¹ Ena siga koya sa qai tani mai vale ko Jisu, ka qai ki tiko sobu e matasawa. ² A sa lewe levu sara era sa soqoni vata kei koya, a sa vodoka kinia e dua na waqa ko koya, ka tiko sobu: a sa tu kece lia mai matasawa na lewe levu. ³ A sa levu na ka sa vosatakia vi ira ko koya ena vosa vatautauvata, ka tukunia: Raicia sa dua na dauvikaburaki; ⁴ ia ni sa kabukaburaki tiko, sa lutu eso ena tutu ni sala, a sa qai mai na manumanu vuka ka kania. ⁵ A sa lutu eso ki na vanua vivatu, sa yali ni levu cake kinia na qele: a sa tubu cake vatotolo sara, ni sa yali ni vavaku na kena qele: ⁶ ia ni sa cabe na siga, sa malai; ia ni sa yali na wakana, sa raqosa sara. ⁷ A sa lutu eso ki na vi wa-vavotona; a sa tubu cake na viwa-vavotona, ka varugutia. ⁸ A sa lutu eso ki na vanua vinaka, a sa vuavua vinaka, sa vua i drau eso, a sa onosagavulu eso, a sa tolusagavulu eso. ⁹ O koya sa vadaligana me rogocia, me mani rogocia sara. ¹⁰ Sa qai qai mai ko ira na tisapeli, ka tarogi koya, O sa vosa tiko lia vi ira ena vosa vatautauvata ena vuku ni cava? ¹¹ Sa qai vosa ko koya, Ni sa soli vi ikodou mo dou kila na veika vuni ni matanitu valomalagi, ia ka yali lia ni soli vi ira. ¹² Ni sa tu vua na tamata e dua na ka, ena qai soli valevu sara lia vua ka levu na nona; ia na tamata sa yali ni tu vua e dua na ka , ena qai yadi tani sara lia mai vua na ka sa tu vua. ¹³ O koya koya kau sa vosa kinia vi ira ena vosa vatautauvata: ni ra sa raicia ka yali ni raicia; a ra sa rogocia ka yali ni rogocia, ka lecavia tu. ¹⁴ Ia sa vayacoria kinia vi ira na parofisai i Aisea, ka vaka, Dou na daurogocia tiko lia, ka lecavia tu; Ia dou na dau raicia tiko lia, ka yali ni raicia; ¹⁵ Ni sa uro mai na lomadra na tamata koya, A sa didivara na daligadra, A sa bobo na matadra; De dua na siga ena rai na matadra. Ka rogo na daligadra, Ka kila na lomadra, A ra saumaki mai, Ia ka'u na vabulai ira. ¹⁶ A sa kalougata na matamudou, ni dou sa raicia, vata kei na daligamudou, ni dou sa rogocia. ¹⁷ Niu sa tukunia vaidina vi ikodou, Era lewe levu na parofita vata kei na tamata yalododonu era a via raicia na ka dou sa raicia, ka ra na yali ni raicia; ka rogocia na ka dou sa rogocia, ka ra a yali ni rogocia. ¹⁸ O koya mo dou qai rogocia na vosa vatautauvata ni dauvikaburaki: ¹⁹ Ni sa dua e rogocia na vosa ni matanitu, ka lecavia tiko, sa qai qai mai na vu-ni-ca, a sa kovea na ka sa kaburaki ki lomana. Sai koya lia koya sa kaburaki ena tutu ni sala. ²⁰ Ia ko koya sa kaburaki ena vanua vivatu, sai koya lia koya sa rogocia na vosa, a sa vabautia sara ena reki. ²¹ ia ni sa yali na wakana e lomana, sa tu dede valailai lia: ia ni sa tubu na rarawa, se na vivacacani ena vuku ni vosa, sa tarabe sara lia. ²² Ia ko koya sa kaburakia ena viwa-vavotona, sai koya lia koya sa rogocia na vosa: ia na lomaocaoca ena vuku ni vuravura koya, kei nai yau e dauvivakaisini, sa varugutia na vosa, a sa yali kinia ni vua. ²³ Ia ko koya sa kaburaki ena vanua vinaka, sai koya lia koya sa rogocia na vosa, a sa kila na kenai balebale; a sa vua, ka vuai drau eso, sa onosagavulu eso, ka sa tolusagavulu eso. ²⁴ Sa dua voki na vosa vatautauvata sa tukunia vi ira ko koya, ka tukunia, Sa vatautauvatakia na matanitu valomalagi kei na dua na tamata sa kaburakia na sila vinaka ena nona were; ²⁵ ia ni ra sa moce ko ira na tamata, sa qai mai na nona meca ka kaburakia vata na sila ca e loma ni witi, a sa qai qai yani. ²⁶ Ia ni sa tubu mai na sila ka vua, sa qai rairai voki lia na sila ca. ²⁷ Sa qai mai vua na kenai taukei ko ira na nona tamata, ka tukunia vua, O sa yali saka lia ni kaburakia na sila vinaka ena nomu were? sa qai yadi mai vi na sila ca? ²⁸ Sa qai tukunia vi ira ko koya, A ka koya sa caka e dua na meca. A ra sa tukunia vua ko ira na tamata, O sa vinakatia beka me kitou qai ki kumunia vata koya? ²⁹ A sa tukunia ko koya, Tei kakua mada, de dou cavurakia voki lia na witi ni dou kumunia vata na sila ca. ³⁰ dainia lia me rau tubu vata ruarua me tei cava mada na yabaki: ia ni sa cava na yabaki ka'u na tukunia vi ira na dau tamusukia, Dou kumunia vata mada na sila ca, ka vaucia ena vivau me visa: ia dou kumunia vata na witi ki na noqu lololo. ³¹ Sa dua voki na vosa vatautauvata sa tukunia vi ira ko koya, ka tukunia, Sa tautauvata na matanitu valomalagi kei na dua na sore ni musita, o koya sa yadia e dua na tamata, ka tea ena nona were: ³² ia ko koya sa lailai sobu ena sore ni kau kece lia; ia ni sa tubu cake, sa levu cake ena kena mataqali ko ya, a sa yaco me yadi dina, a sa qai ki ro ena tabana na manumanu vuka. ³³ Sa dua voki na vosa vatautauvata sa tukunia vi ira ko koya: Sa tautauvata na matanitu valomalagi kei na leveni, sa tauria e dua na yalewa, ka vunia e loma ni madrai droka e tolu nai varau, me sa valevenitakia kece mada lia. ³⁴ Na ka kece lia koya sa tukunia ko Jisu kivei ira na lewe levu ena vosa vatautauvata; a sa yali ni vosa loa lia vi ira, sa vosavatautauvata tiko lia: ³⁵ o koya lia koya sa vayacoria kinia na vosa sa tukunia na parofita, ni sa tukunia, Au na vosa lia ena vosa vatautauvata; Au na tukunia eso na ka sa vuni tu mai na gauna sa caka kinia ko vuravura. ³⁶ Sa qai talai ira yani na lewe levu ko Jisu, ka curu ki vale: a sa qai mai vua ko ira na nona tisapeli, ka tukunia, Ni vamacalatakia mai vi kitou na vosa vatautauvata ni sila ca mai na were. ³⁷ A sa vosa ko koya, ka tukunia vi ira, O koya lia sa kaburakia na sila vinaka, ko ya na Luve ni tamata: ³⁸ ia na were ko vuravura; ia na sila ca ko ira na luve ni vu-ni-ca: ³⁹ ia na meca sa kaburakia sai koya na tevoro: ia na yabaki nai vataotioti ki vuravura: ia na dautamusukia ko ira na agilosi. ⁴⁰ Ia me vaka sa kumunia vata na sila ca ka visa ena buka; ena vakinia enai vataotioti ki vuravura koya: ⁴¹ ena talai ira yani na nona agilosi na Luve ni tamata, me ra soqonia vata mai na nona matanitu na ka kece lia sa dauvivacalai, ki ira sa caka tiko na ka ca; ⁴² ia era na daini ira ki na lovo ni bukawaqa; era na dautagi kinia, ka vasequruquru bati. ⁴³ Era na qai serau na tamata yalododonu, me vaka lia na siga, ena matanitu ni Tamadra. O koya sa vadaligana, me mani rogocia sara. ⁴⁴ Sa dua voki, sa tautauvata na matanitu valomalagi ki nai yau sa vuni tu ena dua na were; ka sa dua na tamata sa raicia, ka yali ni tukunia, ia ni sa rekitakia, sa qai ki volitakia na ka kece lia sa tu vua, a sa volia na were ko ya. ⁴⁵ Sa dua voki, sa tautauvata na matanitu valomalagi kei na tamata dauvivoli, sa vaqara eso na mata ni civa vinaka: ⁴⁶ ia ni sa kunea e dua na mata ni civa talei sara, sa qai ka volitakia na ka kece lia sa tu vua, ka sa volia na ka koya. ⁴⁷ Sa dua voki, sa tautauvata na matanitu valomalagi kei na lawa-ni-yavi, sa viritakia ki wai: a sa rawa kinia eso mai na vimataqali kece lia. ⁴⁸ ia ni sa sinai, era sa yavia ki matasawa, a ra sa tiko sobu, ka tugania na kena vinaka ki na sova, ka dainia tani na kena ca. ⁴⁹ Ena vakinia enai vataotioti ki vuravura: era na qai mai na agilosi, ka tawasei ira tani na tamata ca mai vi ira na yalododonu, ⁵⁰ ka daini ira laivi tu ki na lovo ni bukawaqa: era na dautagi kinia, ka vasequruquru bati. ⁵¹ Dou sa kila nai balebale ni ka kece lia koya? Era sa tukunia vua, Io. ⁵² Sa qai tukunia vi ira ko koya, Ia na vunivola kece lia sa vatavulici ena ka ni matanitu valomalagi, sa tautauvata ki ira na tamata sa taukenia e dua na vale, ko koya sa yadia mai na nona lololo na veika vou kei na veika makawa voki lia. ⁵³ A sa yaco, ni sa vaotia ko JIsu na vosa vatautauvata kece koya,sa qai tani mai na vanua koya. ⁵⁴ Ia ni sa tadu ki na nona vanua, sa vavulici ira ko koya ena nodra vale ni lotu, a ra sa kurabui kinia, ka tukunia, E rawatia mai vi ko koya na vuku va koya, ki na cakacaka mana koya? ⁵⁵ sa yali lia ni luve ni matai ko koya? sa yali lia ni yacai i tinana ko Meri? ki na tacina ko Jemesa vata kei Josefa, vata kei Saimoni, vata kei Jutasa? ⁵⁶ kei na ganena, eratou sa yali lia ni tiko vata kece kei ita? sa qai rawatia mai vi ko koya na ka kece lia koya? ⁵⁷ A ra sa tarabe ena vukuna. A sa tukunia vi ira ko Jisu, Sa varokorokotakia na parofita ena vivanua tani, ia sa yali lia ena nona vanua se nona vale. ⁵⁸ Ia ka yali ni caka mai keri ko koya e levu na cakacaka mana, ni ra sa yali ni vabautia.