¹ Ena gauna koya sa qai ko Jisu e loma ni viwere ni sila ena siga ni vacecegu, a sa viakana ko ira na nona tisaipeli, ka vatekivu me dolokia na visola ni sila, ka kania. ² Ia ni sa raicia ko ira na Farisi, era sa tukunia vua, Raicia, sa caka ko ira na nomu tisaipeli na ka e yali ni tara me caka ena siga ni vacecegu. ³ A sa tukunia vi ira ko koya, Dou sa yali beka ni wilikia na ka sa caka ko Tevita, ni sa via kana, ko koya ki ira sa tiko vata kaya. ⁴ Ni sa curu ko koya kina vale ni Kalou, ka kania na madrai dauraici, koya sa yali ni tara vua me kania, se vi ira sa tiko vata kinia, vi ira dua loa lia na bete? ⁵ Se dou a yali beka ni wilikia ena vunau, ni ra sa vacacana na siga ni vacecegu ko ira na bete ena valenisoro, ka ra sa yali ni cala kinia? ⁶ Ia ka' u sa tukunia vi ikodou, sa dua eke sa uasivi cake ena vale ni soro. ⁷ Ia kevaka dou a kila na kenai balebale ni vosa koya, Au sa vinakatia na yalololoma, ka yali nai soro, dou a yali ni beitaki ira era sa yali ni cala. ⁸ Ni sa Turaga voki lia ni siga ni vacecegu na Luveni tamata. ⁹ A sa qai tani mai na vanua koya ko koya, ka curu ki na nodra valenilotu. ¹⁰ Ka raicia, sa tiko kinia e dua na tamata sa malai na ligana. A ra sa tarogi koya, sa tara beka me caka na vivabulai ena siga ni vacecegu, se yali? ka ni ra via beitaki koya. ¹¹ A sa tukunia vi ira ko koya, O cei vi ikodou, kevaka e dua na nona sipi sa lutu kina davuke ena siga ni vacecegu, ena yali ni tauria, ka tuberia cake mai? ¹² Ka vaevei na kena uasivi cake na tamata ena sipi! O koya lia koya sa tara kinia me caka na ka vinaka ena siga ni vacecegu. ¹³ Sa qai tukunia ko koya vua na tamata, Dodokia mai na ligamu. A sa dodokia yani, a sa vabulai, ka yaco me vaka lia na ligana kadua. ¹⁴ Sa ra qai curu ki tuba na Farisi, a ra sa bosea, se ra na vamatei koya vaevei. ¹⁵ Ia ni sa kila ko Jisu, sa qai tani mai na vanua koya: a sa muri koya na lewe levu, ka sa vabulai ira vayadua lia ko koya: ¹⁶ Ka sa varotia vi ira me ra kakua ni tukuni koya: ¹⁷ O koya kinia sa vayacori kinia na vosa sa tukunia ko Aisea na parofita, ka tukunia. ¹⁸ Raicia na noqui talatala, ko koya ka'u digitakia, Na noqu gone ni toko, au sa vinakati koya valevu ena vuni lomaqu: Au na solia vi koya na noqu Yalo Tabu, ia ena tukunia ko koya na lewa dodonu vi ira na vimatanitu tani. ¹⁹ Ena yali ni vileti, se domolevu, Ena yali e dua ena rogocia na domona ena saqata-ni-koro: ²⁰ Ena yali ni musukia na gasau sa bibivoro ko koya, se bokocia na wa-ni-cina e kubou lia, Ka me tala mada yani na lewa dodonu me gumatua: ²¹ A ra na vararavi ki na yacana ko ira na vimatanitu tani. ²² Sa qai yadi mai vi koya e dua sa curumia e dua na tevoro, sa mataboko, ka galu voki lia: a sa vabulai koya ko koya, ia sa vosa ka rai kinia ko koya sa mataboko ka galu. ²³ A sa kurabui ko ira kece lia na lewe levu, ka tukunia, O koya koya na luvei Tevita, se yali? ²⁴ Ia ni ra sa rogocia ko ira na Farisi, era sa tukunia, o koya lia koya e yali ni tovoci ira na tevoro ena ka tani, ena kaukauwa lia i Pielisipupi na nodra turaga na tevoro. ²⁵ A sa kila na nodra vanananu ko Jisu, ka tukunia vi ira, A matanitu yadua sa veisei vakai koya, ena varusai, kei na koro yadua se na vale sa vivala vakai koya, ena yali ni tudei. ²⁶ Ia kevaka sa tovoci Setani ko Setani, sa qai vivala vakai koya lia, ena qai tudei vaevei na noa matanitu? ²⁷ Ia kevaka ka'u tovoci ira na tevoro ena kaukawa i Pielisipupi, sa tovoci ira ena kaukauwa i cei ko ira na kai nomudou? o koya lia koya era na valewai ikodou kinia. ²⁸ Ia kevaka tovoci ira na tevoro ena kaukauwa ni Yalo ni Kalou, sa qai yaco dina vi ikodou na matanitu ni Kalou. ²⁹ Se na rawatia vaevei e dua me curumia na vale ni qaqa, me kovea na nonai yaya, kevaka lia ena yali ni vesukia mada na qaqa ena qai kovea e muri na nonai yau. ³⁰ O koya lia sa yali ni totaki au, sa to tani; ia ko koya sa yali ni kumunia vata kei au sa dui daidai. ³¹ O koya koya, kau sa tukunia vi ikodou sa rawa lia me ra kakua ni cudruvia na tamata ena vuku ni nodra valavalaIa ca, ki na nodra vosa ca kece lia; ia sa yali ni rawa me ra kakua ni cudruvia na tamata era sa vosavacacatakia na Yalo Tabu. ³² Ia ko koya yadua sa vosavacacatakia na Luve ni tamata ena rawa me kakua ni cudruvi kinia: ia ko koya yadua sa vosavacacatakia na Yalo Tabu, ena yali sara ni rawa me kakua ni cudruvia, ena gauna koya, se na gauna ena muri mai. ³³ Dou valewa ni vinaka na kau, ka vinaka voki lia kinia na vuana: se valewa ni ca na kau, ka ca lia kinia na vuana: ni sa kilai lia na kau ena vuana. ³⁴ Oi ikodou na kawa ni gata! dou na rawatia vaevei, ni dou sa tamata ca, mo dou vosatakia na ka vinaka? ni sa vosatakia na gusudra na ka sa oso valevu kinia na lomada. ³⁵ A tamata vinaka sa yadia mai na ka vinaka mai na lololo vinaka ni lomana; vata kei na tamata ca sa yadia mai na ka ca mai na lololo ca. ³⁶ Ia ka'u sa tukunia vi ikodou, A vosa ca vayadua lia era na cavutia na tamata, era na tarogi kinia ena siga ni lewa: ³⁷ ni ko na vadonui ena vuku ni nomu vosa, ka ko na cudruvi voki lia ena vuku ni nomu vosa. ³⁸ Sa qai vosa eso na vunivola vata kei na Farisi, ka tukunia, Vavuvuli, kitou sa via raicia edua nai vatakilakila mai vi iko. ³⁹ A sa vosa ko koya, ka tukunia vi ira, Sa dauvaqara nai vatakilakila nai tabatamata ca kai valavala vatani: ia ena yali nai vatakilakila me soli kinia, nai vatakilakila lia i Jona na parofita: ⁴⁰ ia me vaka ka siga tolu ka bogi tolu ko Jona ena kete ni ika levu; ena siga tolu ka bogi tolu vavoki lia kinia na Luve ni tamata ena loma ni qele. ⁴¹ Era na tucake ena vilewai na kai Ninive ka vadinadinatakia na nodra cala nai tabatamata koya, ni ra a vivutuni ena vunau i Jona; ka raica, sa dua eke sa uasivi vi Jona. ⁴² Ena tucake na radi ni ceva ena vilewai ka vadinadinatakia na nodra cala nai tabatamata koya, ni sa qai mai o koya ena yasana vayawa sara e vuravura me rogocia na vuku i Solomoni; ka raicia sa dua eke sa uasivi vi Solomoni. ⁴³ Ia ni sa qai tani ena tamata na yalo velavela, sa viqaiyaki voli ena vanua dravuisiga, ni vaqara nai vavacegu a sa yali ni raicia: ⁴⁴ Sa qai tukunia ko koya, au na lesu voki ki na noqu vale kau a qai tani mai kinia; ia ni sa yaco yani sa raicia ni sa lala tu, sa tavirakia, ka ukutakia. ⁴⁵ Sa qai qai ko koya, ka yadia vata kaya e lewe vitu voki na yalo sa usaivi vi koya ena ca, a ratou sa curumia ka tiko kinia a sa ca valevu i muri na tamata koya, ka ca valailai e liu. Ena va voki lia kinia vi ira na i tabatamata ca koya. ⁴⁶ Ia ni sa vosa tiko lia o koya vi ira na lewe levu, raicia, sa tu e tuba na tinana kei na tacina, a ratou sa via vosa vua. ⁴⁷ Sa qai tukunia vua e dua raicia sa tu e tuba na tinamu kei iratou na tacina eratou sa via vosa vi iko. ⁴⁸ Sa qai vosa ko koya ka tukunia vi koya sa tukunia vua, O cei na tinaqu? se ko cei ko ratou na taciqu? ⁴⁹ Sa dodokia na ligana vi ira na nona tisapeli ka tukunia, Raicia na tinaqu kei na taciqu! ⁵⁰ O koya yadua ena caka na loma i Tamaqu sa tiko mai Lomalagi, sai koya koya na taciqu vata kei na ganequ vata kei na tinaqu.