¹ Ia ni sa qai yani ko Jisu, raicia e dua na tamata sa sucu mataboko. ² A sa tarogia ko ira na nona tisaipeli, ka tukunia, "Vavuvuli, ko cei sai valavala ca, a tamata koya, se tamana ki tinana, sa sucu mataboko kinia ko koya?" ³ Sa tukunia ko Jisu, "Sa yali ni valavala ca ko koya koya, se tamana se tinana, me vatakilai lia na cakacaka ni Kalou ena vukuna. ⁴ Sa dodonu me da caka na cakacaka i koya sa talai au mai, ni sa siga toka: sa voleka mai na bogi, sa yali ni cakacaka rawa kinia e dua na tamata. ⁵ Ni'u sa tiko e vuravura, au sa rarama ki vuravura." ⁶ Ni sa vosa va koya ko koya, sa kasuvia na qele, ka ulia vata na soso kei na kasu, a sa boroya kinia na mata ni tamata mataboko, ⁷ a sa tukunia vua, "Qai ki tavoi enai silisili ko Sailoama" ( a kenai balebale, Sa talaki.) A sa qai yani, ka tavoi, ka sa rai rawa na matana ka lesu voki mai ni sa rai na matana. ⁸ Era sa qai tukunia kinia na lewe ni koro, kei ira sa raici koya e lia ni sa daukerekere, "Sa yali ni koya koya sa dautiko ka daukerekere?" ⁹ Sa tukunia eso, "Sai koya koya:" ka so tani, "E yaga, isa sa vataki koya" sa tukunia ko koya, "Sai au lia." ¹⁰ Era sa qai tukunia vua, "Sa rai rawa vaevei na matamu?" Sa tukunia ko koya, ¹¹ "Na tamata sa vatokai ko Jisu sa ulia na soso, ka boroya na mataqu, ka tukunia vei au, "Qai ki Sailoama, ka tavoi: ia ka'u a laki tavoi, ka'u sa qai rawa. ¹² Era sa qai tukunia vua, "Evei ko koya?" Sa tukunia ko koya, Au sa yali ni kila. ¹³ Era sa qai yadi koya ka mataboko eliu vi ira na Farisi. ¹⁴ Ia sa siga ni vacecegu sa ulia kinia na soso ko Jisu, ka basukia na matana. ¹⁵ Era sa qai tarogi koya voki na Farisi, se sa rai rawa vaevei. A sa tukunia vi ira ko koya, Sa boroya na mataqu ko koya ena soso, kau sa tavoi, kau sa qai rai rawa. ¹⁶ Eso vi ira na Farisi era sa qai tukunia, "A tamata koya sa yali ni tamata ni Kalou, ni sa yali ni tamata ni Kalou, ni a yali ni vatabuya na siga ni vacecegu. Eso tani sa tukunia, E caka rawa vaevei na cakacaka-mana va koya e dua na tamatai valavala ca? A ra sa yali ni lomavata kinia. Era sa tukunia voki vua na tamata ka mataboko, ¹⁷ "A cava ko sa tukunia ena vukuna, ni sa rai rawa na matamu?" A sa tukunia ko koya, "A parofita ko koya." ¹⁸ Ia ko ira na kai Jutia era sa yali ni vadinatakia, ni sa mataboko eliu ko koya, a sa rai rawa, ka ra sa kacivi rau na nonai tubutubu. ¹⁹ a ra sa tarogi rau, ka tukunia, "A luvemudrau koya, drau sa tukunia sa sucu mataboko, ne? sa qai rai rawa vaevei koya?" ²⁰ E rau sa saumia na nonai tubutubu ka tukunia, "Kirau sa kila ni sa luve i kirau koya, ka sa sucu mataboko: ²¹ ia kirau sa yali ni kila se sa rai rawa vaevei: se ko cei sa vavuna na nona rai, kirau sa yali kila. Dou tarogia lia ni sa tamata bula ko koya. E rawa ni vamacalatakia lia o koya na nona a vabulai. ²² Erau sa vosa vakoya na nonai tubutubu, ni rau sa rerevaki ira na kai Jutia: ni ra sa qai loma vata na kai Jutia: me vatabui mai na valenilotu ko koya yadua sa vatusa ni sa Karisito ko koya koya. ²³ A ka koya e rau sa tukunia kinia koi rau na nonai tubutubu, "Sa tamata bula ko koya: tarogi koya." ²⁴ Era sa qai kacivia voki na tamata ka mataboko, ka tukunia vua, "Varokorokotakia na Kalou: kitou sa kila sa tamatai valavala ca ko koya, ²⁵ Sa qai saumia na tamata gona ka tukunia, " Au yali ni kila kevaka e tamata i valavala ca, ia, na ka lia ka'u sa kila, ni'u a mataboko e liu, au sa qai rai rawa." ²⁶ Era sa qai tukunia voki vua, "A cava ka caka vi iko ko koya? ka rai vaevei na matamu? ²⁷ Sa tukunia vi ira ko koya, Au sa tukunia lowa lia koya vi ikodou, ia dou a yali ni varogocia: dou sa via rogocia voki ena vuku ni cava? dou sa vinakatia beka mo dou yaco voki lia mo dou nona tisaipeli? ²⁸ Era sa qai valialiai koya, ka tukunia, "O iko sa nona tisaipeli: ia koi kimamu kimamu sa tisaipeli i Mosese. ²⁹ Kimamu sa kila ni sa vosa vei Mosese na Kalou; ia na tamata koya, kimamu yali ni kila se sa qai mai vi ko koya." ³⁰ Sa vosa na tamata, ka tukunia vei ira, "Sa qai dua na ka vakurabui koya, ni dou a yali ni kila se sa qai mai vi ko koya, ia sa vavunia ko koya na rai ni mataqu. ³¹ Eda kila ni Kalou e yali ni rogoci ira na tamatai valavala ca, ia, kevaka sa daulotu vua na Kalou e dua na tamata, ka caka na nona lewa, sa rogoci ko koya. ³² Sa yali ni rogo mai nai vatekivu kei vuravura, ni sa dua sa vavunia na rai ni dua na tamata ka sucu mataboko mai. ³³ Kevaka sa yali ni qai mai vua na Kalou ko koya koya, sa yali ni rawatia e dua na ka. ³⁴ Era sa vosa, ka tukunia vua, "O iko a sucu mataboko mai enai valavalaca, ka ko sa vatavulici kimamu?" A ra sa vatabui koya. ³⁵ Sa rogocia ko Jisu ni ra sa vatabui koya: ia ni sa kunei koya, sa tukunia vua, " O sa vabautia na Luve ni Kalou ne? ³⁶ Sa saumia o koya, ka tukunia, O cei ko koya, Turaga, me'u vabautia?" ³⁷ A sa tukunia vua ko Jisu, "O sa raicia oti, ia sai koya drau sa vivosaki tiko." ³⁸ Sa qai tukunia ko koya, Noqu Turaga, au sa vabautia." A sa cuva vua. ³⁹ A sa tukunia ko Jisu, Au sa qai mai ki vuravura koya me'u lewa, me ra rai rawa ko ira sa yali ni rai rawa, ia me ra mataboko ko ira sa rai. ⁴⁰ Ko ira na Farisi ka tiko kinia ni ra sa rogocia na veika koya, a ra sa tukunia vua, "Sa mataboko beka koi kitou voki lia?" ⁴¹ Sa tukunia vi ira ko Jisu, "Kevaka dou sa mataboko, sa yali na nomudou cala; ia dou sa qai tukunia, 'Kitou sa rai,' o koya sa tu lia kinia na nomudou cala."