¹ Ia ni sa oti na veika koya, sa wavoki voli e Kalili, ka ni ra yali ni via qai yani Jutia baletia ni ko ira kai Jutia era via vamatei ira. ² A sa voleka tiko mai na nodra solevu ni vale vacevaceva na kai Jutia. ³ A ratou sa qai tukunia vua na tacina, "Dainia na vanua koya ka qai ki Jutia, me ra raicia voki lia na nomu tisaipeli na cakacaka ko sa caka. ⁴ Ni sa yali e dua sa e dau caka vuni tu na ka kevaka e gadrevia tiko me kilai. Kevaka ko ni sa caka na veika koya, varaitaki ikonu kivei ira na kai vuravura." ⁵ Ko iratou voki lia na tacina, eratou yali ni vabauti koya. ⁶ Sa qai tukunia vi iratou ko Jisu, "E se yali ni yaco mai na noqu gauna: ia vi ikodou, sa tautauvata lia na gauna kece lia. ⁷ O ira na kai vuravura era sa yali ni cati ikodou, ia, era cati au lia baletia niu tukunia tiko na cala ni nodra i valavala. ⁸ Dou qai cake lia koi ikodou ki na solevu. Au na yali ni qai kinia baletia na noqu gauna e se bera ni yaco." ⁹ Ia ni sa vosatakia oti na veika koya, sa tiko voli lia e Kalili. ¹⁰ Ni ratou sa qai cake na tacina ki na solevu, sa qai qai voki lia ko koya, yali ena matana levu, ia e vavunivuni lia. ¹¹ Ko ira na kai Jutia era a vasaqarai koya ena vanua ni solevu ka tukunia, "E vi ko koya?" ¹² Era a vivosaki lo ko ira na lewe levu baleti koya. Eso era tukunia, "A tamata vinaka ko koya" ka so voki era tukunia, E yali, e vacalai ira na tamata." ¹³ Ia e yali lia ni dua e vosatakia vadoudou na ka e baleti ira, ni ra sa rerevaki ira na kai Jutia. ¹⁴ Ia, ni sa vimama na gauna ni solevu, sa qai cake ko Jisu ki na vale ni soro, ka vatekivu me vavuvuli. ¹⁵ Era a kurabuitakia na kai Jutia ka tukunia, "E kila vacava na tamata koya e levu na ka? ¹⁶ A sa saumia ko Jisu ka tukunia, " Na noqui vavuvuli e yali ni noqu, ia e nona o koya sa talai au mai. ¹⁷ Kevaka e dua na tamata sa via caka na loma i koya, ena kila se sa qai mai vua na Kalou nai vavuvuli, se'u vosa vei au lia. ¹⁸ O koya sa vosa vakai koya lia, sa vinakatia me dokai; ia ko koya sa vinakatia me dokai ko koya sa talai koya mai, sa tamata dina o koya, a sa yali na cala vua. ¹⁹ E a yali ni solia vi ikodou na vunau ko Mosese, a yali ni dua vi ikodou a muria na vunau? Dou sa via vamatei au e vuku ni cava?" ²⁰ Era sa vosa na lewe levu, ka tukunia, "Sa curumi iko e dua na tevoro: ko cei sa via vamatei iko?" ²¹ Sa vosa ko Jisu, ka tukunia vi ira, "E a dua loa lia na cakacaka ka'u a caka, ia dou sa matalautakia. ²² Ko Mosese a solia vi ikodou na vicili; (ia ka sa yali ni vu vi Mosese, sa vu lia vi ira na qase;) ia dou sa cilivia na tamata ena siga ni vacecegu: ²³ Kevaka sa cilivi na tamata ena siga ni vacecegu, me kakua ni vacacani na vunau i Mosese; dou sa cudruvi au beka, ni'u sa vabula taucoko e dua na tamata ena siga ni vacecegu? ²⁴ Kakua ni lewa me vaka nai rairai, ia mo dou lewa vadodonu lia." ²⁵ Eso vi ira mai Jerusalemi era sa tukunia, "Sa yali li ni koya koya era sa via vamatea? ²⁶ Raicia, sa vosa doudou, ka ra sa yali ni tukunia vua e dua na ka. Era sa kila sara lia na turaga ni sai koya koya dina na Karisito, se yali? ²⁷ Ia eda sa kila na vanua sa qai mai kinia na tamata koya; ia na Karisito, ni sa qai mai, sa yali e dua sa kila se qai mai vi ko koya." ²⁸ Sa qai kaci ko Jisu ni sa vatavuvuli tiko ena valenisoro, ka tukunia, "Dou sa kilai au, dou sa kila voki lia na vanua ka'u sa qai mai kinia, ia ka'u sa yali ni qai mai vakai au lia, ia sa dina ko koya sa talai au mai, ia dou sa yali ni kilai koya: ²⁹ ia ka'u sa kilai koya koi au: ni'u sa qai mai vi koya, a sa talai au mai ko koya. ³⁰ Era sa qai via vesuki koya: ia sa yali e dua sa tarai koya, ni se bera ni yaco na nona gauna. ³¹ Ia sa lewe levu vi ira na tamata era sa vabauti koya, ka tukunia, Ni sa qai mai na Karisito, ena caka li na cakacaka-mana e levu cake ena veika koya sa caka ko koya koya? ³² Ko ira na Farisi era sa rogocia ni ra vasolokakanatakia va koya baleti Jisu; ia ko ira na Farisi ki ira na bete levu era sa tala eso sa ovisa me ra vesuki koya. ³³ Sa qai tukunia vi ira ko Jisu, "Au sa tiko valailai lia kei ikodou, au na qai qai vua ka talai au mai: ³⁴ dou na vaqarai au, ia dou na yali ni raicia: ia na vanua ka'u sa tiko kinia: dou sa yali ni qai rawa kinia." ³⁵ Sa ra qai vivosakitakia vaka ira na kai Jutia, "Ena qai beka kivei ko koya, me da yali kinia ni raici koya? ena qai beka vi ira na noda era sa viseyaki vi ira na kai Kirisi, ka vavulici ira na kai Kirisi? ³⁶ A vosa cava beka koya sa tukunia ko koya, 'Dou na vaqarai au, ka yali ni raicia; ia na vanua ka'u sa qai kinia, dou na yali ni qai rawa kinia'?" ³⁷ Enai otioti ni siga, siga bibi ni Solevu, sa tu ko Jisu ka kaci, ka tukunia, "Kevaka e dua sa via somi, me qai mai vi au ka somi. ³⁸ O koya sa vabauti au, me vaka sa tukunia nai Vola Tabu, ena dave mai na ketena na viuciwai ni wai bula." ³⁹ A sa tukunia ko koya na ka koya baletia na Yalo Tabu, ena yaco vi ira era sa vabauti koya; ni sa bera ni soli na Yalo Tabu; ni sa bera ni varokorokotaki ko Jisu. ⁴⁰ Era lewe levu vi ira na tamata ni ra sa rogocia na vosa koya, era sa tukunia, "Sa dina sai koya koya na Parofita. ⁴¹ "Era tukunia eso, "Sai koya koya na Karisito." Ia eso voki era tukunia, "Oi, ena qai mai Kalili na Karisito? ⁴² sa yali li ni tukunia nai Vola Tabu, ni sa na qai mai na Karisito mai na kawa i Tevita, mai Pecilieema, na koro sa tiko kina ko Tevita?" ⁴³ Ea tubu na visei ena kedra maliwa lia na lewe levu baleti koya. ⁴⁴ A ra sa via vesuki koya e so; ia sa yali e dua sa tarai koya. ⁴⁵ Era sa qai qai mai na ovisa vi ira na bete levu kei ira na Farisi; a ra sa tukunia vi ira, "Dou sa yali ni yadi koya mai ena vuku ni cava? ⁴⁶ Sa tukunia ko ira na ovisa, "E yali e dua na tamata sa vosa me vaka na tamata koya." ⁴⁷ Era sa qai tukunia na Farisi vi ira, "Dou sa vacalai beka koi ikodou voki lia? ⁴⁸ Sa vabauti koya li e dua vi ira na turaga se vi ira na Farisi, se yali? ⁴⁹ ia ko ira na tamata koya, era yali ni kila nai vunau, ena yaco vi ira na cudru ni Kalou." ⁵⁰ Ko Nikotimo (e dua vi ira na Farisi ka a lako ki raici koya eliu) sa tukunia vi ira, ⁵¹ "E virikotori beka ena nomuni lawa ni dodonu me da rogocia na tamata beitaki ni bera ni da vatulewatakia na nona cala?" ⁵² Era sa tukunia vua, "Ko iko voki lia na kai Kalili, ne?" mo vaqara ka kila: ni sa yali e dua na parofita sa tubu mai Kalili. ⁵³ A ra sa dui qai kece lia ki na nodra dui vi vale.