¹ Ia kau sa tukunia, Ni sa gone tiko nai taukei emuri, sa tauvata kei na tamata lowa lia, ia ka sa nona lia na ka kece lia; ² a sa lewai koya ko ira nai vavuvuli ki ira na matua, me yaco mada na gauna ka lokucia e liu ko tamana. ³ Sa vakinia koi ita eliu, ni da a gone tiko, sa lewai ita na vivu ni ka sa vavuravura me vaka eda bobula: ⁴ ia ni sa yaco dina sara na kena gauna, sa qai tala yani na Luvena na Kalou, o koya sa sucu mai na yalewa, sa sucu me lewai koya na vunau, ⁵ me voli ira kinia sa lewai ira na vunau, me da vabautia kinia me da luvena bau. ⁶ Ia ni dou sa qai luvena, sa tala na Kalou na Yalo ni Luvena ki na lomada, o koya sa dau kaci, Apa, Tamai keimami. ⁷ O koya koya ko sa yali kinia ni tamata lowa lia, a luvena lia; ia kevaka ko sa luvena, ko sa qai taukei e na vuku ni Kalou. ⁸ Ia eliu, ni dou a yali ni kila na Kalou, dou a dauqaravi ira sa yali ni noda i tovo me Kalou. ⁹ Ia edaidai, ni dou sa qai kila na Kalou, se dina lia ni sa qai kilai ikodou na Kalou, dou sa qai lesu voki vacava ki na vivu ni ka, sa malumalumu ka ka lowa lia, ka dou sa vinakatia mo dou qaravia voki? ¹⁰ Dou sa vatabuya na siga eso, ki na vula eso, ki na gauna eso, ki na yabaki eso. ¹¹ Au sa yalolailai e na vukumudou, de yali ni yaga na noqu cakacaka vi ikodou. ¹² Oi ikodou na viwekani, au sa masuti ikodou, mo dou vataki au; niu sa vataki ikodou: dou sa yali ni vacacani au valailai. ¹³ Ia dou sa kila, niu a vunautakia vi ikodou eliu nai tukutuku vinaka, sa malumalumu na yagoqu. ¹⁴ Ia e na vuku ni ka ni yagoqu sa vatovolei ikodou, dou sa yali ni beci au se vasisilatakia; ia dou a vacegui au me vaka kau sa agilose ni Kalou, me vataki Karisito Jisu. ¹⁵ Sa qai tu evei na nomudou marau eliu? niu sa vadinadinatakia vi ikodou, kevaka sa rawarawa, dou a leutia tani na matamudou, mo dou solia mai vei au. ¹⁶ Au sa qai yaco beka meu nomudou meca, niu sa vosa dina vi ikodou? ¹⁷ Era sa gumatua ni lomani ikodou, e yali e nai valavala vinaka, io era sa via tawasei ikodou tani, mo dou gumatua ni lomani ira. ¹⁸ Ia sa ka vinaka na gumatua tiko lia e na cakacaka vinaka, me kakua ni ia lowa lia niu sa tiko vata ki ikodou. ¹⁹ Na luvequ lalai, oi ikodou kau sa taratara voki kinia, me buli mada na Karisito e na lomamudou! ²⁰ Ia kau sa via tiko vi ikodou edaidai ka me dua tani na domoqu; niu sa nuinuica e na vukumudou. ²¹ Dou tukunia mai vi au, ikodou sa via vaucia e na vunau, dou sa yali beka ni rogocia na vunau? ²² Ni sa volai, sa lewe rua na luve i Eparaama ka tagane, a tinana e dua na vada, a tinana kadua na marama: ²³ ia ko koya sa luve ni vada, sa sucu vatamata; ia ko koya sa luve ni marama, sa sucu e na vosa ni yalayala. ²⁴ Ia na ka koya sa vaibalebale: ni sa viyalayalati e rua koi rau na yalewa koya; e dua mai na ulu-ni-vanua ko Saineai, o koya sa vasucu gone me ra bobula, oqori ko Eka. ²⁵ Ia ko Eka koya na ulu-ni-vanua ko Saineai mai Arepea, a sa tautauvata ki Jerusalemi ka tu edaidai, a sa bobula tiko ki ira na luvena. ²⁶ Ia ko Jerusalemi maicake sai taukei, o koya na tinada kece lia. ²⁷ Ni sa volai, Mo reki, ko iko na yava sa yali ni valuveni: Mo tabalaka na kaci, o iko sa yali ni taratara: Ni sa qai lewe vuqa na luvena ko koya ka biu, ka lewe lailai vua sa vawati. ²⁸ Ia koi ita, na viwekani, eda sa vataki Aisake, ni da sa gone ni vosa ni yalayala. ²⁹ Ia na ka sa caka eliu sa caka voki lia edaidai, sa vacacani koya sa vayalo ko koya sa sucu vatamata. ³⁰ Ia ka cava sa tukunia nai Vola Tabu! Vakaseva tani na vada ki na luvena; ni ra na yali ni taukei vata na luve ni vada ki na luve ni marama. ³¹ Sa vaka koya, ikodou na viwekani, eda sa yali ni luve ni vada, eda sa luve ni marama.