¹ Ia ni sa vararawataki na Karisito e na yagona e na vukuda, dou vaiyaragi mada e na yalo e vakinia: ni sa mudu ni valavala ca ko koya sa vararawatakia e na yagona; ² me kakua kinia ni vaka na gagadre ca ni tamata na nona bula e na yagona e na gauna sa vo, me vaka lia na loma ni Kalou. ³ Ia me kena levu vi ita na gauna ni bula sa oti ni da caka kinia na ka era vinakatia ko ira era sa yali ni lotu, ni da sa muria qai na gagadre ca, na dodomo ca, na daugunu waini, nai soqosoqo lialia, na daumateni, kei na kena ca ni dausoro ki na vimatakau: ⁴ a ra sa kurabui ni dou sa yali ni gu vata kei ira ki nai valavala sa velavela uasivi era sa vosavacacataki ikodou kinia, ⁵ ia era na tukuni ira vua sa varau me lewai ira era sa bula kei ira voki lia na mate. ⁶ E na vuku ni ka koya sa vunautakia kinia nai tukutuku-vinaka vi ira voki lia era sa mate tu, me ra lewai me vaka na tamata me mate na yagodra, ia me ra bula lia vua na Kalou e na yalodra. ⁷ Ia ka sa voleka nai vataotioti ni ka kece lia: dou yalomatua kinia, ka dauyadravia na masumasu. ⁸ Ia na ka me liu koya mo dou dauvilomani valevu vakai ikodou; ni na ubia nai valavala ca e levu na loloma. ⁹ Dou dui caka na vivuke koi ikodou ni dou vulagi voli, ia dou kakua ni vosa kudrukudru kinia. ¹⁰ Me vaka dou sa dui rawatia nai solisoli, mo dou dui solia vakinia vakai ikodou, me vaka na dauniyau vayalo e na loloma e valevu ni Kalou. ¹¹ Kevaka e dua sa vosa, me caka me vaka na vosa ni Kalou: kevaka e dua sa caka na cakacaka, me caka lia me vaka na kaukauwa sa solia na Kalou: me varokorokotakia kinia na Kalou e na ka kece lia e na vuku i Jisu Karisito, o koya sa nona na varokoroko kei na lewa e na gauna kece lia ka yali ni mudu. Emeni. ¹² Oi ikodou sa lomani, kakua ni kidacala e na vuku ni rarawa katakata sa yaco me vatovolei ikodou, me vaka sa yacovi ikodou na ka tani: ¹³ ia dou reki lia, ni dou sa vaivotavota voki lia e na vivararawataki i Karisito; mo dou reki voki lia kinia, e na reki vaidina, ni na varaitakia ko koya e nai ukuuku. ¹⁴ Kevaka dou sa vasewasewani e na vuku ni yaca i Karisito, dou sa kalougata kinia; ni sa qai tu vi ikodou na Yalo sa varokorokotakia kei na Yalo ni Kalou: sa vosavacacataki koya ko ira koya, a sa varokorokotakia koi ikodou. ¹⁵ Ia me kakua e dua vi ikodou me vakararawataki ni sa daulaba, se ni daubutako, se ni caka ca, se ni dauvavuca: ¹⁶ ia kevaka sa vararawataki ni sai tokani i Karisito, me kakua ni madua kinia; me varokorokotakia lia na Kalou e na vuku ni ka koya. ¹⁷ Ni sa yaco na gauna me vatekivu na vicudruvi vi ira na mataqali ni Kalou: ia kevaka ena vatekivu vi ita, a cava ena kenai vataotioti vi ira era sa yali ni talairawarawa ki nai tukutuku-vinaka ni Kalou? ¹⁸ Ia kevaka sa bula vadredre ko koya sa yalododonu, ena rairai evei ko koya sa yali ni lotu kei koya na tamatai valavala ca? ¹⁹ O koya koya me ra solia na yalodra e nai valavala vinaka ko ira era sa vararawataki me vaka na loma ni Kalou, vua na Vu ni ka kece lia, ka sa dina voki lia.