¹ E dina lia meu valevulevui au, ia sa yali beka ni yaga; ia kua na cavutia na viraivotu ki na vi varairai ni Turaga. ² Au sa kila e dua na tamata ko koya sa tu vata kei Karisito, ni sa yadi cake mada ko koya koya ki nai katolu ni lomalagi, a sa qai oti na yabaki e tinikava (se vayago beka, se yali, au sa yali ni kila; sa yali beka ni vayago, au sa yali ni kila; sa kila lia na Kalou;) ³ io, au sa kila voki lia na tamata sa vakoya, (se vayago lia, se yali ni vayago, au sa yali ni kila; sa kila lia na Kalou;) ⁴ ni sa yadi cake ki Parataisi, a sa rogocia na vosa sa yali ni tukuni rawa, sa yali ni tara me tukunia na tamata. ⁵ Au na valevulevui au ena vukuna sa va koya; ia ena vukuqu lia, kau na yali ni valevulevui au; ena vuku lia ni noqu malumalumu. ⁶ Ia kevaka kau sa vinakatia meu dokai au, au na yali ni lialia kinia; niu na tukunia lia na ka e dina: ia kau sa kua so lia, de dua sa vasami au niu sa uasivi cake ena ka sa raicia vi au, se rogocia vi au. ⁷ Ia deu valevulevui sara ni sa levu sara na vivarairai, sa dua na voto ni kau sa valauti kinia na lewequ, e dua nai talaki i Setani me vararawataki au, deu valevulevui sara. ⁸ Ena vuku ni ka koya, kau a masu vatolu vua na Turaga, me yadi tani vi au. ⁹ A sa tukunia vi au ko koya, Sa rauti iko na noqu loloma: ni sa valevui na noqu kaukauwa, ni sa malumalumu e dua. Ko koya koya sa yaloqu sara kinia meu rekitakia na noqu malumalumu, me tiko kinia vi au na kaukauwa i Karisito. ¹⁰ Ko koya koya, kau sa vinakatia kinia na malumalumu, na vasewasewani, na vadravudravuataki, na vivacacani, na vivararawataki, ena vuku i Karisito: ia niu sa malumalumu, au sa qai kaukauwa. ¹¹ Au sa yaco meu lialia; koi ikodou lia sa vavuna; ni ka dodonu mo dou vosavavinakataki au kinia; niu sa yali ni uasivi sobu vi ira nai apositolo era sa uasivi cake; ia sa dina lia niu sa ka loa lia. ¹² E dina sa vayacori ena ikodou maliwa na vivatakilakila ni apositolo ena dauvosotia kece lia, ena veika mana, kei na veika e vivakurabuitaki, kei na cakacaka mana. ¹³ A cava beka dou sa uasivi sobu kinia vi ira na visoqosoqo lewe ni lotu tani, ena vuku lia ni ka koya, niu sa yali ni vaogai ikodou? ia mo dou kakua ni cudruvi au ena vuku ni ka ca koya. ¹⁴ Raicia, au sa varau meu qai vatolu yani vi ikodou; ia kau na yali ni vaogai ikodou: ni kau sa yali ni vasaqara na nomudou ka, koi ikodou lia: ni sa yali ni kilikili kei ira na gone me ra binia nai yau me nodra na qase, ko ira lia na qase, me nodra na gone. ¹⁵ Ia sa yaloqu sara meu soli au ki na ka sa tu vi au ena vuku ni yalomudou; io kevaka sa ka levu na noqu loloma vi ikodou kau na lomani kinia valailai beka? ¹⁶ Ia me vaka lia koya, au sa yali ni beitaki ikodou: ia niu a yaloqaseqase, kau sa rawai ikodou enai lawaki. ¹⁷ Au sa vaiyau mai vi ikodou li vi ira kau a tala vi ikodou? ¹⁸ Au a masuti Taito, ka tala vata kaya e dua vi ira na viwekani. Sa vaiyau mai vi ikodou li ko Taito? kei rau a yali li ni valavala ena yalovata? keirau a yali li ni muria e dua loa lia nai varau? ¹⁹ Dou sa vasama tiko beka ni kitou sa vosavinakataki kitou vi ikodou? Kitou sa vosa ena mata ni Kalou, ni kitou sa tu vata kei Karisito: ia na ka kece lia, ikodou sa daulomani, mo dou vatataki cake kinia. ²⁰ Niu sa rere, deu qai yani ka yali ni raici ikodou me vaka kau sa vinakatia, ia kau na qai laurai vi ikodou me vaka dou sa yali ni vinakatia: de sa tiko na vileti, kei na vuvu, kei na cudrucudru, kei na viba, kei na kakase, kei na vasolokakana, kei na viavialevu, kei na ue: ²¹ de vamalumalumutaki au ena matamudou na noqu Kalou, niu sa qai voki yani, ka deu tagicaki ira kinia era lewe levu era sai valavala ca oti, ka yali ni vivutunitakia na dukadukali kei na dauyalewa, kei na daudara, era a caka.