¹ O koya mo dou qai tu dei e na lalaga sa vakalalagataki ita kinia na Karisito, ka mo dou kakua ni vataotaki voki e nai vua mo dou bobula kinia. ² Raicia, oi au ko Paula au sa tukunia vi ikodou, Kevaka dou sa ia tiko na vicilivi, ena vatawayagataki kinia vi ikodou na Karisito. ³ Niu sa vadinadina voki vi ira na tamata yadua sa cilivi, ni ra sa vauci tu me muria na vunau taucoko. ⁴ Dou sa tawase tu maivi Karisito, oi ikodou kece lia sa vaka mo dou vadonui e na vunau; dou sa qai bale mai na loloma. ⁵ Sa vabautia eda sa warakia ka vanuinui kinia, e na vivuke ni Yalo Tabu, me da vadonui. ⁶ Ni da sa tu vata kei Karisito Jisu, sa yali ni yaga me cili, se me yali ni cili; sa yaga lia na vabautia sa daucakacaka yaco e na loloma. ⁷ Dou a cici vinaka eliu; o cei beka sa tarovi ikodou mo dou kakua ni talairawarawa kinia ki nai vavuvuli dina? ⁸ A vadinatia koya sa yali ni vu maivi koya sa kacivi ikodou. ⁹ E dua na tiki ni leveni lailai sa valevenitakia nai buli taucoko. ¹⁰ Au sa vararavi lia vi ikodou e na vuku ni Turaga, ni dou na yali ni lomavatani; ia ko koya lia sa vayavalati ikodou, ena rawatia na kenai sau, io ko koya yadua. ¹¹ Ia koi au, na viwekani, kevaka kau sa vunautakia tiko a vicili, a cava kau sa vacacani tiko kinia? sa qai mudu na vivatarabetaki e na vuku ni kauveilatai. ¹² Au sa vinakatia me ra mduki ira tani ko ira era sa vayavalati ikodou. ¹³ Ni dou sa kacivi, na viwekani, mo dou lalaga; ia dou kakua ni ia na lalaga me tubu kinia na ka vayago ka dou ia tikolia na vivuke ni vilomani vai ikodou. ¹⁴ Ni sa caka sara na vunau taucoko e na vosa e dua bau, koya lia: Mo lomana na kai nomu me vataki iko. ¹⁵ Ia kevaka dou sa vikata ka vikani vai ikodou, dou raicia vinaka de dou vi varusai vai ikodou. ¹⁶ Ia kau sa tukunia, Dou qai voli e na Yalo Tabu, ka dou na yali ni caka kinia na gagadre ca ni tovo vayago. ¹⁷ Ni sa vivala na gagadre ni tovo vayago ki na Yalo Tabu, a sa vivala na Yalo Tabu ki nai tovo vayago: ia sa vimecaki koi rau koya; dou sa yali kinia ni caka na vi ka dou sa vinakatia. ¹⁸ Ia kevaka sa tuberi ikodou na Yalo Tabu, dou na yali ni lewai e na vunau. ¹⁹ Ia sa votu na cakacaka ni tovo vayago, ka sa vakoya: A dauvibutakoci, na daudara, nai valavala tawa-savasava, na daugarogaro, ²⁰ na dausoro ki na vimatakau, na daucakaisausau, na dauvicati, na dauvileti, na viqati, na daucudrucudru, na dauviba, na visei vavuravura, na visei ni lotu, ²¹ na dauvuvu, na daumateni, na daumarau valialia ki na vi ka sa vakinia: a vi ka koya au sa tukunia vei ikodou, me vaka kau a tukunia makawa voki lia ni na yali ni rawatia na matanitu ni Kalou ko ira era sa caka na vi ka vakoya. ²² Ia na vua ni Yalo Tabu na loloma, na reki, na vacegu, na vosotia vadede, na yalomalua, na yalololoma, na vabautia, ²³ na yalomalumalumu, nai valavala malua: sa yali na vunau sa cudruvi kinia na vi ka koya. ²⁴ Ia ko ira era nei Karisito era sa vakotia ki na kauveilatai nai tovo vayago ki na kena dodomo ca ki na kena gagadre ca. ²⁵ Kevaka eda sa bula e na Yalo Tabu, tou qai voki lia e na Yalo Tabu. ²⁶ Me da kakua ni gadrevia me da dokai lowa lia, se vicudruvi, se vivuvutaki.