¹ A sa kacivi ira mai na nonai tisapeli era lewe tinikarua ko koya, a sa solia vi ira na kaukauwa me ra rawai ira na yalo velavela me ra tovoci ira, ka vabula kece lia na mate, ki na malumalumu kece lia. ² Ia koya na yacadra nai apositolo e lewe tinikarua: A kenai matai, ko Saimoni, a yacana voki lia ko Pita vata kei Adriu na tacina; ko Jemesa na luvei Sepete vata kei Joni na tacina: ³ ko Filipi vata ki Pacolomiu; ko Tomasi vata kei Maciu na dau kumunia nai vacavacava; ko Jemesa na luve i Alifio vata kei Cateo; ⁴ ko Saimoni e dua vi ira sa vatokai Na gumatua vata kei Jutasa Isikarioti, ko koya sa soli koya yani. ⁵ Sa talai ira na lewe tinikarua koya o Jisu, a sa varotia vi ira ka tukunia, Dou kakua ni qai ena nodra sala na vimatanitu tani, kakua voki lia ni curu ki na dua na nodra koro na kai Samaria: ⁶ ia dou qai lia vi ira na sipi ni mataqali ni Isireli era sa yali tu. ⁷ Ia ni dou sa qai tiko, mo dou vunau, ka tukunia, Sa voleka mai na matanitu valomalagi. ⁸ Dou vabulai ira sa tauvimate, vasavasavataki ira na vukavuka, vaturi ira cake voki na mate sara, tovoci ira na tevoro: dou a rawatia loa lia, mo dou solia loa lia. ⁹ Kakua ni yadia na koula, se na siliva, se na parasa, ena nomudou taga; ¹⁰ se na taga ni vaqa ena gaunisala, se rua nai curucuru, se nai vava, se nai titoko: ni sa dodonu me soli vua na tamata daucakacaka na kena kakana. ¹¹ Ia na koro ki na koro lailai vayadua lia dou sa curu kinia, taro lia se ko cei sa yaga kinia; ka qai tiko kaya ka yacovia na nomudou qai tani. ¹² Ia ni dou sa curu ki na vale, dou kidavakia: ¹³ ia kevaka sa yaga na vale ko ya, me yaco kinia na nomudou vivacegui: ia kevaka sa yali ni yaga, me suka voki vi ikodou na nomudou vivacegui. ¹⁴ Ia ko koya sa yali ni vacegui ikodou, se rogocia na nomudou vosa, ni dou sa qai tani ena vale se na koro koya, kureitakia laivi na kuvu-ni-soso mai na yavamudou. ¹⁵ Au sa tukunia vaidina vi ikodou, Ena ca valailai na vanua ko Sotoma kei Komora ena siga ni lewa, ena ca valevu na koro koya. ¹⁶ Raicia, au sa talai ikodou yani me vaka lia na sipi ena kedra maliwa na wolifa: o koya mo dou qai vuku me vaka lia na gata, ka yalovinaka me vaka lia na ruve. ¹⁷ Ia dou qarauni ikodou mai vi ira na tamata, ni ra na soli ikodou yani ki na matavilewai, a ra na vakanakuitaki ikodou ena nodra vivalenilotu; ¹⁸ ia dou na yadi ki na matadra na kovana kei na tui ena vukuqu , mei vadinadina vi ira, vi ira voki lia na vimatanitu tani. ¹⁹ Ia ni ra sa soli ikodou yani, kakua ni lomaocaoca se dou na vosa vaevei se cava dou sa tukunia ni na soli vi ikodou ena tiki-ni-siga ko ya na ka mo dou vosatakia; ²⁰ ni dou na yali ni vosa koi ikodou , ia ena vosa koya na Yalo ni Tamamudou, ena lomamudou. ²¹ Ia era na dui soli ira yani na vitacini me vamatei vata kei na tamana na luvena: ia era na tu cake na gone vi ira na nodra qase ka vavunia na nodra mate. ²² ia dou na cati vi ira na tamata kece lia ena vuku ni yacaqu: ia ko koya ena vosotia me yacovia nai vataotioti, ena vabulai. ²³ Ia ni ra vacacani ikodou, ena dua na koro, dou tuba ki na dua tani: ni'u sa tukunia vaidina vi ikodou. Dou na yali ni vaotia na vikoro e Isireli, ena qai mada mai na Luve ni tamata. ²⁴ Sa yali na tisapeli me uasivi vua na nonai vavuvuli, se na tamata vua na nona turaga: ²⁵ sa rautia na tisapeli, kevaka erau sa tautauvata ki na nona vavuvuli, vua voki lia na tamata kevaka erau sa tautauvata ki na nona turaga. Kevaka era vatoka nai tukutuku nai taukei ni vale ko Pielisipupi, era na caka valevu cake vi ira na nona lewe ni vale! ²⁶ O koya mo dou kakua ni rerevaki ira: ni sa yali na ka vuni me na yali ni varairaitakia; se tabogone na yali ni kilai. ²⁷ A ka ka'u tukunia vi ikodou ena butobuto, dou tukunia ena rarama: ki na ka dou rogocia lo ena daligamudou, vunautakia ena dela ni vale. ²⁸ Ia kakua ni rerevaki ira era sa vamatea na yago, a ra yali ni rawatia me ra vamatea na yalo, ia dou rerevaki koya lia sa rawatia me va rusa na yalo ki na yago voki lia mai eli. ²⁹ Sa yali lia ni volitakia na separo e rua ena dua na facigi? ia ka yali e dua vi rau ena lutu loa lia ki na qele, me tabogo vua na Tamamudou. ³⁰ A sa wiliki vayadua lia na drau ni ulumudou. ³¹ O koya mo dou qai kakua ni rere: dou sa uasivi cake vi ira na separo e levu. ³² O koya yadua ena tukuni au ena matadra na tamata, au na tukuni koya voki lia e na mata i Tamaqu sa tiko mai lomalagi. ³³ Ia ko koya yadua ena cakitaki au ena matadra na tamata, au na cakitaki koya voki lia ena mata i Tamaqu sa tiko mai lomalagi. ³⁴ Dou kakua ni vakasama ni'u sa qai mai me'u yadia mai ki vuravura na vivinakati; au sa yali ni qai mai me'u yadia mai na vivinakati, ai selewau lia. ³⁵ Ni ka'u sa qai mai me tawasei rau na vitamani-tagane vata kei na vitinani-yalewa, kei na vivugoni-yalewa voki lia. ³⁶ Ia ena nona meca na tamata ko ira na nona lewe-ni-vale. ³⁷ O koya sa loloma valevu vi tamana se tinana ka valailai vi koya, sa yali ni yaga vi ikonu, ia ko koya sa loloma valevu vua na luvena tagane se na luvena yalewa ka valailai vi au, sa yali ni yaga vi au. ³⁸ Ia ko koya sa yali ni colatia na nona kauveilatai, ka muri au, sa yali ni yaga vi au. ³⁹ O koya sa maroroya na nona bula, ena vayalia; ia ko koya sa vayalia na nona bula ena vukuqu, ena maroroya ⁴⁰ O koya sa vacegui ikodou sa vacegui au; ia ko sa vacegui au sa vacegui koya sa talai koya mai. ⁴¹ O koya sa vaceguya e dua na parofita, ena rawatia na kenai sau; ko koya sa vaceguya na tamata yalododonu ni sa vatokai me tamata yalododonu, ena rawatia na kena i sau. ⁴² ia ko koya ena solia vua e dua vi ira koya era sa lailai lia na bilo wai liliwa me somia, ni sa vatokai me tisapeli, au sa tukunia vaidina vi ikodou, Ena yali sara ni yali vua na kenai sau.