¹ I CEOFILO, au a vola nai vola e liu, kei na ka kece lia sa vatekivu me caka ka vatavuvulitakia ko Jisu: ² ka yacovia na siga sa kau cake kinia ko koya, ni sa taucia oti ena Yalo Tabu na nonai varo vi ira lia nai apositolo, ko ira ka digitakia ko koya: ³ ka sa varaitaki koya voki lia vi ira, ka sa levu na kenai vadinadina, ni sa bula voki mai na nona mate, ka ni sa daurairai lia vi ira ka bogi vasagavulu, ka vosatakia na veika ni matanitu ni Kalou. ⁴ Ia ni ratou sa soqoni vata, sa qai varotia vi iratou o koya vakoya: “Dou kakua ni daini Jerusalemi, ia dou warakia tiko lia na i solisoli ka'u a sa tukuna oti vi ikodou, na i solisoli sa yalatakia ko Tamaqu. ⁵ A sa vipapitaisotaki ena wai ko Joni, ia dou na qai papitaisotaki ena Yalo Tabu ena vica lia na siga koya.” ⁶ Ni ra sa soqoni vata era sa tarogi koya ka tukunia, ikonu na Turaga, ko ni na vayacori ira na Isireli me ra matanitu voki ena gauna koya se yali? ⁷ Sa tukunia vi ira o koya, sa yali ni nomudou mo dou kila na kena gauna, se na kena yabaki, sa lewa dua loa lia kinia ko Tamaqu. ⁸ ia dou na rawatia na kaukauwa ni sa qai mai vi ikodou na Yalo Tabu, dou na qai dautukuni au mai Jerusalemi, kei Jutia taucoko kei Samaria, ka yacovia nai yalayala kei vuravura. ⁹ Ia ni tukunia oti na veika koya o koya, sa qai yadi colo, ni ra sa varaicia tiko; a sa dua na lia na o sa tabonakia mai na matadra. ¹⁰ Ia ni ra sa rai matua ki lomalagi, ni sa qai yani o koya, raicia, e lewe rua voki na tamata sa tu voleka vi ira, erau vaisulu vulavula; ¹¹ a rau sa tukunia, Ko ikodou na kai Kalili, dou sa tu ka rai matua ki lomalagi, ena qai voki mai vakinia me vaka dou sa raicia koya ni sa qai ki lomalagi. ¹² Era sa qai lesu voki ki Jerusalemi mai na ulu-ni-vanua sa vayacani ki na violive, sa voleka ki Jerusalemi me vaka lia na kena yawa sa dau qaivi ena dua na siga ni vacecegu. ¹³ Ia ni ra sa curu lia ki loma, era sa cabe kina i taba vale e colo, era sa dautiko kinia ko Pita, kei Jemesa, kei Joni, kei Adriu, Ko Filipi kei Tomasi, ko Pacolomiu, kei Maciu ko Jemesa na luvei Alifio kei Saimoni e dua vi ira sa vatokai Na gumatua, kei Jutasa na taci Jemesa. ¹⁴ Era sa gumtua kece lia ko ira koya, era sa lomavata ena kerekere kei na dau masu, kei iratou voki lia na yalewa, kei Meri na tinai Jisu, kei iratou na tacina. ¹⁵ Ia ena gauna koya, sa tucake kinia ko Pita ena kedra maliwa na veiwekani (ni sa wili vata na yacadra era sa lewe dua beka na drau ka ruasagavulu) a sa tukunia, ¹⁶ ko ikodou na viwekani, e dodonu me vayacoria na tiki-ni-Vola Tabu koya, ka vosatakia e liu na Yalo Tabu ena gusui Tevita, ena vukui Jutasa, ko koya ka liutaki ira era sa tauri Jisu: ¹⁷ ni sa wili vata kei ita ko koya, a sa lesi ki na cakacaka koya. ¹⁸ (Ia na tamata koya sa volia e dua na tiki ni vanua enai voli ni nonai valavala ca; a sa lutu ka saumakidule ki ra, a sa kacabote na boto ni ketena a sa kasabura voki lia na nona wawa: ¹⁹ a sa kilai na ka koya vi ira kece lia sa tiko mai Jerusalemi: a sa vatokai kinia na tiki ni vanua koya ena nodra vosa, Akelitama, o koya koya Na vanua ni dra.) ²⁰ Ni sa volai enai vola ni Same, 'Me lala didi na nona vale, Ia me kakua na tamata me tiko kinia'; 'ia, me dua tani me tauria na nonai tavi' ²¹ O koya sa dodonu kinia me dua mada vi ira na tamata era sa tiko vata kei ita ena gauna voki lia sa tiko kinia vi ita na Turaga ko Jisu, ²² sa vatekivu mai na papitaiso i Joni ka yacovia na siga sa kau cake kinia vi ita ko koya, me lesi ko koya me tukunia vata kei ita na nona tucake voki mai na mate. ²³ A ra sa lesia e lewe rua, Ko Josefa sa vatokai ko Parisapa, a yacana voki lia ko Jusitu kei Mataiasa. ²⁴ Era sa qai masu, ka tukunia, Ko ikonu na Turaga, ko ni sa kila na na yalo ni tamata kece lia, mo ni vatakila mai se ko cei vi rau koya ko ni sa digitakia, ²⁵ me nonai tavi na cakacaka vaiapositolo koya, sa sivo tani mai kinia ko Jutasa, me qai kina nona yasana. ²⁶ A ra sa qai vawiri madigi, ena vukudrau, a sa bale vi Mataiasa: a sa wili vata kinia o koya kei ira na i apositolo e lewe tinikadua.