¹ Ia erau a qai vata ko Pita kei Joni ki na valenisoro ena aua sa dauia kinia na masumasu, ai kaciwa ni aua. ² A sa dua na tamata sa lokiloki mai na kete i tinana sa colati voli, o koya era sa vadavoria lia ena visiga ena mata ni darava ni valenisoro, sa vatokai ko Lagilagi, me kere kani loloma vi ira sa curu ki na valenisoro; ³ ni sa raici rau lia ko Pita kei Joni ni rau sa voleka ni curu kina valenisoro, a sa kerekere me dua na kani loloma. ⁴ A rau sa varaica matua ko Pita kei Joni, ka tukunia, 'Raici kirau mai.' ⁵ A sa vakasami rau ko koya, ni sa nanumia ena rawatia mai vi rau e dua lia na ka. ⁶ Sa qai tukunia ko Pita, 'A siliva kei na koula e yali ni tu vi au, ia na ka lia sa tu vi au kau na solia vi iko: Ena yaca i Jisu Karisito na kai Nasareci mo tucake lia ka qai. ⁷ Sa qai tauria na ligana i matau, a sa tuberia cake: sa qai vakaukauwataki sara lia na yavana kei na nona qurulasawa. ⁸ Sa qai rika i colo o koya ka wavu tu, ka qai voli, a sa curu vata kei rau ki na valenisoro, a sa qai, ka rika, ka varokorokotakia na Kalou. ⁹ A sa raici koya ko ira na tamata kece lia, sa qai voli ka varokorokotakia na Kalou: ¹⁰ a ra sa kila ni sai koya ka dautiko ena mata ni darava ko Lagilagi, mai na valenisoro, me kere kani loloma: a ra sa rere ka kurabui sara lia ena vuku ni ka sa qai yaco vua. ¹¹ Ia ni rau sa tuberia na lokiloki sa qai vabulai koya ko Pita kei Joni, a ra sa cici vata kece lia na tamata kivei iratou ki na varada sa vatokai na nei Solomoni, a ra sa kurabui valevu. ¹² Ia ni sa raicia ko Pita, sa tukunia vi ira na tamata, "Oi ikodou na tamata na Isireli, dou sa kurabui ena ka koya ena vuku ni cava? se cava dou sa varaici kirau matua kinia, me vaka sa nirau kaukauwa se yalododonu, kirau sa cakati koya kinia me qai rawa? ¹³ A Kalou i Eparaama, kei Aisake, kei Jekope, a nodra Kalou na noda qase, sa varokorokotakia na Luvena ko Jisu: ko koya dou a solia yani, ka cakitakia ena matai Pailato, ni sa lewa lia o koya me serekia. ¹⁴ Ia dou a cakitaki koya lia na Yalosavasava ka Dodonu, ka masutia me soli vi ikodou e dua lia na daulaba: ¹⁵ ka dou a vamatea na Vunibula, o koya a vaturia cake voki mai na mate na Kalou; ka kitou sai vadinadina ena ka koya. ¹⁶ Ia na yacana, ena vuku ni sa vabauti na yacana, sa vakaukauwatakia kinia o koya koya, o koya dou sa raicia ka kila: io, ni sa vabauti koya, sa soli lia vua na bula vinaka sara koya ena matamudou vayadua lia. ¹⁷ Ia vi ikodou na viwekani, au kila ni ikodou a yali ni kila na ka dou caka, me vaka voki lia vi ira na nomudou Turaga. ¹⁸ Ia ena veika sa tukunia e liu na Kalou ena gusudra kece lia na parofita, ni na mate lia na nona Karisito, sa qai vayaicora vakinia o koya. ¹⁹ O koya mo dou qai vivutuni ka saumaki lia mai, me bokoci kinia na nomudoui valavala ca, me yaco kinia na gauna ni vacegu mai na mata ni Turaga: ²⁰ ka talai Karisito o koya, io ko Jisu ka vunautaki e liu vi ikodou. ²¹ o koya e dodonu me tiko mada lia mai lomalagi, me yaco mada lia na gauna ena caka voki vinaka kinia na ka kece lia, ka vosa kinia na Kalou ena gusudra kece na nona parofita yalosavasava, ena gauna makawa. ²² Ni sa dina sa tukunia ko Mosese, 'Ena vatuburia cake vi ikodou ko Jiova na nomudou Kalou, mai vi ira lia na wekamudou e dua na parofita me vataki au; o koya dou na rogocia ena ka vayadua lia ena vosatakia vi ikodou: ²³ ia ena yaco, a tamata yadua sa na yali ni rogocia na parofita koya ena varusai tani lia vi ira na tamata.' ²⁴ Ia ko ira voki na parofita kece lia, sa kenai vatekivu ko Samuela kei ira voki lia sa taravia, ko ira kece lia era sa vosa, era sa tukunia eliu na gauna koya. ²⁵ Oi ikodou sa luvedra na parofita, kei na vosa lia ni viyalayalati sa caka na Kalou vi ira na noda matua, ni sa tukunia vi Eparaama, 'Ena Kalougata na vimataqali kece lia e vuravura ena vuku ni nomu kawa.' ²⁶ Sa tala na Luvena ko Jisu na Kalou, ka liu vi ikodou, ni sa vaturia cake, me vakalougatataki ikodou, ni sa saumaki ikodou ya dua mai na nomudoui valavala ca.