¹ A sa qai ko Jisu ki na ulu-ni-vanua ni violive. ² Ia ena savulaci caca sa qai voki mai ko koya ki na valenisoro, a ra sa qai mai vi koya ko ira kece lia na tamata; a sa tiko sobu ko koya, ka vavulici ira. ³ Ia, ko ira na vu-ni-vola kei ira na Farisi era sa yadia mai vi koya e dua na yalewa sa tobo ni sa dautagane; a ra sa vaturi koya ena kedra maliwa, ⁴ ka tukunia vua, " Vavuvuli, sa tobo na yalewa koya ni sa caka tiko na vibutakoci: ⁵ a sa varotakia vi ita ko Mosese ena vunau, me ra vaviriki ena vatu ko ira sa va koya: ia ka cava ikonu sa tukunia baletia na yalewa koya? ⁶ Era sa vosa va koya me veretaki koya kinia, me ra beitaki koya rawa. Ia sa cuvaki sobu lia ko Jisu ka volavola ena buturara ena nodrai qaqalo. ⁷ Ia ni ra sa tarogi koya tiko lia, sa tu cake ko koya, ka tukunia vi ira, " O koya vi ikodou sa yali ni valavala ca, me viriki koya mada eliu ena vatu." ⁸ Sa qai cuva sobu voki ko koya, ka volavola ena qele. ⁹ Ia ni ra sa rogocia, era qai yadua ki tuba, liutakia ko koya ka matua dua loa lia: ka sa qai vo dua loa lia ko Jisu ki na yalewa e tu e matadra. ¹⁰ Ia ni sa tu cake ko Jisu, ka tukunia vua, "Yalewa, sa evei ko ira koya? sa yali voki li ni dua e vo me lewai iko mo curuvi?" ¹¹ A sa saumia ko koya, "Sa yali e dua, Turaga." A sa tukunia vua ko Jisu, "Au sa yali voki lia ni lewai iko mo cudruvi: mo qai, ka mo kakua ni valavala ca voki." ¹² Sa qai vosa voki vi ira ko Jisu, ka tukunia, "Oi au na rarama kei vuravura: ko koya sa muri au ena yali ni qai ena butobuto, ena tu lia vi koya na rarama ni bula." ¹³ O ira na Farisi era sa qai tukunia vua, "O ni sa tukuni iko; sa yali ni dina na nomu tukutuku." ¹⁴ Sa saumia ko Jisu ka tukunia vi ira, "Ia, kevaka ka'u sa tukuni au, sa dina na noqui tukutuku: ni'u sa kila na vanua ka'u sa qai mai kinia, ka qai yani kinia, ia dou sa yali ni kila se'u qai mai vi, se'u qai kivei. ¹⁵ Dou sa lewa me vaka na ka sa rairai: au sa yali ni lewa e dua na tamata. ¹⁶ Ia kevaka ka'u sa lewa, sa dina na noqu lewa, ni'u sa yali ni tiko dua loa lia, ia koi au kei Tamaqu, ko koya sa talai au mai. ¹⁷ Sa volai voki lia ena nomudou vunau, ni sa dina nai tukutuku ni tamata e lewe rua. ¹⁸ E dua koi au ka'u sa tukuni au, a sa tukuni au ko Tamaqu, ko koya sa talai au mai." ¹⁹ Era sa qai tukunia vi ira, "Evei ko Tamamunu?" Sa tukunia ko Jisu, "Dou sa yali ni kilai au se Tamaqu: kevaka dou sa kilai au, dou sa kilai Tamaqu voki lia." ²⁰ Sa cavutia na vosa koya ko Jisu ena vale ni yau, ni sa vatavuvuli ena valenisoro: a sa yali ni dua sa vesuki ira: ni se yali ni yaco na nona gauna. ²¹ Sa qai tukunia voki vi ira ko koya, "Au na qai yani, ka dou na vaqarai au, ka dou na mate ena nomudoui valavala ca: ia na vanua ka'u sa qai kinia, dou sa yali ni qai rawa kinia." ²² Era sa qai tukunia na kai Jutia, "Ena vamatei koya beka vaikoya? ni ra sa tukunia, 'Na vanua ka'u sa qai kinia, dou sa yali ni qai rawa kinia'?" ²³ A sa tukunia vi ira ko koya, " Dou sa qai mai ra; au sa qai mai cake: dou sa vavuravura; au sa yali ni vavuravura: ²⁴ O koya koya ka'u a tukunia kinia vi ikodou, Dou na mate ena nomudoui valavala ca; kevaka dou sa yali ni vadinatia ni sai au, dou na mate ena nomudoui valavala ca." ²⁵ Era sa qai tukunia vua, Ko cei ko ikonu?" A sa tukunia vi ira ko Jisu, Sai koya lia ka'u a tukunia vi ikodou mai nai vatekivu. ²⁶ Sa levu na ka me'u vosatakia ka lewai ikodou kinia; ia sa dina ko koya sa talai au mai: ia ka'u sa tukunia vi ira na kai vuravura na veika ka'u a rogocia mai vi koya." ²⁷ Era yali ni kila ni sa ra vosatakia tiko vi ira na veika baletia na Tamadra. ²⁸ Sa qai tukunia vi ira ko Jisu, "Ni dou sa lavetia cake oti na Luve ni tamata, dou na qai kila ni sai au, ni'u sa yali voki lia ni caka e dua na ka vakai au; ia na ka lia sa vatavulici au kinia ko Tamaqu, sai koya ka'u sa vosatakia. ²⁹ Ia sa tiko vata ki au ko koya sa talai au mai: sa yali ni daini au ko Tamaqu me'u tiko dua loa lia: ni'u sa caka tiko lia na ka sa vinakatia ko koya." ³⁰ Ni sa cavutia tiko na vosa koya ko Jisu, era sa lewe levu era sa vabautia. ³¹ Sa qai tukunia ko Jisu vi ira na kai Jutia era sa vabauti koya, "Kevaka dou sa muria tiko lia na noqu vosa, dou sa qai noqu tisaipeli dina; ³² ia dou na kila na ka dina, ia na ka dina ena sereki ikodou." Era sa tukunia vua, ³³ Oi kimamu na kawa i Eparaama, ka yali e dua kimamu a bobula kinia ena dua na gauna; ko sa tukunia vacava, 'Dou na sereki'?" ³⁴ Sa qai tukunia vi ira ko Jisu, "E dina, e dina, au sa tukunia vi ikodou, O koya yadua sai valavala ca sa bobula ki nai valavala ca. ³⁵ A sa yali ni tiko vadua e vale na bobula; na luvena lia sa tiko vadua. ³⁶ Ia kevaka ena sereki ikodou na Luvena dou na qai sereki dina kinia. ³⁷ Au sa kila dou sa kawa i Eparaama: ia dou sa via vamatei au, ni sa yali ni tiko ena lomamudou na noqu vosa. ³⁸ Au sa vosatakia na ka ka'u a raicia vi Tamaqu: ia dou sa caka na ka dou a rogocia mai vi koya na tamamudou." ³⁹ Era sa vosa, ka tukunia vi ira, "A tama i kimamu ko Eparaama." Sa tukunia vi ira ko Jisu, "Kevaka dou sa luvei i Eparaama, dou na caka nai valavala nei Eparaama. ⁴⁰ Ia, dou sa qai via vamatei au, a tamata sa tukunia vi ikodou na ka dina, o koya ka'u sa rogocia mai vua na Kalou; sa yali ni caka na ka va koya ko Eparaama. ⁴¹ Dou sa caka na nona cakacaka na tamamudou. Era sa qai tukunia vi ira, "Kimamu sa yali ni sucu ena dauyalewa: e dua loa lia na tama i kimamu, na Kalou." ⁴² Sa qai tukunia vi ira ko Jisu, "Kevaka sa Tamamudou na Kalou, dou na lomani au: ni'u sa tubu mai vua na Kalou, ka qai mai kinia; au sa yali ni qai lowa lia mai vakai au, ia sai koya sa talai au mai. ⁴³ A cava dou sa yali kinia ni kila na noqu vosa? ni dou sa yali ni vabautia rawa na noqu vosa. ⁴⁴ A tamamudou na tevoro, ia dou sa via caka na gagadre ca ni tamamudou. Ko koya na dauvivamatei mai nai vatekivu, a sa yali ni vabautia na ka dina. Ni sa vosa lasu ko koya, sa vosatakia na ka sa tu vua; ni sa daulasulasu ko koya, ena vuku ni'u sa tukunia vi ikodou na ka dina. ⁴⁵ Ia, koi au ena vuku niu sa tukunia vi ikodou na ka dina, dou sa yali ni vadinati au. ⁴⁶ Ko cei vi ikodou sa vadinadinatakia ni'u sa cala? Ia kevaka ka'u sa vosa dina, dou sa yali ni vadinatia ni'u sa cala? Ia kevaka ka'u sa vosatakia na dina, dou sa yali ni vadinatia ena vuku ni cava? ⁴⁷ O koya sa nona na Kalou sa rogocia na vosa ni Kalou: koya dou sa yali ni nona na Kalou." ⁴⁸ Era sa qai vosa ko ira na kai Jutia, ka tukunia vua, "Sa yali ni kimamu tukunia dina, ni ko sa kai Samaria, ka sa curumi iko e dua na tevoro? ⁴⁹ Sa tukunia ko Jisu, "Sa yali ni curumi au e dua na tevoro, ia ka'u sa varokorokotakia na Tamaqu, ia dou sa valialiai au lia" ⁵⁰ Au sa yali ni ni vaqara me'u varokorokotaki: sa dua sa tiko sa vaqara ka vataulewatakia. ⁵¹ E dina, e dina, au sa tukunia vi ikodou, kevaka e dua sa vabautia tiko lia na noqu vosa, ena yali sara ni mate." ⁵² Era sa qai tukunia vi ira ko ira na kai Jutia, "Kimamu sa qai kila sa curumi ikonu e dua na tevoro. Ko Eparaama kei ira voki lia na parofita era sa mate, ia, ko sa tukunia 'Kevaka e dua sa vabautia tiko lia na noqu vosa, ena yali sara ni mate. ⁵³ Ko sa levu cake beka, ka lailai sobu ko Eparaama na tamada, ko koya sa mate? a ra sa mate voki lia ko ira na parofita: ko sa qisi iko vi cei?" ⁵⁴ Sa tukunia ko Jisu, "Kevaka ka'u sa varokorokotaki au, sa ka lowa na noqu vivarokorokotaki: sai koya na Tamaqu sa varokorokotaki au: ko koya dou sa tukunia sa nomudou Kalou: ⁵⁵ ia dou sa yali ni kilai koya, ia ka'u sa kilai koya koi au; ia kevaka ka'u sa tukunia, 'Au sa yali ni kila koya,' au na lasutakia lia me vataki ikodou; ia ka'u sa kilai koya lia ka vabautia tiko lia na npna vosa. ⁵⁶ Sa gadrevia valevu sara ko Eparaama na tamamudou me raicia na noqu gauna: a sa raicia, ka reki." ⁵⁷ Era sa qai tukunia vi ira ko ira na kai Jutia, "Sa yali ni limasagavulu na nomu yabaki, ia ko a raici Eparaama, oi? ⁵⁸ Sa tukunia vi ira ko Jisu, E dina, e dina, au sa tukunia vi ikodou, Ni se bera ni sucu ko Eparaama, au sa bula. ⁵⁹ Era sa qai tomikia eso na vatu, me ra vaviriki ira kinia: ia sa vunitaki koya ko Jisu, ka sa curu yani mai na valenisoro.