¹ Ia koi kitou ni kitou sa cakacaka vata kaya, kitou sa cikevi ikodou mo dou kakua ni vatawayagatakia na loloma ni Kalou. ² (Ni sa tukunia ko koya, "Au a rogoci iko ena gauna ni vinakati, Ia ena gauna ni bula kau a vukei iko: raicia, ko ya na gauna ni vinakati; raicia, na siga ni bula ni kua koya.") ³ Kitou sa yali ni vatarabetakia e dua ena dua na ka, me kakua ni beitaki kinia na cakacaka vaitalatala: ⁴ ia ena ka kece lia kitou sa vadinadinatakia ni kitou sai talatala ni Kalou, ena dauvosotia sara, ena ka rarawa, ena vivasaurarataki, ena yaluma, ⁵ ena vakanakuitaki, ena dai ki na vivalenivivesu, ena ue, ena daucakacaka, ena dauyadra, ena daulolo; ⁶ enai valavala savasava, ena vuku, ena vosotia vadede, e na yaloloma, ena Yalo Tabu, ena loloma sa yali ni vivakaisini, ⁷ enai vavuvuli dina, ena kaukauwa ni Kalou, enai yaragi ni valavala dodonu ena liga i matau kei nai mawi, ⁸ ni kitou sa varokorokotakia tiko se kitou yali ni dokai, ni kitou sa rogo vinaka tiko se rogo vaca: ni kitou sa vaka na dauvivacalai, ia kitou sa dina lia: ⁹ sa vaka kitou sa yali ni kilai, ia ka sa kilai vinaka; sa vataki ira sa mate, ia ka raicia, kitou sa bula tiko; kitou sa vataki ira sa cudruvi, ia ka yali ni vamatei; ¹⁰ kitou sa vaka kitou sa daurarawa, ia kitou sa reki tiko lia; sa vaka kitou sa dravudravua, ia kitou sa vavutuniyautaki ira na lewe levu; sa vaka ni sa yali vi kitou e dua na ka, ia ka sa tu vi kitou na ka kece lia. ¹¹ Koi ikodou na kai Korinica, sa dalaga na gusu i kitou vi ikodou, sa valevutakia na yalo i kitou. ¹² Dou sa yali ni leqa ena vuku i kitou, dou sa leqa lia ena lomamudou. ¹³ Ia me vaisautaki na ka koya, (Au sa qai vosa me vaka vi ira na luvequ.) dou yalolevu voki lia koi ikodou. ¹⁴ Dou kakua ni vitokani vata vatani kei ira era sa yali ni vabautia: sa vitokani vaevei na yalododonu kei na yali ni yalododonu? se rau sa viwekani vaevei na rarama kei na butobuto? ¹⁵ se rau sa vivinakati vaevei na Karisito kei Piliali? se rau sa vaitavi vata vaevei ko koya sa vabautia kei koya sa yali ni vabautia? ¹⁶ se rau na to vata vaevei na vale ni Kalou kei na vimatakau? ni da sa vale ni Kalou bula; me vaka sa tukunia na Kalou, "Au na tiko ena lomadra, ka qai voli kinia; ia kau na nodra Kalou ka ra na noqu tamata." ¹⁷ Ko koya koya Mo dou qai qai tani mai vi ira, ia dou tawasei tu", sa tukunia na Turaga, "Ka dou kakua ni tara na ka sa yali ni savasava; Au na qai vabauti ikodou. ¹⁸ Ia kau na yaco me Tamamudou, Ka dou na yaco me luvequ tagane kei na luvequ yalewa," sa tukunia na Turaga Kaukauwa sara.