¹ Ia ni rau sa vosa tiko vi ira na tamata, sa qai mai vi rau ko ira lia na bete kei na turaga ni valenisoro, kei ra nai tokani i Setoki; ² ni ra sa cudru ni rau sa vavulici ira na tamata, ka vunautakia na tu cake voki mai na mate ena vuku i Jisu. ³ A ra sa tauri rau ka daini rau ena vale ni veivesu ena raiyavi koya ka yacovia na savulaci voki ni siga taravia. ⁴ Ia ka lewe levu era sa rogocia na vunau, era sa vabautia; ia na kedrai wiliwili na tagane sa lewe lima beka na udolu. ⁵ Ia ni savulaci, era sa soqoni vata mai Jerusalemi ko ira na nodra turaga, kei ira na qase, kei ira na vunivola, ⁶ kei Anasa na bete levu, kei Kaiafa kei Joni, kei Alekisada, kei ira kece lia na mataqali ni bete levu. ⁷ Ia ni ra sa vaturi rau ena kedra maliwa, era sa tarogia, "A kaukauwa cava se na yaca i cei drau sa caka kinia na ka koya?" ⁸ Sa qai vasinaiti ena ko Pita ena Yalo Tabu, a sa tukunia vi ira, Oi ikonu na nodra turaga na tamata, kei na nodra matua na Isireli, ⁹ kevaka kirau sa tarogi ena siga koya ena cakacaka vinaka vua na tamata lokiloki, se cava sa qai bula kinia; ¹⁰ mo ni kila kece lia kei ira kece lia na Isireli ni sa yaca i Jisu Karisito na kai Nasareci, o koya ikonu a vakotia ki na kauveilatai, o koya sa vaturia cake voki na Kalou mai na mate, io, ena vukuna lia sa tu kinia koya o koya koya ena matamu ka sa bula vinaka. ¹¹ Ko koya na vatu ikonu a catia sara koi ikonu na matai ni vale, ko ya sa yacovia me kenai vadei lia ni yavu enai tutu ni vale. ¹² A sa yali na bula ena vukuna e dua tani: sa yali sara e dua voki na yaca e ruku i lomalagi sa soli kivei ira na tamata, me da bula rawa kinia. ¹³ Ia ni ra sa raicia na nodrau doudou ko Pita kei Joni, ni ra sa kila voki lia erau sa yali so ni vuku, se tamata vuli, e ra sa kurabui kinia, a ra sa qai vakasami rau, ni ratou a dautiko vata kei Jisu. ¹⁴ Ia ni ra sa raicia na tamata ka vabulai, ni sa tu vata kei rau, e ra sa yali ni vatitiqatakia rawa. ¹⁵ Ia ni ra sa vatalai rau me rau qai tani ena vale ni bose, era sa qai bose lia vakai ira, ¹⁶ ka tukunia, "A cava me da caka vi rau na tamata koya? ni ra kila ko ira kece lia sa tiko e Jerusalemi ni sa dua na cakacaka mana rogo era sa caka; Ia a eda sa yali ni vatitiqatakia rawa. ¹⁷ Ia de tukuni valevu vi ira na tamata, me da tukunia lia, me rau cudruvi sara kevaka e rau vavuvulitakia voki vua e dua na tamata ena yaca koya." ¹⁸ A ra sa kacivi rau ka varotia vi rau me rau kakua sara lia ni vosa se vatavuvulitakia na yaca i Jisu. ¹⁹ Sa qai vosa ko Pita kei Joni, a rau sa tukunia vi ira, "Mo ni lewa lia se sa dodonu se yali ena mata ni Kalou me kirau varorogo vi ikonu ka yali vua na Kalou: ²⁰ ni sa mama sara lia vi kirau me kirau kua ni tukunia na veika kirau a raicia ka rogocia." ²¹ Ia ni ra sa yali ni raicia e dua na ka me rau cudruvi kinia, era sa vosa vacudrucudru voki vi rau, a ra sa qai serekia me rau qai, ena vukudra lia na tamata ni ra sa varokorokotakia na Kalou ko ira kece lia ena vuku ni ka sa qai caka. ²² Ni sa vasagavulu vacaca na nona yabaki, o koya na tamata sa caka vua na cakacaka mana koya ka bula kinia. ²³ Ia ni rau sa sereki, erau sa tukunia vi ira na nodraui tokani na ka kece lia era sa vosatakia vi rau ko ira na bete levu kei ira na qase. ²⁴ Ia ni ra sa rogocia, era sa lomavata ka tabalakia icolo na domodra vua na Kalou, "Ikonu a bulia na lomalagi kei vuravura, kei na waitui kei na ka kece lia sa tu kinia: ²⁵ ena gusui Tevita na nomuni tamata ko ni a tukunia, sa dau cudrutakia na vimatanitu ena vuku ni cava, ka sa vananumia na ka loa ko ira na lewe ni vivanua?" ²⁶ Era sa tuvai valu na tui kei vuravura, A ra sa soqoni vata ko ira na turaga me ra vivala kei Jiova kei na nona Karisito. ²⁷ Ni sa dina era sa soqoni vata lia ena koro koya me ra vivala kaya na Luvemunu savasava ko Jisu, o koya ko ni a lumutia, koi rau o Eroti kei Ponitio Pailato, kei ira na vimatanitu, kei ira na Isireli ²⁸ me ra caka kece lia na ka ko ni a lesia e liu me caka, me vaka na nomuni kaukauwa kei na nomuni i naki. ²⁹ Ia koya, Ikonu na Turaga, mo ni raicia na nodra vosa vacudrucudru, ka solia kivei ira na nomuni talatala me ra doudou valevu ni ra tukunia na nomuni vosa, ³⁰ ni ikonu sa dodoka tiko na ligamuni me caka na vivabulai, me caka voki lia nai vatakilakila eso kei na ka e vivakurabuitaki, ena yaca ni Luvemunu yalosavasava ko Jisu. ³¹ Ia ni ra sa masu oti, sa vayavalatia na vale era soqoni vata kinia: a ra sa dui vasinaiti kece lia ena Yalo Tabu, a ra sa doudou kinia ni ra sa tukunia na vosa ni Kalou. ³² Ia ko ira na lewe levu era sa vabautia, era sa lomavata ka yalovata; a sa yali e dua e tukunia me nona dua loa lia na ka sa tu vua; a ra sa taukenia vata li na nonai yau yadua. ³³ A sa levu na nodra kaukauwa nai apositolo, ni ra sa tukunia ni sa tucake voki mai na mate na Turaga ko Jisu: a sa vinakatia valevu ko ira kece lia. ³⁴ Ni sa yali e dua vi ira sa dravudravua; ko ira kece lia sa taukenia na vanua se na vi vale, era sa volitakia, a ra sa yadia nai voli ni ka era sa volitakia, ³⁵ a ra sa taucia kinia ki yavadra nai apositolo: a sa votai vi ira kece lia me vaka na nodra dui dravudravua. ³⁶ Ko Josese voki lia, o koya era sa vatoka ko ira nai apositolo me Panapasa, (a kenai balebale, A gone ni vacegu) a luvei Livai, a kai Kipiro, ³⁷ o koya sa taukenia e dua na tiki ni vanua, sa volitakia, ka yadia na kenai voli, ka taucia ki na yavadra nai apositolo.