¹ Sa dina na vosa, Kevaka e dua sa gadrevia na cakacaka vaitalatala matua, sa gadrevia na cakacaka vinaka. ² Ko koya sa kilikili kaya nai talatala matua me yali ni cala, me dua bau lia na watina, me yalomamakutu, me yalomatua, mei valavala dodonu, me daulomasoli, me vatavuvuli vavuku; ³ me kakua ni dausomi waini, me kakua ni dauvivala, me kakua ni daugarovia nai yau vakasisila: me yalomalua, me kakua ni daucudrucudru, me kakua ni daukocokoco; ⁴ me lewai ira vinaka na nona lewe ni vale, ka me talairawarawa ko ira na luvena ka caka nai valavala sa kilikili sara lia; ⁵ (ia kevaka sa dua na tamata sa yali ni lewai ira rawa na nona lewe ni vale, ena raicia vavinaka vaevei nai soqosoqo lewe ni lotu ni Kalou?) ⁶ me kakua e dua sa qai lotu lia, de viavialevu, ka cudruvi kinia me vaka na tevoro. ⁷ A sa dodonu voki lia me rogo vinaka vi ira e taudaku; de bale ki na ka ena vosavacacataki kinia, kei nai vesu ni tevoro. ⁸ Me yaloqaseqase ko ira voki lia na tuirara, me ra kakua ni vivakaisini ena vosa, me ra kakua ni guta valevu na waini, me ra kakua ni daugarovia nai yau vasisila; ⁹ me ra tauria matua nai vavuvuli ka vuni eliu era sa qai vabautia, ena lewa eloma vinaka. ¹⁰ Ia me ra vatovolei mada eliu ko ira voki lia koya; me ra qai yaco me tuirara ni ra sa yali ni cala. ¹¹ Me yaloqaseqase ko ira voki lia na yalewa, me ra kakua ni daukakase, me ra yalomatua, ka lomadina ena ka kece lia. ¹² Me sa yadua lia na watidra na tuirara, ia me ra lewai ira vinaka na luvedra, kei na nodra lewe ni vale. ¹³ 13Ia ko ira era sa cakaji vinaka na cakacaka ni tuirara, era sa rawatia kinia me ra tubu cake, a ra sa doudou voki lia me tukunia na vabauti Karisito Jisu. ¹⁴ A veika koya kau sa vola vi iko, ia kau sa vanuinui meu qai kusarawa yani vi iko: ¹⁵ ia kevaka kau sa dede, mo kila nai valavala sa kilikili sara lia kei ira na tamata ena vale ni Kalou, koya nai soqosoqo lewe ni lotu ni Kalou bula, na duru kei na yavu ni vavuvuli dina. ¹⁶ Ia na ka koya sa yali ni viletitakia ni sa ka levu na ka ni Kalou ka vuni tu eliu: Sa rairai vatamata na Kalou, sa vadinadinatakia vi koya na Yalo Tabu, sa raici koya na agilose eso, sa vunautakia ko koya vi ira na vimatanitu, sa vabauti koya eso na kai vuravura, sa yadi cake ki na vanua vaiukuuku.