¹ Oi ikodou voki lia, na yalewa, dou vamalumalumutaki ikodou vi ira na watimudou; me rawai ira na watidra ko ira na yalewa e na nodra i valavala, ka yali e na vunau, kevaka sa so sa yali ni talairawarawa ki nai vunau; ² ni ra sa raicia na nomudou i valavala savasava kei na nomudou rere. ³ Ia me kakua ni nomudou nai ukuuku e taudaku, na tali drau ni ulu, kei nai ukuuku koula, kei na daramakia nai sulu; ⁴ ia na ka vayalo lia sa vuni, e na ka sa yali ni vuca rawa, na yalomalumalumu kei na yalomalua, koya sa ka talei sara e na mata ni Kalou. ⁵ Ni ra sa vaka kinia ko ira voki lia na yalewa yalosavasava e na gauna eliu, era sa vararavi vua na Kalou, ni ra sa vaiukuukutaki ira, ni ra sa dautalairawarawa vi ira na watidra: ⁶ me vaka sa talairawarawa ko Sera vi Eparaama, ka vatokai koya me turaga; ia dou sa luvena, ni dou sa caka vinaka tiko, ka yali ni rerevakia e dua na ka dauvivarerei. ⁷ Oi ikodou voki lia na tagane, dou tiko vata kei na watimudou me vaka na tiko vavuku, mo dou doka na yalewa, me vaka sa ka malumalumu, ni dou sai taukei vata e na loloma ni bula; me kakua ni tarovia na nomudrau masu. ⁸ Ia meu tinia, dou lomavata kece lia, dou ia na loloma vakai ikodou, dou vilomani me vaka na vitacini, dou yalololoma, dou lokomi: ⁹ kakua ni visausaumitakia na ca, se caka voki na vivasewasewani; ia dou dua tani, dou vosavakalougatatakia lia: ni dou sa kacivi me vakinia, mo dou rawatia na ka e vivakalougatataki, ¹⁰ Ia Ko koya sa vinakatia na bula, Ka sa via raicia na gauna vinaka, Me tarovia na yamena mai na ca, kei na tebenigusuna me kakua ni vosatakia na ka lasu: ¹¹ Me lesu tani mai na ca ko koya, ka caka na ka vinaka; Me vaqara na vacegu, ka muria sara. ¹² Ni sa wanonovi ira na tamata yalododonu na mata ni Turaga, Ka sa qara tu na daligana ki na nodra masu; Ia sa dua tani na mata ni Turaga vi ira sai valavala ca. ¹³ Ia ko cei ena vacacani ikodou, kevaka dou gumatua e na ka vinaka? ¹⁴ Ia kevaka dou sa vararawataki e na vuku ni valavala dodonu, dou sa kalougata kinia; ia dou kakua ni rerevakia na nodra dauvivarerei, se kidroa kinia: ¹⁵ ia dou varokorokotakia na Turaga na Kalou e na yalomudou: ka mo dou varau tiko mo dou tukunia vua na tamata yadua sa tarogi ikodou, na vu ni nuinui sa tu e na lomamudou e na yalomalumalumu kei na rere: ¹⁶ me vinaka lia na nomudou lewa-eloma; me yaco kinia, ni ra sa vosavacacataki ikodou, me vaka dou sa tamata caka ca, me ra kana madua ko ira era sa beitakia vailasu na nomudou i valavala vinaka vi Karisito. ¹⁷ Ni sa vinaka, kevaka sa loma ni Kalou me vakina, mo dou vararawataki ena vuku ni caka vinaka, ka me kakua e na vuku ni caka ca. ¹⁸ Ni sa vararawataki vadua na Karisito voki lia e na vuku ni valavala ca, o koya na caka dodonu e na vukudra na caka cala, me yadi ita kinia vua na Kalou, ni sa vamatei na yagona, a sa vabulai na yalona. ¹⁹ Ka qai voki lia kinia ko koya ka vunau vi ira na yalo era sa tiko e na vale ni vivesu; ²⁰ o ira era a talaidredre eliu, ni sa vosotia vadede na Kalou, ka sa dauwawa e na gauna i Noa, ni sa varautaki tiko na waqa, a ra lewe vica lia, io e lewe walu loa lia, sa vabulai kinia e loma ni wai. ²¹ Koya lia nai vatakarakara ni sa vabulai ita vakinia e na gauna koya na papitaiso e yali ni sa biu loa lia na dukadukali ni yago, ka ni sa tukuni rawa lia ni sa vinaka vua na Kalou na noda lewa-eloma, e na vuku ni sa tu cake voki mai na mate ko Jisu Karisito: ²² o koya sa qai ki lomalagi, a sa tiko e na liga i matau ni Kalou; ia sa vamalumalumutaki tu vi koya ko ira na agilose, kei ira era sa lewa, kei ira era sa kaukauwa.