¹ Ni kitou sa kila, kevaka sa rusa na nitou vale vavuravura ko koya sa vacevaceva, sa dua na nitou mai vua na Kalou, a vale sa yali ni caka ena liga, sa yali ni rusa rawa, mai lomalagi. ² Io kitou sa vutugu ena yago koya, ni kitou sa gadrevia sara tiko vaisulutakia ena nitou vale mai lomalagi: ³ ke sa vaka ni kitou sa vaisulu, kitou sa yali ni laurai me kitou televua. ⁴ Ni kitou sa vutugu, koi kitou sa tiko ena vale vacevaceva, ni kitou sa bitaki: ni kitou sa yali ni via luvatia koya, me kitou vaisulu mai, me tilomia na ka sa mate rawa na bula. ⁵ Ia sai koya na Kalou sa varautaki kitou ki na ka koya, ko koya sa solia voki lia vi kitou na Yalo Tabu me kenai sevu. ⁶ Ko koya koya kitou sa doudou tiko lia kinia, ni kitou sa kila, ni kitou sa tiko ena yago, kitou sa tawase kei na Turaga: ⁷ Kitou sa qai voli ena vabautia, ka yali lia ena raicia:) ⁸ kitou sa doudou tiko, ka kitou sa vinakatia cake me kitou tawase kei na yago, ka tiko vata kei na Turaga. ⁹ Ko koya koya kitou sa dauvatovolea kinia se kitou tiko vata, se tawase tani, me kitou vinaka lia vua. ¹⁰ Ni da na rairai koi ita kece lia ena mata ni tikotiko ni vilewai ni Karisito; me da rawatia yadua nai sau ni veika sa caka ena yagona, me vaka na veika sa caka ko koya, se vinaka se ca. ¹¹ Ia ni kitou sa kila na vivarerei ni Turaga, kitou sa vamasuti ira na tamata; ia kitou sa varaitaki vua na Kalou; au sa dinatia voki lia ni kitou sa varaitaki ena nomudou lewa-eloma. ¹² Ia kitou sa yali ni tukuni kitou voki vi ikodou, ia kitou sa solia lia vi ikodou na ka mo dou rekitaki kitou kinia, me so kinia na ka mo dou tukunia vi ira sa dokai ira ena ka vaka rairai lowa lia ka sa yali ena ka ni yalo. ¹³ Ia kevaka kitou sa sesewa, sa ka lia vua na Kalou; kevaka kitou sa yalomatua, sa ka lia ena vukumudou. ¹⁴ Ni sa rawai kitou sara na loloma i Karisito: ni kitou sa lewa vakoya, kevaka sa mate e dua ena vuku ni tamata kece lia, era sa mate kece lia; ¹⁵ ka sa mate ko koya e na vuku ni tamata kece lia, me ra kakua ni bula tiko me yaga vi ira lia, ko ira era sa bula, me ra yaga lia vua sa mate ena vukudra ka tu cake voki. ¹⁶ Ko koya koya kitou sa qai yali voki ni doka e dua na tamata ena vuku ni ka vayago; e dina lia kitou sa dokai Karisito ena vuku ni ka vayago, ia kitou sa qai yali voki ni dokai koya kinia. ¹⁷ Ia kevaka sa tu vata kei Karisito e dua na tamata, sa qai buli vou: sa qai tani na veika makawa; raicia, sa yaco me vou na ka kece lia. ¹⁸ A sa vu mai vua na Kalou na ka kece lia, ko koya sa va vivinakatitaki ita kei koya ena vuku i Karisito, a sa solia vi kitou me kitou vunautakia na vivinakati; ¹⁹ me vakoya, sa caka na Kalou, me va vivinakatitakia na vuravura vi koya lia ena vuku i Karisito, ka sa yali ni wilikia vi ira na nodra i valavala ca; ka sa solia vi kitou nai tukutuku ni vivinakati. ²⁰ Kitou sa yaco kinia mei talatalai Karisito, me vaka sa vamasuti ikodou na Kalou ena gusu i kitou: kitou nai sosomi ki Karisito, kitou sa vamamasu, mo dou vivinakati kei na Kalou. ²¹ Ko koya sa yali vua na cala sa qisia ko koya mei soro lia ni nodai valavala ca; me vayacori kinia vi ita na vivadonui ni Kalou ena vukuna.