¹ Ni sa qai kila na Turaga era sa rogocia ko ira na Farisi ni ra lewe levu sa lotutakia ko Jisu ka papitaisotakia, ka lewe lailai lia ko Joni, ( ² ia ni sa yali ni vipapitasotaki ko Jisu, ko ira lia na nona tisaipeli,). ³ a sa daini Jutia, ka qai voki ki Kalili. ⁴ A sa koto na nona sala e loma ni vanua ko Samaria. ⁵ Sa qai yaco ki na dua na koro mai Samaria, a yacana ko Saika, e voleka lia ki na tiki ni vanua sa solia ko Jekope vi Josefa na luvena. ⁶ A sa tu mai kinia nai keli-wai ni Jekope. Ni sa oca ko Jisu ena nona qai, sa mai tiko sobu ena bati ni keli-wai: ka sa voleka na kenai ka ono ni aua. ⁷ Sa qai mai e dua na yalewa ni Samaria me taki wai: sa tukunia vua ko Jisu, "Solia mai vi au me'u somi." ⁸ Ni ra a qai yani na nona tisaipeli ki na koro me voli kakana. ⁹ Sa qai tukunia vua na yalewa ni Samaria, "Ni ko sa kai Jutia, ko sa kerea vacava vi au mo somi, ni'u sa yalewa ni Samaria? (ni ra sa yali ni viriti ko ira na kai Jutia, ki ira na kai Samaria.) Sa vosa ko Jisu ka tukunia vua, ¹⁰ "Kevaka ko sa kila nai solisoli ni Kalou, ki koya voki lia sa tukunia vi iko, 'Solia mai vi au me'u somi;' ko sa qai kerea vua, ka na solia vi iko ko koya na wai ni bula," ¹¹ Sa tukunia vi koya na yalewa, "Sa yali beka, na nomui takitaki, a sa titobu nai keli-wai: ko sa rawatia mai vi na wai bula koya? ¹² ko sa uasivi cake beka vi Jekope, a tamai kimamu, ko koya ka solia vi kimamu nai keli-wai, ka somi kinia ko koya, ki iratou na luvena, kei na nona manumanu?" ¹³ Sa vosa ko Jisu, ka tukunia vua, "O koya yadua sa somia na wai koya ena via somi voki: ¹⁴ ia ko koya sa somia na wai ka ka'u na solia vua, ena yali sara ni via somi, ka yali ni mudu: ia na wai ka'u na solia vua, ena tu e na lomana me mata-ni-wai sa tovure ki na bula yali ni mudu." ¹⁵ Sa tukunia vi koya na yalewa, "Solia, beka, mai vi au na wai koya, me'u kakua ni via somi, se qai mai ki na vanua gona me'u taki." ¹⁶ Sa tukunia vua ko Jisu, "Laki kacivia na watimu, ka mo drau qai mai ki na vanua gona." ¹⁷ Sa vosa na yalewa, ka tukunia, Sa yali na watiqu:" Sa tukunia vua ko Jisu, "Ko sa tukunia dina, Sa yali na watimu: ¹⁸ ni sa lewe lima na watimu eliu; ia ko koya drau sa tiko vata koya sa yali ni watimu: ko sa vosa dina ena ka ko ya." ¹⁹ Sa tukunia vi koya na yalewa, " Au sa qai kila, beka, sa dua na parofita koi ikonu. ²⁰ Era sa dausoro na nimamu qase ena ulu-ni-vanua koya; ia dou sa tukunia sa tu mai Jerusalemi na tikinia e dodonu me da soro kinia." ²¹ Sa tukunia vua ko Jisu, "Yalewa, vadinatakia na noqu vosa: ena qai mai na gauna dou na yali ni lotu kinia vi Tamada, ena ulu-ni-vanua koya, se mai Jerusalemi. ²² Dou sa lotu vi koya dou sa yali ni kila: kimamu sa kilai koya kimamu sa lotu vua: ni sa tubu mai vi ira na kai Jutia nai Vabula. ²³ Ia ena qai mai na gauna, a sa qai yaco mai, era na lotu vayalo ka vaidina vi Tamada ko ira sa lotu dina; ni sa qara ko Tamada me va koya ko ira sa lotu vua. ²⁴ A Yalo na Kalou: ia ko ira sa lotu vua, e dodonu me ra lotu vayalo ka vaidina." ²⁵ Sa tukunia vi koya na yalewa, "Au sa kila ni na qai mai na Mesaia; (Ko koya sa vatokai na Karisito): ni sa tadu mai ko koya, ena tukunia vi ita na ka kece lia." ²⁶ Sa tukunia vua ko Jisu, "Sai au lia sa qai vosa tiko vi iko." ²⁷ A sa qai qai mai ko ira na nona tisaipeli, a ra sa kurabuitakia ni rau sa vivosaki ki na yalewa: ia ka yali e dua na tamata sa tarogia, "A cava ko sa vaqara?" se, "Drau vivosaki kaya ena vuku ni cava?" ²⁸ Sa qai dainia na nonai takitaki na yalewa, ka qai yani ki na koro, ka tukunia vi ira na tamata, ²⁹ "Dou qai mai ka qai ki raicia na tamata koya, ko koya sa tukunia mai vi au na ka kece lia ka'u a caka: sai koya koya na Karisito, se yali?" ³⁰ A ra sa qai qai tani yani ena koro, ka qai mai vua. ³¹ Ia ni sa bera mai, sa qai cikevi koya ko ira na tisaipeli, ka tukunia, "Vavuvuli, mo kana mada. ³² A sa tukunia vi ira ko koya, "Sa tu vi au na kakana me'u kania, dou sa yali ni kila." ³³ Sa qai vitarogi ko ira na tisaipeli, "Sa dua li na tamata e kau kakana mai vi koya" ³⁴ Sa tukunia vi ira ko Jisu, "A qau kakana me'u caka na loma i koya sa talai au mai; ka me'u vaotia lia na nona cakacaka. ³⁵ 'Dou sa yali ni tukunia, sa vo e va na vula, me qai cava mai na yabaki?' raicia, au sa tukunia vi ikodou, Dou ta cake, ka raicia na viwere, sa voleka ni matua na yabaki. ³⁶ Ia ko koya sa tamusukia sa saumia, ka binia na vuana ki na bula yali ni mudu; me rekitakia vata ko koya sa kaburakia kei koya sa tamusukia. ³⁷ A sa dina kinia na vosa koya, E dua sa kaburakia, ia sa tamusukia e dua tani. ³⁸ Au a talai ikodou mo dou tamusukia na ka dou a yali ni cakacaka kinia: eso tani era a cakacaka, ia dou sa rawatia na vua ni nodra cakacaka. ³⁹ A ra sa lewe levu na kai Samaria ena koro ko ya era sa vabauti koya ena vuku ni nona vosa na yalewa, ko koya sa vatakilatakia, "Sa tukunia mai vi au ko koya na ka kece lia ka'u a caka." ⁴⁰ Ia ni ra sa qai mai vua ko ira na kai Samaria, era sa masuti koya me tiko lia ki ira; a sa tiko lia mai na vanua gona ka bogi rua. ⁴¹ A ra sa lewe levu voki lia sa vabautia ena vuku ni nona vosa; ⁴² a ra sa tukunia vua na yalewa, "Koya kimamu sa yali ni vabautia ena vuku ni nomu vosa lia: ni kimamu sa rogocia koi kimamu, ka kila ni sai koya dina koya na nodrai Vabula na kai vuravura." ⁴³ Sa oti na bogi rua sa qai dainia mai na vanua ko ya, ka yaco ki Kalili. ⁴⁴ A sa vatakilatakia ko Jisu, ni sa yali e dua na parofita sa dokai e nona vanua. ⁴⁵ Ni sa qai tadu mai ki Kalili ko koya, sa vacegui koya ko ira na kai Kalili, ena vuku ni ra a raicia na ka kece lia sa caka ko koya mai Jerusalemi ena solevu, ni ra a qai voki lia ko ira ki na solevu. ⁴⁶ A sa qai voki mai ko Jisu ki Kena e Kalili, a koro sa vukicia kinia na wai me waini. Ka sa dua na turaga sa tauvimate na luvena mai Kapenaumi. ⁴⁷ Ni sa rogocia ko koya sa qai mai Jutia ko Jisu ki Kalili, sa qai kinia, ka masutia me qai sobu ka vabula na luvena: ni sa varau ciba. ⁴⁸ Sa qai tukunia vua ko Jisu, "Kevaka dou yali ni raicia eso na ka-mana ki na ka vivakurabuitaki, dou na yali ni vabautia." ⁴⁹ Sa tukunia vi koya na turaga, "Qai sobu, saka, mai, de mate mada na luvequ." ⁵⁰ Sa tukunia vua ko Jisu, "Qai yani; sa bula na luvemu." A sa vadinatia na tamata na vosa sa tukunia vua ko Jisu, a sa qai yani ko koya. ⁵¹ Ia ni sa qai sobu tiko, eratou sa mai tavaki koya na nona tamata, a ratou sa tukunia vua, "Sa bula na luvemu." ⁵² Sa qai tarogia vi iratou ko koya na aua sa vatekivu kinia ko koya me bula cake. A ratou sa tukunia vua, "Sa takali vi koya na katakata ena noa e nai kavitu ni aua." ⁵³ A sa kila kinia na tamani ni sai koya koya na aua ka tukunia kinia vua ko Jisu, "Sa bula na luvemu;" a sa vabautia ko koya, kei ira kece lia na nona lewe-ni-vale. ⁵⁴ Koya voki nai karua ni ka-mana sa caka ko Jisu, ni sa qai mai Jutia kei Kalili.