¹ Ia ko Jisu ni sa vaotia na nona varoti ira na nona tisapeli e lewe tinikarua, sa qai tani mai na vanua koya , ka qai ki vatavuvuli ka vunau ena nodra vikoro. ² Ia ni sa rogocia ko Joni mai na vale ni vivesu na cakacaka i Karisito, sa qai tala e lewe rua na nona tisapeli. ³ me tukunia vua, O iko beka ko Koya e qai mai, se da warakia e dua tani voki? ⁴ A sa vosa ko JIsu, ka tukunia vi rau, Drau qai, ka tukunia vi Joni na veika drau sa rogocia ka raicia. ⁵ Era sa rai na mataboko, ka qai na lokiloki, sa vasavasavataki na vukavuka, ka rogo na didivara: sa vaturi cake voki na mate sara, a sa vunautakia nai tukutuku vinaka vi ira na dravudravua. ⁶ A sa kalougatia ko koya ena yali ni tarabe ena vukuqu. ⁷ Ia ni rau sa qai tani, sa tukunia ko Jisu vi ira na lewe levu ena vuku i Joni. A cava dou a qaivia ki na vikau mo dou raicia? a gasau lia sa yavalati ena cagi? ⁸ ia ka cava dou a qaivia mo dou raicia? a tamata lia sa vaisulu enai sulu malumalumu? raicia, ko ira sa vaisulu enai sulu malumalumu, era sa tiko ena nodrai vivale ni tui. ⁹ Ia ka cava dou sa qaivia mo dou raicia? a parofita lia? io, au sa tukunia vi ikodou, e dua sa uasivia na parofita. ¹⁰ Ni sai koya ka volai vakoya, Raicia, au sa tala na noqu talai me liu e matamu, Ena caramakia ko koya, na nomu sala e matamu. ¹¹ Au sa tukunia vaidina vi ikodou, Sa yali ni tubu e dua vi ira sa sucu mai na yalewa me uasivi vi Joni na dauvipapitaisotaki; ia ko koya sa lailai sara e na matanitu valomalagi sa uasivi vi koya. ¹² Ia mai na gauna i Joni na dauvipapitaisotaki ka yacovia na siga koya, sa rawa na matanitu valomalagi ena gugumatua, ia ko ira sa gumatua sara, era sa taukenia ¹³ Ni ra sa dauvatavuvuli kece lia na parofita kei na vunau ka yacovia na siga i Joni. ¹⁴ Ia kevaka dou sa via vabautia, sai koya lia o Ilaija, ko koya sa dodonu me qai mai. ¹⁵ O koya sa vadaligana me rogocia, me mani rogocia sara lia. ¹⁶ Ia ka cava me'u vatautauvatatakia kinia nai tabatamata koya? Sa tautauvata kei ira na gone sa tiko ena rara ni vivoli, ka kaci yani vi ira era sa tiko vata kei ira. ¹⁷ ka tukunia, Kitou a uvu bitu vi ikodou, ka dou a yali ni meke, kitou a tagi vi ikodou, ka dou a yali ni tagiyaso. ¹⁸ Ni sa qai mai ko Joni ka yali ni daukana se daugunu, a ra sa tukunia, Sa tiko vua e dua na tevoro. ¹⁹ Sa qai mai na Luve ni tamata, a sa kana lia ka somi, a ra sa tukunia, Raicia, a tamata daukana, a ra sa dau somi waini, a nodrai tau era kumunia nai vacavacava, kei ira voki lia na tamata i valavala ca. Ia sa vadonuya ena vuku ko ira na luvena. ²⁰ Sa qai vatekivu ko koya me vunaucia na vikoro ka caka kinia e levu na nona cakacaka-mana, ni ra sa yali ni vivutuni: ²¹ E ca vi iko, Koreseni! e ca vi iko, Peciseita! ke sa caka mai Taia vata kei Saitoni na veika mana ka caka vi ikodrau, ke rau sa vivutuni makawa ena sulu taga kei na dravusa: ²² au sa tukunia voki lia vi ikodrau, Ena ca valailai ko Taia vata kei Saitoni ena siga ni lewa, koi ikodrau, drau na ca valevu. ²³ O iko voki lia, Kapenaumi, ko sa laveti cake lia ki lomalagi? ko na dai sobu voki ki etesi: ia ke sa caka mai Sotama na veika mana ko caka lia vi iko, ke sa tu lia ka yacovia na siga koya. ²⁴ Au sa tukunia lia vi iko, Ena ca valailai ko Sotoma e na siga ni lewa, ko iko, ko na ca valevu. ²⁵ Ena gauna ko ya sa vosa kinia ko Jisu, ka tukunia, Au sa vavinavinaka vi ikonu Tamaqu, na Turaga ni lomalagi ki vuravura, ni ikonu sa vunia na veika koya vi ira na vuku ki na yalomatua a sa vatakila lia vi ira na gone lalai. ²⁶ sai koya lia, Tamaqu, ni sa vinaka e matamuni me vakoya. ²⁷ Sa solia mai vi au ko Tamaqu na ka kece lia: ia ka yali e dua voki e kila na Luvena, a Tamana dua loa lia, ki koya sa vinakatia na Luvena me vatakilai koya vua. ²⁸ Dou qai mai vi au, koi ikodou vayadua lia sa oca ka colatia nai colacola bibi, ia kau na vacegui kimudou. ²⁹ Vataqaria vi ikodou na noqui vua, ka vuli vi au, ni'u sa yalomalua ka yalomalumalumu: dou na kunea kinia na vacegu ni yalomudou. ³⁰ Ni sa rawarawa na noqui vua, ka mamada na noqui colacola.