¹ Sa dua na tamata sa tauvimate, ko Lasarusa na kai Pecani, na nodrau koro ko Meri kei Marica na tuakana. ² Sai Meri koya sa lumutia na Turaga e na waiwai, ka quwarakia na yavana ena drau ni uluna, a sa tauvi-mate na ganena ko Lasarusa. ³ E rau sa talatala vi Jisu koi rau na ganena, ka tukunia, "Ikonu na Turaga, raicia, ko koya ko sa lomana sa tauvi-mate." ⁴ Ia ni sa rogocia ko Jisu, sa tukunia, Ena yali ni ciba ena mate koya ko koya, ia ena varokorokotaki kinia na Kalou, ena varokorotaki voki lia kinia na Luve ni Kalou." ⁵ A sa daulomani Marica ko Jisu, vata kei tacina, vata kei Lasarusa. ⁶ Ni sa qai rogocia ko koya ni sa tauvi-mate, sa tiko bogi rua voki ena tikinia gona. ⁷ Sa oti koya sa qai tukunia vi ira na tisaipeli, "Me datou qai voki mada ki Jutia." ⁸ Sa ratou tukunia vi ira na tisaipeli, : Vavuvuli, era via vaviriki iko ni kua lowa lia ena vatu ko ira na kai Jutia; ia iko sa baci via qai voki kinia," ⁹ Sa saumia ko Jisu, "Sa yali li ni tinikarua na aua e na dua na siga? kevaka sa qai e dua ena siga, sa yali ni tarabe ko koya, baletia ni sa raicia na rarama ki vuravura koya: ¹⁰ Ia, kevaka sa qai e dua ena bogi, sa tarabe ko koya ni sa yali ni tu vua na rarama." ¹¹ Sa vosatakia na ka koya ko koya: ia ka oti sa qai tukunia vi ira, "Sa moce na wekada ko Lasarusa; ia, ka'u sa na qai lia me'u vayadrati koya." ¹² Sa qai tukunia ko ira na nona tisaipeli, Ikonu na Turaga, kevaka sa moce lia ko koya ena bula." ¹³ Ia sa vosatakia na nona mate ko Jisu: ka ra sa nanumia sa vosatakia ko koya na vacegu ni moce. ¹⁴ Sa qai tukunia vadodonu vi ira ko Jisu, "Sa mate ko Lasarusa: ¹⁵ ia, ka'u sa rekitakia ena vukumudou ni'u a yali ni tiko kinia, mo dou vabautia; ia me da qai lia vua." ¹⁶ Sa qai tukunia ko Tomasi, o koya sa vatokai ko Titimo, vi ira na nonai caba na tisaipeli, "Me da qai voki lia, me da mate vata kei Jisu." ¹⁷ Ni sa qai mai ko Jisu, sa qai kila kinia ni sa bogi va oti ko Lasarusa enai bulubulu. ¹⁸ A sa voleka ki Jerusalemi ko Pecani, a kena yawa e rua beka na maile, ¹⁹ Ia sa lewe levu na kai Jutia era a qai mai kivei Marica vata ki Meri, me ra vacegui rau ena vuku ni ganedrau. ²⁰ Ni sa qai rogocia ko Marica sa qai mai ko Jisu, sa qai ki tavaki ira: ia sa tiko lia e vale ko Meri. ²¹ Sa qai tukunia vi Jisu ko Marica, "Ikonu na Turaga, kevaka ko a tiko ena vanua gona, ke a yali ni mate na ganequ: ²² ia ka'u sa kila ena solia vi ikonu ni kua na Kalou na ka kece lia ko sa kerea vua." ²³ Sa tukunia vua ko Jisu, "Ena tu cake voki na ganemu." ²⁴ Sa tukunia vua ko Marica, "Au sa kila ena tu cake voki ko koya e na siga mai muri era na tu cake voki kinia na mate. ²⁵ Sa tukunia vua ko Jisu, "Oi au na vu ni tu-cake-voki, ki na vu-ni-bula: ko koya sa vabauti au, kevaka sa mate, ena bula lia: ²⁶ ia ko koya yadua sa bula ka vabauti au, ena yali sara ni mate. Ko sa vadinatakia na ka koya, se yali?" ²⁷ Sa tukunia vua ko koya, Io, na Turaga: au sa vadinatia ni sa Karisito koi ikonu, na Luve ni Kalou, ko koya sa dodonu me qai mai ki vuravura." ²⁸ Ia ni sa vosa vakoya ko koya, sa qai yani, ka kacivia lo na tacina ko Meri, ka tukunia, "Sa qai mai nai Vavuvuli, a sa tarogi iko tiko." ²⁹ Ni sa qai rogocia ko koya, sa tu cake ka qai yani vi ira. ³⁰ (A sa bera ni curu ki na koro ko Jisu, sa tiko lia ena vanua erau sa vitata kinia kei Marica.) ³¹ Ko ira na kai Jutia era sa tiko vata ki Meri e vale ka vacegui koya, ni ra sa raicia sa tu cake sara ko koya, ka qai yani, era sa muri koya, ni ra sa nanumia, sa qai ki nai bulubulu ko koya me tagi kinia. ³² Ni sa qai yaco ko Meri ki na vanua sa tiko kinia ko Jisu, ka raici koya, sa cuva sobu ki na yavana, ka tukunia vi ira, "Ikonu na Turaga, kevaka ko a tiko ena vanua gona, ke yali ni mate na ganequ." ³³ Ni sa qai raicia ko Jisu na nona tagi, kei na nodra tagi voki lia na kai Jutia era qai vata tiko mai, sa vutugu ko koya ena yalona, a sa rarawa na lomadra, ³⁴ ka tukunia, "Evei na vanua dou a bulutia kinia?" Era sa tukunia vi ira, "Turaga ni qai mai mo ni raicia." ³⁵ Sa tagi ko Jisu. ³⁶ Era sa qai tukunia na kai Jutia, Raicia na kena levu ni nona lomani Lasarusa!" ³⁷ Ia, ka so vi ira sa tukunia, "Sa yali beka ni rawatia ko koya koya, ko koya sa vavunia na rai ni mata ni mataboko, me lewa voki lia me kakua ni mate na tamata koya" ³⁸ Sa vutugu voki e na yalona ko Jisu, ka qai mai ki nai bulubulu. Ia sa dua na qaravatu, ka sa kenai sogo e dua na vatu. ³⁹ Sa tukunia ko Jisu, "Dou yadia tani na vatu." Sa tukunia vua o Marica, a gane i koya sa mate, "Ikonu na Turaga, sa na bona ko koya: ni sa qai bogi va na nona mate." ⁴⁰ Sa tukunia vua ko Jisu, "Au a yali li ni tukunia vi iko, ni ko na raicia na kaukauwa ni Kalou, kevaka ko sa vabautia?" ⁴¹ Era sa qai yadia tani na vatu. A sa ta cake ko Jisu, ka tukunia, "Na Tamaqu, au sa vavinavinakatakia vi iko ni ko a rogoci au mai: ⁴² ia ka'u sa kila ni ko sa rogoci au tiko lia, ia kau sa vosa ena vukudra na tamata sa tiko koya, me ra vabautia ni ko sa talai au mai." ⁴³ Ia ni sa vosa oti vakoya, sa kaci ena domo levu, "Lasarusa, qai mai." ⁴⁴ Ia ko koya ka mate sa qai mai, ka viviraki tu na ligana ki na yavana enai sole ni mate: ka vivirakia na uluna ena dua nai tavoi. Sa tukunia vi ira ko Jisu, "Dou serekia, ka dainia me qai." ⁴⁵ Era lewe levu vi ira na kai Jutia sa qai mai vi Meri, ni ra sa raicia na ka sa caka ko Jisu, era sa vabautia. ⁴⁶ Ia ko ira eso sa qai yani vi ira na Farisi, ka tukunia vi ira na ka sa caka ko Jisu. ⁴⁷ Sa qai soqoni vata ko ira na bete levu vata kei ira na Farisi me ra bose, a ra sa tukunia, "A cava mada me da caka? ni sa caka na cakacaka-mana e levu na tamata koya. ⁴⁸ Kevaka eda sa daini koya dua loa vakoya, era na vabauti koya kece lia na tamata: era na qai qai mai na kai Roma, ka kovea na noda koro kei na noda matanitu." ⁴⁹ A sa dua vi ira, ko Kaiafa, ko koya sa bete levu ena yabaki ko ya, sa tukunia vi ira, "Dou sa yali ni kila e dua na ka, ⁵⁰ se vananumia ni sa yaga vi ita me mate e dua na tamata ena vukudra na tamata, ka me kakua ni rusa na matanitu taucoko." ⁵¹ A sa yali ni vosatakia na ka koya ko koya vataki koya: ia ni sa bete levu ena yabaki ko ya, sa parofisai ko koya ni na mate ko Jisu ena vuku ni matanitu ko ya; ⁵² ka yali ena vuku ni matanitu dua loa lia, ko ya me vasoqoni ira vata voki lia na luve ni Kalou era sa dui viseyaki me ra dua loa. ⁵³ Mai na siga gona era sa qai tuvalakia se me vamatei vacava ko Jisu. ⁵⁴ O koya koya sa yali kinia ni viqaiyaki e matana votu ena kedra maliwa na kai Jutia, a sa qai yani mai na vanua gona ki na vanua sa voleka ki na vikau, ki na dua na koro na yacana ko Ifireimi, a sa tiko kinia kei ira na nona tisaipeli. ⁵⁵ A sa voleka na nodra solevu ni qai-sivia na kai Jutia: a ra sa lewe levu sa qai cake ki Jerusalemi, mai vanua, ni se bera na solevu ni qai-sivia, me ra vasavasavataki ira. ⁵⁶ Era sa qai vaqarai Jisu, ka vivosaki lia vakai ira, ni ra sa tu ena vale ni soro, "A cava dou sa vananumia? ena qai mai ko koya ki na solevu se yali?" ⁵⁷ Ia sa varotakia ko ira na bete levu kei ira na Farisi, kevaka e dua sa kila na vanua sa tiko kinia ko Jisu, me tukunia mai, me ra qai ki vesukia mai.