¹ Sa oti na veika koya sa dua na nodra so levu na kai Jutia; a sa qai cake ki Jerusalemi ko Jisu. ² Ia sa tu mai Jerusalemi e dua nai silisili e voleka ki na matamata-ni-koro ni sipi, a yacana ena vosa va-Iperiu ko Peceseita, a sa lima na kena vale. ³ Sa lewe levu era tauvi-mate sa davo kinia, ko ira na mataboko, na lokiloki, na wamalai, era sa wawa me vayavalati mada na wai. ⁴ Ni sa qai sobu mai e dua na agilose ena gauna eso ki nai silisili, ka vayavalatia na wai: ia ko koya sa sobu kinia e liu ni sa vayavalati na wai, sa bula mai na mate kece lia sa tauvi koya. ⁵ A sa tiko kinia e dua na tamata, sa tauvi mate tu ka yabaki tolusagavulu ka mani walu. ⁶ Ni sa raicia ko Jisu ni sa davo koto, ka kila sa dede, sa tukunia vua, "Ko sa via bula, se yali?" ⁷ Sa tukunia vua ko koya sa tauvi mate, "Sa yali, beka, e dua na noqu tamata me yadi au ki nai silisili ni sa vayavalati na wai; ia ni'u sa qai tiko kinia, sa liu sobu vi au e dua tani." ⁸ Sa tukunia vua ko Jisu, :Tu cake, tauria cake na nomui mocemoce, ka qai." ⁹ A sa vasauri lia na nona bula vinaka na na tamata ko ya, ka tauria cake na nonai mocemoce, ka qai: ia na siga ko ya na siga ni vacecegu. ¹⁰ O koya koya era sa tukunia kinia na kai Jutia vi koya sa vabulai, "A sa siga ni vacecegu koya: sa yali ni tara vi iko mo colatia nai mocemoce," ¹¹ Sa tukunia vi ira ko koya, "O koya sa vabulai au, sa tukunia vi au ko koya, 'Tauria cake na nomui mocemoce, ka qai.'" ¹² A ra sa qai tarogia vua, "Ko cei na tamata sa tukunia vi iko, 'Tauria cake na nomui mocemoce, ka qai'?" ¹³ Ia ko koya sa vabulai, sa yali ni kila se ko cei ko koya; ni sa yali ni kila se ko cei ko koya ni sa qai lo yani ko Jisu, ka ni ra sa lewe levu ena tikinia ko ya. ¹⁴ Sa oti na veika koya sa raici koya ko Jisu ena valenisoro, ka tukunia vua, "Raicia, ko sa qai bula vinaka; kakua ni valavala ca voki, de yaco vi iko e dua na ka e ca valevu cake. ¹⁵ Ia ni sa lesu voki na tamata koya, a sa tukunia vi ira na kai Jutia ni sai Jisu ka vabulai koya. ¹⁶ Ia ena vuku ni ka koya sa vacacani Jisu ko ira na kai Juta, ni sa caka ko koya na veika koya ena siga ni vacecegu. ¹⁷ A sa tukunia vi ira ko Jisu, "Sa cakacaka tiko lia ko Tamaqu, koi au voki lia, au sa cakacaka." ¹⁸ Ena vuku ni ka koya era sa gadrevia valevu kinia na kai Jutia me ra vamatea, ni sa yali ni vacacana loa lia ko koya na siga ni vacecegu, ia ka sa tukunia voki lia sa Tamana dina na Kalou, a sa vatauvatani koya kinia ki na Kalou. ¹⁹ Sa qai vosa ko Jisu, ka tukunia vi ira, E dina, e dina, au sa tukunia vi ikodou, E yali ni rawatia vakai koya lia e dua na ka na Luvena, na ka lia sa raicia ni caka ko Tamana; ia na veika sa caka ko koya, sa caka va voki lia kinia na Luvena. ²⁰ Ni sa lomania na Luvena ko Tamana, a sa vatakila vua na ka kece lia sa caka ko koya; ia ena varaitakia vua na cakacaka eso sa uasivi cake e na veika koya, mo dou kurabui kinia. ²¹ Me vaka sa vaturi ira cake na mate ko Tamana, ka vabula, sa vakinia na Luvena o koya sa vabulai ira sa vinakatia. ²² Ni sa yali ni lewa e dua na tamata ko Tamana, ia sa lesia kinia na Luvena me ia na lewa kece lia; ²³ me ra varokorokotakia na Luvena na tamata kece lia, me vaka era sa varokorokotakia na Tamana. O koya sa yali ni varokorotakia na Luvena, sa yali ni varokorokotaki Tamana ka talai koya mai. ²⁴ E dina, e dina, au sa tukunia vi ikodou, O koya sa rogocia na noqu vosa, ka vabauti koya sa talai au mai, sa rawatia na bula yali ni mudu, ena yali voki lia ni cudruvi; ka sa qai mai na mate ki na bula. ²⁵ E dina, e dina, au tukunia vi ikodou, Sa qai mai na gauna, ia sa yaco ni kua, me ra rogocia na domo ni Luve ni Kalou ko ira na mate: ia ko ira sa rogocia era na bula. ²⁶ Me vaka sa bula vakai koya lia ko Tamana; sa solia voki lia vua na Luvena me bula vakai koya lia; ²⁷ a sa lesi koya voki lia me caka na lewa, ena vuku ni sa Luve ni tamata. ²⁸ Dou kakua ni kurabui ena ka koya: ni sa qai mai na gauna era na rogocia kinia na domona ko ira kece lia enai bulubulu, ²⁹ a ra na qai mai kinia; ko ira sai valavala vinaka, era na tu cake voki me ra bula; ia ko ira sai valavala ca, era na tu cake voki me ra cudruvi. ³⁰ Au sa yali ni caka rawa e dua na ka vakai au lia: au sa lewa me vaka na ka ka'u sa rogocia: a sa dodonu na noqu lewa; ni'u sa yali ni muria na lomaqu, a loma i Tamaqu lia ko koya sa talai au mai. ³¹ Kevaka sai au lia sa tukuni au, sa yali ni dina na noqui tukutuku. ³² Sa dua tani sa tukuni au, ia ka'u sa kila sa dina nai tukutuku sa tukuni au kinia ko koya. ³³ Dou a talaki vi Joni, a sa tukunia na ka dina ko koya. ³⁴ Ia ka sa yali ni yaga vi au me ra tukuni au na tamata: ia ka'u sa tukunia lia na veika koya, mo dou bula kinia. ³⁵ Ko koya koya na rarama lia sa caudre tu cila mai, ia dou a vinakatia vadede valailai lia mo dou reki ena kena rarama. ³⁶ Ia nai tukutuku ka'u sa tukuni kinia sa levu, ka lailai nai tukutuku i Joni; a cakacaka sa solia mai vi au ko Tamaqu me'u vaotia, a cakacaka koya ka'u sa caka tiko, sa tukuni au, ni sa talai au mai ko Tamaqu. ³⁷ Ia ko Tamaqu, ko koya sa talai au mai, sa dautukuni au. Dou a yali ni rogocia na domona ena dua na siga, se raicia na nonai tovo. ³⁸ A sa yali ni tiko ena lomamudou na nona vosa; ni dou sa yali ni vabauti koya sa tala mai ko koya. ³⁹ Dou sa vaqara enai Vola Tabu; ni dou sa nanumia dou sa rawatia kinia na bula yali ni mudu: ia nai vola koya sa tukuni au. ⁴⁰ Ia dou sa yali ni qai mai vi au, mo dou rawatia kinia na bula. ⁴¹ Sa yali ni yaga vi au me ra varokorokotaki au ko ira na tamata. ⁴² Ia ka'u sa kilai ikodou, ni sa yali ni tiko ena lomamudou na loloma vua na Kalou. ⁴³ Au sa qai mai ena yaca i Tamaqu, ia dou a yali ni vakabauti au: kevaka sa qai mai e dua tani ena yacana loa lia, dou na vabauti koya. ⁴⁴ Dou sa vabautia rawa vaevei, ni dou sa vivarokorokotaki tiko vakai ikodou ka yali ni gadrevia na varokoroko sa qai mai vua na Kalou dua loa lia? ⁴⁵ Dou kakua ni nanumia ni'u na beitaki ikodou vi Tamaqu; sa dua sa beitaki ikodou tiko, ko Mosese, ko koya dou sa vararavi kinia. ⁴⁶ Kevaka dou a vabauti Mosese, dou na vabauti au; ni sa volai au ko koya. ⁴⁷ Ia kevaka dou sa yali ni vadinatia na nonai vola, dou na vadinatia vaevei na noqu vosa?