¹ Ko koya koya, ikodou sa daulomani, ni sa qai tu vi ita na vosa ni yalayala koya, me da vasavasavataki ita mai na dukadukali kece lia ni yago ki na yalo, meda caka sara lia na ka savasava ena rerevakia na Kalou. ² Mo dou dolavia na yalomudou vi kitou; kitou sa yali ni vacala e dua, kitou sa yali ni vacacania e dua kitou sa yali ni kovea na nonai yau e dua. ³ Sa yali ni vosa ni vi beitaki na noqu vosa koya: niu sa tukunia oti e liu, dou sa tiko ena yalo i kitou me da bula vata ka mate vata. ⁴ Sa levu na noqu doudou niu sa vosa vi ikodou, au sa rekitaki ikodou valevu; au sa sinai sara ena vacegu, au sa marau valevu sara e na nitou rarawa kece lia. ⁵ Ia ni kitou sa yaco ki Masitonia, sa yali ni cegu na yago i kitou, ia. itatou sa vararawataki lia ena ka kece lia; esau sa ia na vivala, e loma sa tiko na rerevakia. ⁶ Ia na Kalou, ko koya sa vacegui ira era sa vabalei sobu, sa vacegui kitou ni sa qai mai ko Taito; ⁷ a sa yali loa lia ena nona qai mai, ena vivacegui kinia ko koya ena vukumudou, ni sa tukunia vi kitou na nomudou gagadre, na nomudou tagi, na nomudou loloma katakata vi au; ka'u sa reki valevu cake kinia. ⁸ E dina lia ka'u a vararawataki ikodou e nai vola, ia kau sa yali ni vivutuni kinia, ia kau a vivutuni lia eliu; niu sa qai raicia sa vararawataki ikodou nai vola ko ya, ia ka sa dede valailai lia. ⁹ Au sa qai reki, ka yali lia ni dou a vararawataki, ni dou sa rarawa lia ki na vivutuni: ni dou sa vararawataki me vaka na loma ni Kalou, me kakua ni yali vi ikodou e dua na ka e na vuku i itatou. ¹⁰ Ia na rarawa sa vaka na loma ni Kalou sa vayacoria na vivutuni ki na bula o koya sa yali ni vivutunitakia voki: ia na rarawa vavuravura sa vayacoria na mate. ¹¹ Ia ka raicia, na ka lia koya, io, na nomudou vararawataki vaka na loma ni Kalou, ni sa vatuburi vi ikodou na gugumatua! io, na vasavasavataki ikodou, io, na cudrucudru, io, ka rerevakia, io, na gagadre valevu, io, na lomakatakata, io, na via saumia na ca! Ena ka kece lia dou sa vadinadinatakia ni dou sa yali ni cala ena ka ko ya. ¹² Ko koya koya, niu sa volavola vi ikodou, au sa yali ni volavola ena vukuna sa caka na ka ca koya, se na vukuna loa lia sa vacacani, me varaitaki lia vi ikodou na nitou daunanumi ikodou ena mata ni Kalou. ¹³ Ko koya koya kitou sa vacegui kinia; ia ena nitou vivacegui voki lia kitou sa reki valevu cake ena vuku ni reki i Taito, ni sa vacegui na yalona ena vukumudou kece lia. ¹⁴ Ia kevaka ka'u a vacaucautaki ikodou vua ena ka eso, au sa qai yali ni madua kinia; ia me vaka sa dina na ka kece lia kitou a tukunia vi ikodou, sa rairai va voki lia kinia me dina na nitou vivacaucautaki ena mata i Taito. ¹⁵ Ia sa ka levu sara na nona loloma vi ikodou, ni sa nanumia ko koya na nomudou talairawarawa kece lia, ni dou sa vacegui koya ena rere kei na sautaninini. ¹⁶ Au sa reki niu sa qai vararavi vi ikodou ena ka kece lia.