¹ Ia ni sa yaco na siga ni Penitiko, era sa tiko lomata ko ira kece lia ena dua na tikina. ² Sa qai vasauri mai lomalagi e dua na rorogo, e vaka lia na cagi vacevaruru kaukauwa, a sa vasinaitia na vale taucoko era a tiko kinia. ³ A sa rairai vi ira na ka e vaka lia na viyameyame ni bukawaqa sa dui visebayaki, a sa tiko yadua vi ira vayadua lia. ⁴ A ra sa vasinaiti kece lia ena Yalo Tabu, a ra sa vatekivu me vosatakia na vosa tani eso, me vaka lia sa solia vi ira na Yalo Tabu me ra cavutia. ⁵ Era a tiko mai Jerusalemi eso na kai Jutia, ra tamata lotu mai na vivanua kece lia e rukui lomalagi. ⁶ Ia ni sa rogovaki yani na ka koya, a ra sa soqoni vata na lewe levu, a ra sa kurabui lia ni ra sa dui rogoci ira na tamata yadua ni ra sa vosatakia na nona vosa. ⁷ A ra sa kidacalatakia kece lia ka kurabui, ka tukunia vakai ira, Raicia, era sa yali beka li ni kai Kalili ko ira kece lia koya era sa vosa? ⁸ ia ka vaevei koya ni da sa rogocia koi ita kece lia ena noda vosa eda sucu kaya? ⁹ (ko ira na kai Paricia, kei Mitia, kei Ilama, kei ira sa tiko mai Mesopotemia, kei Jutia kei Kapatosia, mai Ponito, kei Esia, ¹⁰ mai Firijia kei Pamifilia, mai Ijipita kei na yasayasa va-Lipea e voleka ki Kirini kei ira na vulagi mai Roma, ko ira na kai Jutia, kei ira sa vuki ki na lotu vaka Jiu, ¹¹ ko ira na kai Kiriti kei Arepea) eda sa rogoci ira ni ra sa tukunia ena noda vosa na nona cakacaka e vivakurabuitaki na Kalou. ¹² A ra kurabui kece lia, ka taqaya, ka sa vitukuniyakia vakai ira, A cava nai balebale ni ka koya? ¹³ A sa valialia ko ira eso tani, ka tukunia, Era sa mateni lia ena waini vou. ¹⁴ Sa qai tucake lia ko Pita, kei ira na lewe tinikadua, ka sa tabalakia i colo na domona, ka tukunia vi ira, Oi ikodou na kai Jutia, kei ikodou kece lia sa tiko e Jerusalemi, mo do kila na ka koya ka rogocia na noqu vosa: ¹⁵ ni ra yali ni mateni ko ira koya me vaka na ka dou sa nanumia, ni se qai kenai katolu lia ni aua. ¹⁶ Ia ni sai koya lia koya sa tukunia na parofita ko Joeli: ¹⁷ 'Sa tukunia na Kalou, ena yaco ena gauna mai muri kau na sovarakia na Yaloqu kivei ira na tamata kece lia: A ra na parofisai kinia ko ira na nomudou gone yalewa, Ia, ena raicia na raivotu eso ko ira na nomudou matua: ¹⁸ Io, vi ira voki lia na noqu tamata kei na noqu vada kau na sovarakia na yaloqu ena gauna ko ya, a ra na parofisai kinia: ¹⁹ Ia kau na vatakila lia na ka evei vakidacalataki eso mai lomalagi e colo, kei nai vatakilakila eso e vuravura era; A dra, kei na bukawaqa, kei na kubou; ²⁰ Ena vuki lia na matanisiga me butobuto, kei na vula me dra, Ena qai yaco lia e muri na siga i Jiova, sa levu ka rogo tiko: ²¹ Ia ena yaco, o koya yadua lia ena masutia na yaca i Jiova, ena bula. ²² Ko ikodou na tamata na Isireli, rogocia na vosa koya; ko Jisu na kai Nasareci, a tamata sa vadinadinatakia vi ikodou ni Kalou ena cakacaka mana, kei na ka e vivakurabuitaki eso, kei na vatakilakila lia eso, sa solia na Kalou kivei koya me caka ena ikodou maliwa, me vaka dou sa kila: ²³ o koya ni sa soli oti yani vi ikodou, me vaka ka nakitia dina lia na Kalou ka lewa e liu, dou sa tauria ka vakotia ki na kauveilatai ka vamatea ena ligadra na tamata ca; ²⁴ o koya lia sa vatura i colo na Kalou ni sa serekia nai vau ni mate: ni sa yali ni rawa me vauci tiko lia kinia o koya. ²⁵ Ni sa vosataki koya lia ko Tevita, ka tukunia, 'Au sa raici Jiova tiko lia ni sa tu e mataqu, ni sa tu ko koya ena ligaqu i matau, me'u yali kinia ni yavavala; ²⁶ o koya lia sa reki kinia na yaloqu, a sa marau kinia na yamequ; Ena Vacegu voki lia na lewequ enai nuinui ²⁷ Ni ikonu na yali ni dainia na yaloqu mai etesi, Se dainia na nomu Le dua yalosavasava me vuca mai: ²⁸ Ko ni sa vatakila lia mai vi au na sala ni bula; ko ni na vasinaiti au ena marau mai na matamu. ²⁹ Oi ikodou na viwekani, dou vosotia me'u doudou lia niu sa tukuni Tevita na matua vi ikodou, ni sa mate lia o koya ka bulu, ka sa tu lia vi ita na nona i bulubulu ka yacovia na siga koya. ³⁰ Ia ni sa parofita lia ko koya, a sa kila ni sa bubului vua na Kalou, ni na tubu mai vua ko ki ra ena vatuburia mai kinia ko koya na Karisito, me vaka na lewena, me tiko lia ena nonai tikotiko vaturaga. ³¹ Ia ni sa kila e liu, sa tukunia na nona tucake voki mai na mate na Karisito, ni na yali ni dai tu mai etesi, se na vuca mai na lewena. ³² Ko Jisu koya, sa vaturia i colo na Kalou, ka sai vadinadina ni ka koya koi kitou kece lia. ³³ Ia ni sa yadi colo ena liga i matau ni Kalou, rawatia o koya mai vi Tamana na Yalo Tabu ka yalataki, sa qai sovarakia mai na ka koya, dou sa qai raicia ka rogocia. ³⁴ Ni sa yali ni yadi ki lomalagi ko Tevita; ia sa tukunia o koya, Sa tukunia lia ko Jiova vua na noqu Turaga, Mo tiko ena ligaqu i matau, ³⁵ Me'u vamalumalumutaki ira mada na nomu meca mei tutu lia ni yavamu. ³⁶ O koya koya me kila sara kinia na mataqali taucoko nei Isireli, ko Jisu koya, o koya dou a vakotia ki na kauveilatai, sa lesia lia na Kalou me Turaga ka Karisito voki lia. ³⁷ Ia ni ra sa rogocia, sa laucoka na yalodra, a ra sa tukunia vi Pita kei ira nai apositolo sa vo, Oi kodou na veiwekani, a cava me kimamu caka? ³⁸ Sa qai tukunia vei ira ko Pita, ''Dou vivutuni ka papitaisotaki, koi ikodou yadua, ena yaca i Jisu Karisito me bokoci kinia na nomudou i valavala ca, ka dou rawatia na Yalo Tabu mei solisoli.' ³⁹ Ni na caka vi ikodou na vosa ni yalayala, vi ira voki lia na nomudou gone, kei ira vayadua lia era sa vayawa io, vi ira yadua lia ena kacivi ira vua na Turaga na noda Kalou. ⁴⁰ Ia sa levu voki li na vosa sa tukunia ko koya ka varotia, ka tukunia, Dou vabulai ikodou mai nai tabatamata takelo koya. ⁴¹ Ia ko ira lia sa vabautia na nona vosa, era sa papitaisotaki: ka sa kenai kuri vi ira sa lotu ena siga koya e lewe tolu beka na udolu na tamata. ⁴² A ra sa qaravia matua na nodrai vavuvuli nai apositolo kei na vilomani, kei na dovi madrai kei na masumasu. ⁴³ A sa kani ira kece lia na rere; a sa levu na ka e vivakurabuitaki kei nai vatakilakila era sa caka ko ira nai apositolo. ⁴⁴ Ia ko ira kece lia sa vabautia era sa tiko vata, a ra sa dui solia na nonai yau yadua me ra taukena vata; ⁴⁵ a ra sa volitakia na nodra vanua kei na nodrai yau, a ra sa vota kivei ira kece lia me vaka lia na nodra dui dravudravua. ⁴⁶ A ra sa gumatua sara lia ena qai ki na valenisoro ena visiga, a ra sa lomavata, a ra sa dovi madrai ena vivale, a ra sa kania na kedra ena marau kei na yalo dina, ⁴⁷ ni ra sa vavinavinakatakia tiko vua na Kalou, a sa vinakati ira ko ira na tamata vayadua lia. Ia na Turaga sa vaikuritakia kivei ira nai soqosoqo lewe ni lotu, ena visiga, na tamata era sa vabulai tiko.