¹ Ia koi au ko Paula, kau sa masuti ikodou e na yalomalumalumu ki na yalomalua i Karisito, oi au sa malumalumu niu sa tiko vi ikodou, ia kau sa doudou vi ikodou niu sa tiko tani; ² io, kau sa vamasuti ikodou meu kakua ni doudou niu sa tiko vata e na kaukauwa, kau sa nanumia meu doudou kinia vi ikodou eso, o ira sa vasami itatou ni itatou sai valavala me vaka na ka vayago. ³ Sa dina lia sa vayago na nitou bula, ia itatou sa yali ni vala me vaka na ka vayago: ⁴ (ni sa yali ni ka vayago na nitou i yaragi, ia sa kaukauwa lia e na vuku ni Kalou me talaraki kinia na bai ni valu kaukauwa:) ⁵ sa talarakia sobu kinia ka vinanuyakia, ki na ka cecere kece lia sa valevulevui me voratia na vuku ni Kalou, ka sa vamalumalumutakia na nanuma kece lia me talairawarawa kinia vi Karisito; ⁶ ia kitou sa varau tu me saumia kece lia na talaidredre, ni na vayacoria dina na nomudou talairawarawa. ⁷ Dou sa lewa beka me vaka sara lia na ka sa rairai? Kevaka e dua sa vadinatia ni sa ni Karisito ko koya, me nanumia voki lia koya ko koya, me vaka sa ni Karisito ko koya, kitou sa ni Karisito vaka voki lia kinia. ⁸ Ia kevaka kau sa dokai au valevu cake sara lia ena vuku ni lewa (sa solia mai vi kitou na Turaga, mo dou vatataki cake kinia, ia ka yali lia mo dou varusai kinia,) au na yali ni vamaduataki. ⁹ Meu kakua ni vaka ni kau sa via varerei ikodou e na noqu i vola; ¹⁰ ni ra sa tukunia, Sa bibi ka kaukauwa na nonai vola; ia sa malumalumu lia ni sa tiko vi ita, ka sa ka loa lia na nona vosa; ¹¹ me qai nanumia na ka koya, ko koya sa vakinia, ni rau na tautauvata lia, na nitou itukutuku enai vola ni kitou sa tiko tani, kei na nitou i valavala ni da sa tiko vata lia. ¹² Ni kitou sa yali ni doudou me wiliki kitou vata kei ira eso, se vatautauvatataki kitou kei ira era sa dautukuni ira vakai ira; ia ko ira ni ra sa varauti ira vakai ira, ka vatautauvatatakia vakai ira, era sa yali ni vuku. ¹³ Ia koi kitou, kitou sa yali ni valevulevui kitou ena veika sa uasivitia nai varau, me vaka lia nai varau ni yalayala sa vota vi kitou na Kalou, ai varau me kitou yaco dina vi ikodou. ¹⁴ Ni kitou sa yali ni uasivitia na nitou i yalayala, me vaka kitou sa yali ni yacovi ikodou: ni kitou sa yacovi ikodou voki lia enai tukutuku-vinaka kei Karisito: ¹⁵ kitou sa yali ni dokai kitou ena veika sa uasivitia nai varau, ena vuku ni nodra cakacaka na tamata tani; ia kitou sa nuinui lia, ni sa valevutakia tiko na nomudou vabautia, kitou na valevulevui kinia vi ikodou me vaka na nitou i yalayala me kitou uasivi, ¹⁶ me kitou vunautakia nai tukutuku-vinaka ena yasana sa uasiviti ikodou, me kitou kakua ni valevulevui kitou ena vuku ni yalayala ni tamata tani, ena veika sa varau tu vi kitou. ¹⁷ Ia ko koya sa vosa doudou, me vosa doudou e na vuku ni Turaga. ¹⁸ Ni sa yali ni vabau ko koya sa tukuni koya, sa vabau lia ko koya sa tukunia na Turaga.