¹ Ia sa tukunia vamatata na Yalo Tabu ni na vuki tani eso mai na vabautia ena gauna emuri, ni ra varogocia eso na yalo e dauvivacalai kei na nodra i vavuvuli na tevoro; ² ena nodra dauvivakaisini era sa vosa lasu, sa tavuni kinia na nodra lewa eloma me vaka ena kaukamea katakata; ³ era sa dautarovia na vawati, a ra sa vatabuya na kakana eso, sa caka na Kalou me ra kania ka vavinavinaka kinia ko ira sa vabautia ka kila nai vavuvuli dina. ⁴ Ni sa vinaka na ka kece lia sa caka na Kalou, a sa yali na ka me beci, kevaka eda vavinavinaka kinia ni da kania; ⁵ ni sa vasavasavatakia ena vosa ni Kalou kei na masu. ⁶ Kevaka ko sa vananumi ira na viwekani ena veika koya, ko na qai talatala vinaka ni Jisu Karisito, sa vatuburi cake ena vabautia ki nai vavuvuli vinaka gona ko sa daumuria. ⁷ Ia mo dainia sara na vosa tabu ki na vosa lialia ni yalewa matua, ia mo dauvaogai iko ki na lotu. ⁸ Ni sa yaga valailai lia na ogaoga vayago: ia na lotu sa yaga ena ka kece lia, ni sa yalatakia kinia na ka ni bula koya vata kei na ka ni bula voki lia ena muri mai. ⁹ Sa dina na vosa, a sa yaga mo vabautia valevu. ¹⁰ Ni sai koya lia koya kitou sa daucakacaka kinia ka sa valialiai, ni kitou sa vararavi ki na Kalou bula, nai Vabula ni tamata kece lia, a sa nodra dina sara lia era sa vabautia. ¹¹ Na veika ko ya mo varotia ka vatavuvulitakia. ¹² Me kakua ni dua me beci iko baletia loa lia ni ko sa cauravou tiko, ia mo yaco mo i varau vi ira era sa vabautia ena nomu vosa, ena nomu i tovo, ena loloma, ena vabautia kei na yalosavasava. ¹³ Mo gumatua ena wilikia na i Vola Tabu vi ira na lewe levu, ena vunau kei na vivavulici me yacovia na noqu qai yani. ¹⁴ Kakua ni weletakia nai solisoli sa tu vi iko, na veika sa soli vi iko ena parofisai ki na vitabaki ni ligadra na matua. ¹⁵ Dau vayacoria na veika ko ya ka solia taucoko kinia na nomu dina, ka me ra raicia kece kinia na nomu tubu cake. ¹⁶ Qarauni iko vinaka ki na nomu i vavuvuli. Mo vayacoria tiko lia na veika koya, baletia ni kevaka ko sa caka vavinaka vaka koya, ko na bula kinia ki ira voki lia era sa rogoci iko.