¹ E dina, e dina, au sa tukunia vi ikodou, O koya sa yali ni curu e darava ni ba ni sipi, ia sa kaba cake ena tikinia tani, sai koya koya na daubutako ka dau kovekove. ² Ia ko koya sa curu e darava, ko koya koya nai vatawa ni sipi. ³ Sa dolavia koya nai vatawa ni darava; a sa varogocia na domona ko ira na sipi: a sa kacivi ira na nona sipi ena yacadra ko koya, ka tuberi ira ki tautuba. ⁴ Ia ni sa yadi ira na nona sipi ki tautuba sa liutaki ira, a sa muri koya ko ira na sipi ni ra sa kila na domona. ⁵ Ia era na yali ni muria na vulagi, era na tuba tani lia vi koya: ni ra sa yali ni kila na domo ni vulagi. ⁶ Sa vosatakia vi ira na vosa vatautauvata koya ko Jisu: a ra sa yali ni kila na veika sa vosatakia vi ira ko koya. ⁷ Sa qai tukunia voki vei ira ko Jisu, E dina, e dina, au sa tukunia vi ikodou, "Oi au na darava ni sipi. ⁸ Ko ira kece sa liu mai vi au era sa daubutako ka daukovekove: a sa yali ni varogocia na nodra vosa na sipi. ⁹ Oi au na darava: kevaka sa curu kinia e dua na tamata ena vukuqu, ena vabulai, ka na daucuru mai ka daucuru yani, ka na kune kakana. ¹⁰ Sa yali ni qai loa lia mai na daubutako, me butako lia, ka ravuravu ka va rusa: au sa qai mai me rawa vi ira na bula, ia me rawa valevu sara. ¹¹ Oi au nai vatawa vinaka: sa solia na nona bula nai vatawa vinaka ena vukudra na sipi. ¹² Ia ko koya sa voli na nona cakacaka, ka yali ni koya nai vatawa, ka sa yali ni taukeni ira na sipi, sa raicia na wolifa ni sa qai tiko mai, ka sa daini ira na sipi ka tuba ko koya: a sa kati ira na wolifa, a sa toqovi ira ka tovoci ira: ¹³ sa tuba ko koya sa voli na nona cakacaka, ka ni sa yali ni daunanumi ira na sipi. ¹⁴ Oi au nai vatawa vinaka: ia ka'u sa kilai ira sa noqu, ia ko ira sa noqu era sa kilai au: ¹⁵ me vaka sa kilai au ko Tamaqu, ka me vaka ka'u sa kilai Tamaqu: ka'u sa solia voki lia na noqu bula ena vukudra na sipi. ¹⁶ Eso tani voki na noqu sipi, era sa yali ni tiko ena bai koya: sa kilikili me'u yadi ira voki lia mai, a ra na rogocia na domoqu: ena qai dua loa na qele ni sipi, ka dua bau nai vatawa. ¹⁷ A ka koya sa lomani au kinia ko Tamaqu, ni'u sa solia na noqu bula, me'u yadia voki. ¹⁸ Sa yali e dua sa kovea koya vi au, ia ka'u sa solia vakai au lia. Au sa rawatia me'u yadia voki. Ai vunau koya sa solia mai vi au ko Tamaqu. ¹⁹ Era sa qai viletitakia voki na kai Jutia ena vuku ni vosa koya. ²⁰ A sa lewe levu vi ira sa tukunia, "Sa curumi koya e dua na tevoro, a sa lialia: dou sa rogoci koya ena vuku ni cava?" ²¹ Eso tani era sa tukunia, "Sa yali ni vakoya na vosa ni tamata sa curumi koya e dua na tevoro: sa rawatia beka e dua na tevoro me rai na mata ni mataboko" ²² Sa qai caka mai Jerusalemi na solevu ni vasavasavataki ni valenisoro, a sa vulai liliwa. ²³ A sa qai voli ko Jisu ena valenisoro, ena varada nei Solomoni. ²⁴ Era sa qai vavolivoliti koya na kai Jutia, ka tukunia vua, "A cava so na kena dede ko sa yali ni vataudeitakia kinia na loma i kimamu? kevaka ko sai koya na Karisito, tukunia vadodonu mai vi kimamu." ²⁵ Sa saumia vi ira ko Jisu, "Au a tukunia vi Ikodou, ia dou sa yali ni vabautia: a cakacaka ka'u sa caka ena yaca i Tamaqu, o koya koya sa vadinadina vi au. ²⁶ Ia dou sa yali ni vadinatia, ni dou sa yali ni noqu sipi. ²⁷ Sa rogocia na noqu vosa ko ira na noqu sipi, ia ka'u sa kilai ira, ka ra sa muri au: ²⁸ ia ka'u sa solia vi ira na bula yali ni mudu, ia era na yali sara ni rusa, se dua e kaliraki ira mai na ligaqu. ²⁹ A tamaqu, ko koya sa soli ira vi au, sa uasivi na ka kece lia: a sa yali e dua sa rawatia me kaliraki ira mai na liga i Tamaqu. ³⁰ Kirau sa dua loa lia ki Tamaqu. ³¹ Sa qai tomikia voki na vatu ko ira na kai Jutia, me ra vaviriki koya kinia. ³² Sa qai tukunia vi ira ko Jisu, "E levu na cakacaka vinaka ka'u a vatakila vi ikodou mai vi Tamaqu; a cava na cakacaka vi ira koya dou sa vaviriki au kinia? ³³ Sa tukunia vua ko ira na kai Jutia, Sa yali ena vuku ni cakacaka vinaka kimamu sa vaviriki iko kinia; ena vuku lia ni ko vosa vacacatakia na Kalou; ena vuku voki lia ni ko sa tamata lia, ka sa qisi iko mo Kalou ³⁴ Sa tukunia vi ira ko Jisu, "Sa yali li ni volai ena nomudou vunau, 'Au a tukunia, Dou sa kalou'"? ³⁵ Kevaka sa vatokai ira me kalou ko koya, ni sa yaco vi ira na vosa ni Kalou, (a sa yali ni dai loa rawa nai Vola Tabu;) ³⁶ dou sa tukunia li vua sa lesia na Tamaqu ka tala ki vuravura, 'Ko sa vosavacacatakia,' baletia ni'u sa tukunia, 'Oi au na Luve ni Kalou'? ³⁷ Kevaka ka'u sa yali ni caka na cakacaka i Tamaqu, kakua ni vabauti au: ³⁸ ia kevaka ka'u sa caka, dou vabautia na cakacaka, kevaka dou sa yali ni vabauti au; mo dou kila kinia, ka vadinatatakia, ni sa tiko vi au ko Tamaqu, ka'u sa tiko vi ira koi au." ³⁹ Era sa qai via tauri koya voki: a sa qai tani ko koya mai na ligadra. ⁴⁰ A sa qai voki yani ko koya ki tai kadua ni Joritani, ki na yasana sa vipapitaisotaki kinia e liu ko Joni: a sa tiko kinia. ⁴¹ Era sa lewe levu era sa qai vua, ka ra tukunia, "Sa yali ni caka e dua na ka-mana ko Joni: ia sa dina lia na ka kece lia sa vosatakia ko Joni ena vuku ni tamata koya." ⁴² E ra sa lewe levu sa vabauti koya mai na vanua gona.