¹ Au sa varotia vi ira nai talatala matua era tiko vi ikodou, niu sa matua voki lia koi au, ka sa dautukutuku e na ka ka vosotia na Karisito, ka sai taukei voki lia ni ukuuku ena varaitakia mai e na gauna maimuri: ² dou vakania na qele-ni-sipi ni Kalou era sa tiko vi ikodou, ka dou vatawana, kakua lia e na loma e vosotia, e na loma lia e vinakatia; kakua lia e na vuku ni yau vasisila, e na loma lia e rekitakia; ³ ia dou kakua ni valavala vaturaga vi ira sa nomudou i tavi, ia mo dou nodra i varau lia na qele ni sipi. ⁴ Ia ni na rairai mai nai Vatawa levu, dou na rawatia kinia nai sala vaiukuuku ena yali ni malai rawa. ⁵ Oi ikodou voki lia na cauravou, dou vamalumalumutaki ikodou vi ira na matua. Io, dou dui vamalumalumutaki ikodou vakai ikodou, ka dou vaisulu e na yalomalumalumu: ni sa vorati ira na viavialevu na Kalou, ia sa solia nai solisoli loloma vi ira na yalomalumalumu. ⁶ O koya koya mo dou qai vamalumalumutaki ikodou e ruku ni liga kaukauwa ni Kalou, me valevulevui ikodou cake ko koya e na gauna sa lokuci: ⁷ ka dou dainia vi koya na nomudou lomaocaoca kece lia, ni sa daunanumi ikodou ko koya. ⁸ Dou yalomatua, dou vatawa: sa viqaiyaki voli na nomudou meca na tevoro, me vaka na laioni sa tagi, a sa vaqara eso me tilomia: ⁹ dou vorati koya ni dou sa tu dei e na vabautia, ni dou sa kila sa vayacoria na ka rarawa vakinia vi ira na wekamudou era sa tiko voli e vuravura koya. ¹⁰ Ia na Kalou sa dau caka na loloma kece lia, o koya sa kacivi ikodou ki na nonai ukuuku yali ni mudu e na vuku i Karisito Jisu, ni dou sa vararawataki mada e na gauna eso, ena qai vavinakataki ikodou sara, mo dou vataudeitakia, mo dou vakaukauwataka. ¹¹ Me nona na lewa e na gauna kece ka yali ni mudu. Emeni. ¹² Au sa vola valailai ka caka nai varo, a sa yadia vi ikodou ko Silivenuse, o koya kau sa nanumia sa wekada dina, ia kau sa vadinadina ni sa loloma dina ni Kalou dou sa tu dei kinia. ¹³ Sa loloma yani vi ikodou nai soqosoqo lewe ni lotu, mai Papiloni, era sa digitakia vata ki ikodou; sa vakinia ko Marika na luvequ. ¹⁴ Dou dui vireguci vakai ikodou e na loloma. Me tu lia na vacegu vi ikodou kece lia sa tu vata kei Karisito Jisu. Emeni.