¹ Ko koya ni sa soli vi kitou na cakacaka koya, ka me vaka sa yaco vi kitou na loloma, kitou sa yali ni datuvu kinia, ² ka kitou sa dainia na veika vuni e vivamaduataki, a sa yali ni daulawaki na nitou i valavala, se kitou vatanitakia na vosa ni Kalou; ia ni kitou sa tukunia na ka dina, kitou sa vadonui kitou kinia ki na lomadra na tamata kece lia, ena mata ni Kalou. ³ Ia kevaka sa vuni na nitou i tukutuku-vinaka, sa vuni tu kivei ira lia era sa rusa: ⁴ vi ira sa vamatabokotakia na lomadra na kalou ni vuravura koya, era sa yali ni vabautia, me kakua kinia ni cilavi ira na rarama ni tukutuku-vinaka ni serau i Karisito, ko koya lia na yaloyalo ni Kalou. ⁵ Ni kitou sa yali ni vunautaki kitou, ko Jisu Karisito lia na Turaga; kei kitou na nomudou tamata ena vuku i Jisu. ⁶ Ni sai koya na Kalou, ko koya sa tukunia e liu me cila mai na butobuto na rarama, sa cila mai ki na loma i kitou, me cila yani kinia nai serau ni Kalou, ko koya sa vatakilai rawa ena mata i Jisu Karisito. ⁷ Ia sa waqa qele sa tu kinia vi kitou nai yau koya, me sa qai mai vua na Kalou na kaukauwa mana levu, ka me yali mai vi kitou. ⁸ Sa buku na druadrua, ia kitou sa yali ni drigiti; kitou sa lomaocaoca lia ia kitou sa yali ni yalo lailai; ⁹ kitou sa vacacani, ia itatou sa yali ni dai laivi; kitou sa vabalei sobu, ia kitou sa yali i varusai; ¹⁰ kitou sa colatia e na yago i kitou ena visiga kece lia na mate i Jisu, me varaitaki voki lia kinia na bula i Jisu ena yago i kitou. ¹¹ Ni kitou sa soli tiko ena visiga, koi kitou sa bula voli, me kitou mate ena vuku i Jisu, me varaitaki voki lia kinia na bula i Jisu, ena yago i kitou sa mate rawa. ¹² A sa vakinia, sa daucakacaka vi kitou na mate, ia na bula lia vi ikodou. ¹³ Ia ni sa tiko vi kitou na yalo vabautia koya, me vaka na ka sa volai, Au sa vabautia, ko koya kau sa vosa kinia; kitou sa vabautia voki lia, ko koya kitou sa vosa kinia; ¹⁴ ni da sa kila, ko koya ka vaturia cake voki na Turaga ko Jisu ena vaturi kitou cake vata voki lia kei Jisu, ka varaitaki ita kei ikodou. ¹⁵ Ni sa yaco ena vukumudou na ka kece lia me varokorokotakia valevu cake na Kalou ena loloma sa levu sara, ni sa vavinavinakatakia ko ira na lewe levu. ¹⁶ Ena vuku ni ka koya kitou sa yali ni datuvu kinia; ia kevaka sa rusa mai na yagoda esau, sa vavoui na tamata e loma ena vi siga kece lia. ¹⁷ Ia na noda rarawa mamada, sa dede valailai sara lia, sa vayacoria vi ita na serau levu sa uasivi cake valevu sara, ka yali ni mudu, ¹⁸ ni da sa yali ni vananumia tiko na vi ka sa rairai mai, na veika lia sa yali ni rairai mai; ni sa dede valailai lia na veika sa rairai mai; ia sa yali ni mudu na veika sa yali ni rairai mai.