¹ Oi ikodou na viwekani, kevaka sa vakidacalataki e dua na tamata mei valavala ca, mo dou vavinavinakataki koya e na yalo malumalumu, oi ikodou sa vayalo; ka mo varaici iko, de ko sa dauvevetakia voki lia. ² Dou vivuke ni colatia na nomudou i colacola, ka mo dou vayacora kinia na vunau i Karisito. ³ Kevaka e dua sa nanumi koya me ka levu, ia sa ka lowa lia, sa qai vakaisini koya vai koya. ⁴ Ia me lewa deivaka na nona cakacaka na tamata yadua, ena qai rekitaki koya e na vuku i koya lia ka yali e na vukuna na tani: ⁵ ni na colatia na nonai colacola na tamata yadua.. ⁶ Ia ko koya sa vatavulici e na Vosa, me solia nai votavota ni ka kecelia e vinaka vi koya sa vatavulicia. ⁷ Mo dou kakua ni vakaisini ikodou; a Kalou ena yali ni valialiai; na ka kecelia sa kaburakia na tamata ena tamusukia voki lia ko ya. ⁸ Ko koya sa kaburakia na ka ni nonai tovo vayago, ena tamusukia na rusa mai nai tovo vayago; ia ko koya sa kaburakia na ka ni Yalo Tabu, ena tamusukia na bula tawa mudu mai na Yalo Tabu. ⁹ Ia me da kakua ni ceguoca e na caka vinaka, ni da na tamusukia e na kena yabaki, kevaka eda sa yali ni oca. ¹⁰ O koya koya, ni sa rawa, me da caka vinaka vi ira na tamata kecelia, ka valevu vi ira era vitokani e na vabautia. ¹¹ Dou raicia na mata ni vola lelevu kau sa volavola kinia vi ikodou e na ligaqu dina. ¹² O ira era sa via rairai vinaka vayago, era sa vasaurarataki ikodou mo dou cilivi; me ra kakua lia ni vacacani e na vuku ni kauveilatai nei Karisito. ¹³ Ia ko ira era sa cilivi era sa yali ni talairawarawa ki na vunau; era gadrevia lia mo dou cilivi me ra rekitakia na lewemudou. ¹⁴ Ia koi au, me kakua sara na ka tani meu rekitakia, na kauveilatai lia ni noda Turaga ko Jisu Karisito, o koya sa lauvako kinia vi au e na kauveilatai na vi ka vavuravura, koi au voki lia ki na vi ka vavuravura. ¹⁵ Ni sa yali ni yaga me cili, se me yali ni cili, sa yaga lia me tamata yalovou. ¹⁶ Ia me yaco na vacegu ki na loloma, kivi ira kece lia era sai valavala tiko me vaka nai varau koya, vi ira voki lia na Isireli ni Kalou. ¹⁷ Me kakua e dua me vararawataki au e na gauna emuri: ni sa tu lia e na yagoqu na we ni noqu mavoa e na vuku i Jisu. ¹⁸ Me tiko kei na yalomudou, na viwekani, na loloma ni noda Turaga ko Jisu Karisito. Emeni.