¹ Au sa vaka mo dou vosoti au mada lia niu lialia valailai; io, dou vosoti au mada lia. ² Niu sa lomani ikodou sara me vaka na loloma ni Kalou: niu a musuki ikodou vua e dua me watimudou, meu varaitaki ikodou vi Karisito e dua lia na goneyalewa savasava. ³ Ia kau sa rere, de dua na ka ena vacalai kinia na lomamudou mai na kena dina kei na kena savasava vi Karisito, me vaka ka vacalai Ivi kinia eliu na gata e na nonai lawaki ca. ⁴ Ia sa dodonu lia mo dou vosoti koya sa qai qai mai, kevaka sa vunautakia e dua tani na Jisu, o koya kitou sa yali ni vunautakia eliu, se sa yaco vi ikodou e dua tani na Yalo, o koya sa yali ni yaco vi ikodou eliu, se dua tani nai tukutuku-vinaka, dou a yali ni vabautia eliu. ⁵ Niu sa vasama niu sa yali sara ni uasivi sobu vi iratou nai apositolo eratou sa uasivi cake. ⁶ Ia kevaka kau sa yali ni matai ni vosa, sa tu lia vi au na vuku; ia kitou a varaitakia sara vi ikodou ena ka kece lia. ⁷ Au sa qai cala beka niu sa vamalumalumutaki au mo dou valevutaki kinia, niu sa vunautakia vi ikodou nai tukutuku-vinaka ni Kalou ka yali ni voli kinia? ⁸ Au a vadravudravutaki ira nai soqosoqo lewe ni lotu tani eso, niu sa voli vi ira, meu caka kinia na cakacaka vi ikodou. ⁹ Ia niu a tiko vadravudravua vi ikodou, au a yali ni vaogai koya e dua: ni ra sa soli ka me rauti au ena noqu dravudravua ko ira na viwekani era a qai mai Masitonia: ia ena ka kece lia au a varaici au meu kakua ni vaogai ikodou, kau na vatiko lia kinia. ¹⁰ Me vaka kau sa dina ena mata i Karisito, ena yali sara ni tarovi na noqu vosa doudou ena ka koya ena yasayasa va-Akaia. ¹¹ Ena vuku ni cava? niu sa yali li ni lomani ikodou? Sa kila lia na Kalou. ¹² Ia na ka kau a caka, au na caka tiko lia, meu mudukia tani kinia na vuna mai vi ira era gadrevia na vuna: me ra laurai lia me ra vataki kitou ena ka era sa valevulevui ira kinia. ¹³ Ni ra sai apositolo vailasu ko ira sa va koya, era sa tamata daucakacaka vavivakaisini, era sa vamataliataki ira me rai apositolo ki Karisito. ¹⁴ Ia ka sa yali ni ka e vivakurabuitaki koya; ni sa vamataliataki koya ko Setani me agilose ni rarama. ¹⁵ Ko koya koya sa yali kinia ni ka levu me vamataliataki voki lia ko ira na nonai talatala me ra vataki ira nai talatala ni valavala dodonu: ia na kedrai tinitini ena vaka na nodra cakacaka. ¹⁶ Au sa tukunia voki, Me kakua na tamata me nanumia kau sa lialia; ia kevaka sa nanumia vakinia e dua, mo dou vosotia lia na noqu lialia, meu valevulevui au voki lia valailai. ¹⁷ A ka kau sa tukunia, au sa yali ni tukunia me vaka na ka ni Turaga, me vaka lia na ka lialia, niu sa valevulevui au ena vosa doudou koya. ¹⁸ Ni ra sa lewe levu era valevulevui ira vayago lia, koi au voki lia kau na valevulevui au. ¹⁹ Ni dou sa reki mo dou vosoti ira era sa lialia, ni dou sa vuku. ²⁰ Ni dou sa vosotia lia, kevaka sa vabobulataki ikodou e dua, kevaka sa vadravudravuataki ikodou e dua, kevaka sa lawakitaki ikodou e dua, kevaka e dua sa valevulevui koya, kevaka sa sabicia na matamudou e dua. ²¹ Au sa vosa, me vaka kau sa beci, me vaka itatou a malumalumu sara lia. Ia kevaka e dua sa doudou ena dua na ka, (au sa vosa valialia,) au sa doudou va voki lia kinia. ²² Ko ira beka era sa Iperiu? au sa vakinia. Era sa luve i Isireli? au sa vakinia. Era sa kawa i Eparaama? au sa vakinia. ²³ Era sai talatala i Karisito? (au sa vosa me vaka na lialia,) au sa uasivi cake; au a daucakacaka valevu cake, au a yaviti valevu sara, au a tiko valevu cake, au a yaviti valevu sara, au a tiko valevu cake ena vale ni vivesu, au a voleka ni mate valevu. ²⁴ Sa yaviti au valima ko ira na Jiu a sa tau na kuita vayatolusagavulu ka ciwa. ²⁵ Au a warolaki vatolu, au a vaviriki vadua e na vatu, e na noqu visokoyaki au a mate vatolu, au a tiko e na wai titobu ka bogi dua ka siga dua; ²⁶ au a viqaiyaki voli valevu, au a ca ena vi uciwai, au a ca mai vi ira na daubutako, au a ca mai vi ira na kai noqu, au a ca mai vi ira na viwekani vailasu; ²⁷ au a dauoca ka daurarawa, au a dauyadra valevu, au a dauviakana ka dauviasomi, au a daulolo valevu, au a liliwa ka televua. ²⁸ Ia ka sa yali ni wili na vi ka sa vo koya voki lia sa bitaki au e na visiga, na daunanumi ira kece lia na visoqosoqo lewe ni lotu. ²⁹ O cei beka sa malumalumu kau sa yali ni malumalumu? ko cei sa vacalai, kau sa yali ni lomakatakata kinia? ³⁰ Kevaka e dodonu meu valevulevui au, au na valevulevui au ena vuku ni noqu malumalumu. ³¹ A Kalou na Tama ni noda Turaga ko Jisu, ko koya sa varokorokotakia ka yali ni mudu, sa kila niu sa yali ni vosa lasu. ³² Mai Tamasiko, na Kovana ni Arita na tui sa vatawa na koro ko Tamasiko, ni sa via tauri au; ³³ ia kau sa tukucia sobu e loma ni dua na sova, mai na darava e colo e taudaku ni bai, ka bula kinia mai na ligana.