali ni vibutakoci, ia ko sa laba lia, ko sa qai talaidredre ki na vunau. ¹² Dou vosa vakinia, kai valavala vakinia, me vataki ira era na lewai me vaka na vunau ni visereki. ¹³ Ni na lewai ka yali ni vosoti, ko koya sa yali ni caka na yalololoma; ia na yalololoma sa rawa na vilewai. ¹⁴ Ena yaga vacava, oi ikodou na wekaqu, kevaka sa tukunia e dua ni sa tu vua na vabautia, kevaka sa yali vua na cakacaka? ena vabulai koya beka na vabautia? ¹⁵ Ia kevaka sa dua na viwekani se yalewa se tagane sa yali na nonai sulu, ka yali na kena ena visiga, ¹⁶ ia ka dua vi ikodou sa tukunia vi ira, Dou qai ena vacegu, dou tatalai ka vamamautaki; ia dou sa yali ni solia na veika e yaga na yagodra; a cava na betena? ¹⁷ Sa va voki lia kinia na vabautia kevaka sa yali ni tu vata ki na cakacaka, sa mate lia, ni sa tu dua loa lia. ¹⁸ Ia ena tukunia beka e dua, Sa tu lia vi iko na vabautia, sa tu lia vi au na cakacaka; mo vatakila mai vi au na nomu vabautia ni sa yali lia na nomu cakacaka, ia ka'u na vatakila vi iko na noqu vabautia ena noqu cakacaka. ¹⁹ Ko sa vabautia ni sa dua na Kalou; ko sa caka vinaka koya: ia ko ira voki lia na tevoro era sa vabautia, a ra sa sautaninini voki lia. ²⁰ ko sa via kila beka, o iko na tamata sesewa, ni sa mate lia na vabautia ni sa yali ni cakacakataki: ²¹ e yali beka ni vadonui ko Eparaama na tamada e na vuku ni cakacaka, ni sa vacaboria na luvena ko Aisake e dela ni cabocabo-ni-soro? ²² O sa raicia beka ni sa vivuke na vabauta ki na nona cakacaka, a sa taucoko sara mai na vabautia e na vuku ni cakacaka? ²³ A sa vayacori kinia nai Vola Tabu o koya sa tukunia, Sa vabautia na Kalou ko Eparaama, a sa wili vua mei valavala dodonu; a sa vayacani me Weka ni Kalou. ²⁴ Ia dou sa qai raicia ni sa vadonui na tamata e na vuku ni cakacaka, a sa yali lia e na vuku ni vabautia duadua lia. ²⁵ Sa vaka voki lia kinia ko Reapi na yalewa ka dautagane, sa yali li ni vadonui e na vuku ni cakacaka, ni sa vacegui rau nai talaki, ka vatala yani e na sala tani? ²⁶ Me vaka sa mate na yago ni sa takali na yalo, sa mate voki lia na vabauta ni sa yali na cakacaka.