¹ Ena gauna koya sa rogocia ko Eroti na turaga nai rogorogo kei Jisu; ² a sa tukunia vi ira na nona tamata, Koya ko Joni na dauvipapitaisotaki; a sa tu cake voki mai na mate ko koya; o koya sa vu kinia vi koya na kaukauwa mana. ³ Ni sa tauri Joni eliu ko Eroti, a sa vesukia, ka dania ki vale ni vivesu ena vuku i Erotiasa, na wati i Filipi na tacina: ⁴ ni sa tukunia vua ko Joni, E yali ni tara mo drau viwatini kaya. ⁵ Ia ni sa via vamatea ko koya, sa rerevaki ira na lewe levu, ni ra sa vasama sa parofita ko koya. ⁶ Ia ni sa caka na magiti ni siga ni sucu i Eroti, sa meke e matadra na goneyalewa na luve i Erotiasa, a sa rekitakia ko Eroti. ⁷ O koya kinia sa yalatakia vua ko koya ka bubului kinia me soli vua na ka kece lia ena kerea. ⁸ Ia ni sa vavulici koya mada eliu ko tinana, sa tukunia ko koya, Solia mai vi au eke e dua na dari na ulu i Joni na dauvipapitaisotaki. ⁹ Sa qai rarawa na tui: ia sa tukunia lia me soli, ena vuku ni nona bubului, ena vukudra voki lia era sa kana vata kinia. ¹⁰ A sa talaki ko koya ka sa tamusukia na ulu i Joni ena vale ni vivesu. ¹¹ A sa yadi mai na uluna ena dua na dari, a sa soli vua na goneyalewa: ka sa yadia ko koya vi tinana. ¹² Sa qai qai mai ko iratou na nona tisapeli, a ratou sa yadia na yagona, ka bulutia; a ratou sa qai ka laki tukunia vi Jisu. ¹³ Ia ni sa rogocia ko Jisu, sa soko vatikitiki tani ena waqa ki na dua na vanua lala: ia ni ra sa rogocia ko ira na lewe levu, era sa taubale e vanua mai na vikoro ka muri koya. ¹⁴ A sa qai mai ko Jisu, ka raicia era sa lewe levu sara a sa lomani ira, a sa vabulai ira na nodra era tauvimate. ¹⁵ Ia ni sa yakavi mai, sa qai mai vei koya ko ira na nona tisapeli, ka tukunia, Oqo na vanua lala, sa kala na siga; mo vatalai ira yani na lewe levu, me ra qai ki na vikoro lalai, me ra volia kinia na kedra. ¹⁶ A sa tukunia vi ira ko Jisu, E yali ni yaga me ra qai, mo dou solia mai e dua na kedra. ¹⁷ Era sa qai tukunia vua, E yali lia vi kitou eke, e lima lia nai buli madrai, ka rua na ika. ¹⁸ A sa tukunia ko koya, Dou yadia mai vi au. ¹⁹ Sa qai vosa ko koya vi ira na lewe levu me ra tiko sobu ena vi co, a sa tauria nai buli madrai e lima, ki na ika e rua, a sa ta cake ki lomalagi, ka lotutakia, a sa dovia na vibuli madrai, ka solia vi ira na tisapeli, ia ko ira na tisapeli era sa solia vi ira na lewe levu. ²⁰ A ra sa kana kece lia, a ra sa mamau: a sa tomikia vata na vo ni ka sa dovi, a sa tinikarua nai su sa sinai kina. ²¹ Ia ko ira sa kania era sa lewe lima beka na udolu na tagane, ia ko ira na yalewa ki na gone era sa yali ni wili. ²² A sa qai varotia sara ko JIsu vi ira na nona tisapeli me ra vodokia na waqa me ra liutaki koya ki tai kadua, me sa vatalai ira mada yani na lewe levu ko koya. ²³ Ia ni sa vatalai ira oti yani na lewe levu, sa cabe taudua ko koya ki na ulu-ni-vanua me masu; ia ni sa yakavi mai, sa tiko dua loa lia kinia ko koya. ²⁴ A sa qai tiko e loma ni wasawasa na waqa, a suaigelegele ena ua: ni sa cagi leca. ²⁵ Ia e nai kava ni wase ni bogi sa qai mai vi ira ko JIsu, a sa qai voli e dela ni wai. ²⁶ Ia ni ra sa raicia ko ira na tisaplei, ni sa qai voli ko koya e dela ni wai, era sa kidroa, ka tukunia, Sa dua na yalo; a ra sa qoqolou, ni ra sa rere. ²⁷ A sa vosa sara vi ira ko Jisu, ka tukunia, Dou vacegu; koi au lia; dou kakua ni rere. ²⁸ A sa vosa vi koya ko Pita, ka tukunia, na Turaga, kevaka sai ikonu, kacivi au meu qai yani vi ikonu e dela ni wai. ²⁹ A sa tukunia ko koya, Qa lia mai. Ia ni sa sobu mai na waqa ko Pita, sa qai e na dela ni wai, me qai voki lia vi Jisu. Ia ni sa raicia sa kaukauwa na cagi, sa qai rere; ³⁰ ia ni sa raicia sa kaukauwa na cagi, sa qai rere; ia ni sa vatekivu me lutu dromu, sa kaci sara, ka tukunia, Na Turaga, ni vabulai au. ³¹ Sa qai dodokia sara na ligana ko JIsu, a sa tauria, ka tukunia vua, O iko sa lailai na nomu vabautia, O sa vatikitikiqa ena vuku ni cava? ³² Ia ni sa rau sa vodo ki waqa, sa ruru na cagi. ³³ Ia ko ira na sa tiko mai waqa, ka tukunia, Sa dina sara lia ikonu sa Luve ni Kalou. ³⁴ A ra sa qai ki tai kadua. a ra sa yaco ki na vanua Kenisareti. ³⁵ Ia ni ra sa kilai koya ko ira na tamata mai na yasana ko koya, era sa talatala ki na yasana kece lia sa vavolivolitia, a ra sa yadi ira kece lia mai vua sa tauvimate; ³⁶ a ra sa masuti koya me ra tara loa lia na tutu ni nonai sulu, a ra sa bula sara ko ira kece lia sa tara.