¹ Sa oti na veika koya, sa qai qai ko Jisu ki tai kadua ni wasawasa mai Kalili, mai Taiperia. ² A sa lewe levu sara era sa muri koya, ni ra raicia na veika-mana sa caka ko koya vi ira sa tauvimate. ³ A sa cabetia na ulu-ni-vanua ko Jisu, a sa tiko sobu mai kinia kei ira na nona tisaipeli. ⁴ A sa voleka na kana vata ni qai-sivia era sa solevu kinia na kai Jutia. ⁵ Ni sa qai ta cake ko Jisu, ka raicia ni ra sa lewe levu sara sa qai mai vua, sa tukunia vi Filipi, "Eda na volia mai vi na madrai, me ra kana kinia ko ira koya?" ⁶ Sa tukunia na ka koya me vatovolei koya: ni sa kila ko koya na ka sa nakitia me caka. ⁷ Sa tukunia vua ko Filipi, "Ena yali ni rautia na madrai sa voli ena pene e rua na drau, me ra tauyadua valailai lia. ⁸ E dua vi ira na nona tisaipeli, ko Adriu, a taci i Saimoni Pita, sa tukunia vi koya, ⁹ "Sa tiko koya e dua na gonetagane sa tu vua e lima nai buli madrai parile, ka rua na ika: ia ka yaga vacava koya vi ira na lewe levu vakoya?" ¹⁰ A sa tukunia ko Jisu, "Vosa vi ira na tamata me ra tiko sobu." Ia sa levu na co ena yasana ko ya. A ra sa tiko sobu na tamata, era sa lewe lima beka na udolu. ¹¹ A sa tauria na vibuli madrai ko Jisu, ka vavinavinakatakia, ka vota vi ira na tisaipeli, ia ko ira na tisaipeli, vi ira sa tiko sobu; ka va voki lia kinia na ika me rauti ira. ¹² Ia ni ra sa mamau, sa tukunia ko koya vi ira na nona tisaipeli, "Kumunia vata na tikina lalai sa vo, me kakua ni yali e dua na ka." ¹³ Era sa qai tomikia vata, ka vasinaitia nai su e tinikarua ena tikinia lalai ni buli madrai parile e lima, sa vo vi ira sa kana. ¹⁴ Ia ko ira na tamata, ni ra sa raicia na cakacaka-mana sa caka ko Jisu, era sa tukunia, "Sai koya dina koya na parofita ko ya e dodonu me qai mai ki vuravura." ¹⁵ Ia ni sa kila ko Jisu era sa nakitia me qai mai ka tauri koya vakaukauwa me ra bulia me tui, sa qai dua loa voki yani ki na ulu-ni-vanua. ¹⁶ Ia ni sa raiyavi mai, sa qai sobu ko ira na nona tisaipeli ki matasawa, ¹⁷ ka vodokia na waqa, ka sokotia na wasawasa ki Kapenaumi. A sa butobuto mai na vanua a sa yali ni yaco vi ira ko Jisu. ¹⁸ A sa liwa na cagi kaukauwa ka voravora na wasawasa. ¹⁹ Ia ni sa voce yani e tolu na maile vacaca, era sa raici Jisu ni sa qai voli e dela ni wai, ka torovia na waqa: a ra sa rerevakia. ²⁰ A sa tukunia vi ira ko koya, "Koi au koya; kakua ni rere. ²¹ Era sa qai vinakatia me vodo ki waqa ko koya: a sa qai udu vasauri na waqa ki na vanua era sa qai kinia. ²² Ena savulaci, ko ira na lewe levu era sa tu ena tai kadua ni wai, ni ra sa raicia sa yali mai na vanua gona e dua tani na waqa, ko ya lia ka vodokia ko ira na nona tisaipeli, a sa yali ni vodo vata ki na waqa kei ira na nona tisaipeli era a soko yani vakai ira lia; ( ²³ ia ka sa qai mai eso na waqa mai Taiperia, sa voleka ki na yasana era a kana madrai kinia, ni sa vavinavinakatakia oti na Turaga:) ²⁴ ni ra sa raicia na lewe levu sa yali ni tiko mai na vanua gona ko Jisu, se ko iratou na nona tisaipeli, era sa vodo voki lia ki waqa, ka qai yani ki Kapenaumi, me vaqarai Jisu. ²⁵ Ia ni ra sa raici koya mai tai kadua, era sa tukunia vua, "Vavuvuli, ikonu qai mai ki na vanua gona ena gauna cava?" ²⁶ Sa vosa vi ira ko Jisu, ka tukunia, "Edina, e dina, au sa tukunia vi ikodou, Dou sa yali ni vaqarai au ni dou sa raicia na veika-mana, ni dou a kania lia na vibuli madra, ka sa mamau kinia. ²⁷ Dou kakua ni oca me ikodou na kania na kakana e yadia mai na rusa, ia dou kania lia kakana sa tu kinia bula yali ni mudu, o koya ena solia vi ikodou na Luve ni tamata; ni sai koya sa vadinadinatakia na Kalou na Tamana. ²⁸ Era sa qai tukunia vua, "A cava me kimamu caka me rawa ni kimamu caka kinia na cakacaka sa vinaka vua na Kalou?" ²⁹ A saumia ko Jisu ka tukunia vi ira, "Koya na cakacaka ni Kalou: mo dou vabauti koya sa tala mai ko koya." ³⁰ A ra sa tukunia vua, "A cava nai vatakilakila ko sa caka, me kitou raicia ka vabauti ikonu? a cava ikonu na caka? ³¹ a noda qase era a kania na mana e na veikau; me vaka sa volai, "Sa solia vi ira ko koya na madrai mai lomalagi me ra kania." ³² Sa qai saumia voki ko Jisu ka tukunia, "E dina, e dina, e a yali ni solia ko Mosese vi ikodou na madrai mai lomalagi; ko Tamaqu lia sa solia vi ikodou na madrai mai lomalagi. ³³ Ni sai koya koya na madrai sa mai vua na Kalou, ka sobu mai lamalagi, sa solia na bula vi ira na kai vuravura. ³⁴ Era sa qai tukunia vua, "Ikonu na Turaga, solia mai vi kimamu na madrai koya ena vigauna." ³⁵ A sa tukunia vi ira ko Jisu, "Koi au na madrai ni bula; ko koya sa qai mai vi au, ena yali ni viakana; ia ko koya sa vabauti au, ena yali ni via somi voki. ³⁶ Ia ka'u a tukunia vi ikodou, "Dou a raici au, ka yali ni vabautia. ³⁷ Ko ira kece lia sa solia mai vi au ko Tamaqu, era na qai mai vi au: ia ko koya ena qai mai vi au, au na yali sara ni dainia tani. ³⁸ Niu sa yali ni qai sobu mai lomalagi me'u caka na lomaqu, me'u caka lia na loma i koya sa talai au mai. ³⁹ Ia sai koya koya na lomai koya sa talai au mai, me'u kakua ni vayalia e dua vi ira sa solia mai vi au ko koya, ka me'u vaturia cake voki ena siga mai muri. ⁴⁰ Ia sai koya koya na loma i Tamaqu, mera rawatia yadua na bula yali ni mudu ko ira sa raicia na Luvena, ka vabautia; ia ka'u na vaturi koya cake ena siga mai muri. ⁴¹ Era a qai vosa kudrukudrutaki Jisu ko ira na kai Jutia, baletia ni a tukunia, " Koi au na na madrai sa qai sobu mai lomalagi." ⁴² A ra sa tukunia, "Sa yali li ni ko Jisu na luvei Josefa, ka da kila vinaka sara lia na tamana kei na tinana? Ia, e sa qai tukunia vacava mai ko koya, 'Au sa qai sobu mai lomalagi'?" ⁴³ A sa saumia ko Jisu ka tukunia vi ira, "Dou kakua ni vosa kudrukudru. ⁴⁴ E yali ni dua e rawatia me qai mai vi au vakavo ke sa vayarayaratakia mai ko Tamaqu, o koya ka talai au mai: ia ka'u na vaturi koya cake ena siga mai muri. ⁴⁵ Era a vola na parofita eso, 'Na Kalou ena vavulici ita yadua.' Koi ita yadua sa rogocia ka vuli mai vi Tamaqu ena qai mai vi au. ⁴⁶ E se yali ni raicia na Tamaqu e dua na tamata, ko koya dua loa lia sa qai mai vua na Kalou, sa raici Tamaqu ko koya. ⁴⁷ E dina, e dina, au sa tukunia vi ikodou, O koya lia sa vabauti au sa rawatia na bula yali ni mudu. ⁴⁸ "Koi au na madrai ni bula. ⁴⁹ Ko ira na nomuni matua a ra a kania na mana mai na veikau, ka ra sa mate. ⁵⁰ Sai koya koya na madrai, sa qai sobu mai lomalagi, me ra kania na tamata, ka yali ni mate. ⁵¹ Koi au na madrai bula sa qai sobu mai lomalagi; kevaka sa dua e kania na madrai koya, ena bula ka yali ni mudu: ia na madrai ka'u na solia sa lewequ, o koya ka'u na solia me ra bula rawa kinia ko ira na kai vuravura." ⁵² Era a qai vileti vakai ira na kai Jutia, ka tukunia, "E na solia rawa vacava na tamata koya na lewena me da kania?: Sa qai tukunia vi ira ko Jisu, ⁵³ "E dina, e dina kevaka sa yali ni kania na lewe ni Luve ni tamata ka somia na nona dra, sa yali vi ikodou na bula. ⁵⁴ O koya sa kania na lewequ ka somia na noqu dra ena rawatia na bula yali ni mudu, ka'u na vaturi koya cake ena siga mai muri. ⁵⁵ Ni lewequ e kakana dina ki na noqu dra sa wai dina ni somi. ⁵⁶ O koya e kania na lewequ ka somia na noqu dra sa tu vi au, koi au voki lia sa tu vi koya. ⁵⁷ Me vaka sa bula tiko ko Tamaqu sa talai au mai, au sa bula voki lia ena vuku i tamaqu; sa vaka voki lia kinia ko koya sa kani au, ena bula ena vukuqu. ⁵⁸ Sai koya koya na madrai sa qai sobu mai lomalagi: sa yali ni tautauvata kinia kei na mana sa kania ko ira na nomudou matua, a ra sa mate lia: ko koya sa kania na madrai koya, ena bula ka yali ni mudu." ⁵⁹ Sa vosatakia na veika koya ko koya ena valenilotu, ni sa vatavuvuli tiko mai Kapenaumi ⁶⁰ Era sa lewe levu vi ira na nona tisaipeli ni ra rogocia era sa tukunia, "A vosa mama koya: ko cei sa vabautia rawa?" ⁶¹ Ko Jisu, baletia ni kila i lomana ni ra sa vosa kudrukudru voki lia na nona tisaipeli ena ka koya, sa tukunia vi ira, "Sa valeqai ikodou na ka koya, ne?" ⁶² Ena vabeka evei kevaka dou na raicia na Luve ni tamata ni sa qai cake ki na tikinia ka a tiko kinia eliu. ⁶³ Na yalo sa solia na bula: na lewena sa yali ni yaga: a vosa ka'u vosatakia vi ikodou sa vayalo, ka sa vu-ni-bula. ⁶⁴ Ia ka so vi ikodou sa yali ni vabautia. Ni sa kilai ira mai na i vatekivu ko Jisu era sa ni vabautia, ki koya ena soli koya yani . ⁶⁵ A sa tukunia, "O koya koya ka'u a tukunia kinia vi ikodou, Sa yali e dua na tamata sa qai rawa mai vi au, kevaka a yali ni solia vua ko Tamaqu." ⁶⁶ A ka koya era sa suka tani kinia e lewe levu vi ira na nona tisaipeli, a ra sa yali voki ni qai vata kaya. ⁶⁷ Sa qai tukunia ko Jisu vi ira na lewe tinikarua, "Dou sa via qai voki lia ko ikodou?" ⁶⁸ Sa qai tukunia vua ko Saimoni Pita, "Ikonu na Turaga, kitou na qai vi cei? sa tu lia vi ikonu na vosa ni bula yali ni mudu: ⁶⁹ ia kitou sa vabautia ka kila, ni sai ikonu na Karisito, na Luve ni Kalou bula." ⁷⁰ Sa tukunia vi ira ko Jisu, "Au a yali li ni digitaki ikodou na lewe tinikarua, ia ka sa dua vi ikodou sa nonai to na tevoro?" ⁷¹ Sa vosataki Jutasa, na luve i Saimoni Isikarioti, ni sai koya ka na bukiveretaki Jisu, a sa dua vi ira na lewe tinikarua ko koya.