¹ Sa dua na tamata vi ira na Farisi ka yacana ko Nikotimo, e dua na nodra turaga na kai Jutia: ² sa qai mai ko koya koya vi Jisu ena bogi, ka tukunia vua, "Vavuvuli, kitou sa kila ni ikonu sa qai mai vua na Kalou mei vavuvuli ni sa yali e dua na tamata e caka rawa na veika mana koya ko ni sa caka, kevaka e rau sa yali ni tiko kaya na Kalou." ³ Sa tukunia ko Jisu, ka cavutia vua, E dina, E dina, au sa tukunia vi iko, Kevaka sa yali ni sucu voki na tamata, ena yali ni raicia rawa na matanitu ni Kalou. ⁴ Sa tukunia vua ko Nikotimo, "sa sucu rawa vaevei na tamata ni sa qai mai ko koya, sa curu rawa varua ki na kete i tinana, me sucu mai? ⁵ Sa tukunia ko Jisu, E dina, e dina, au sa tukunia vi iko, Kevaka sa yali ni sucu e dua ena wai kei na Yalo Tabu, ena yali ni curu rawa ki na matanitu ni Kalou. ⁶ Sa vayago ko koya sa sucu ena yago; ia sa vayalo ko koya sa sucu ena yalo. ⁷ Kakua ni kurabui ni'u sa tukunia vi iko, "e dodonu mo dou sucu voki." ⁸ Sa liwa na cagi ki na yasana sa digitakia, ia ko sa rogocia na kena rorogo, ka yali ni kila na yasana sa qai mai kinia; se na yasana sa qai yani kinia: sa va voki lia kinia ko koya yadua sa sucu ena Yalo Tabu. ⁹ Sa saumia ko Nikotimo ka tukunia vua, "Sa rawa vaevei na veika koya?" ¹⁰ Sa cavutia ko Jisu, ka tukunia vua, "O iko na nodrai vavuvuli na Isireli ka yali ni kila na veika koya, ne?" ¹¹ E dina, e dina, au sa tukunia vi iko, kitou sa vosatakia na ka kitou sa kila, ka tukunia na ka kitou sa kila, ka tukunia na ka kitou a raicia, ia dou sa yali ni vabautia na nitoui tukutuku. ¹² Kevaka ka'u sa tukunia vi ikodou na veika vavuravura, ikodou sa yali ni vabautia, dou na vabautia vaevei, kevaka kau sa tukunia vei ikodou na veika valomalagi?" ¹³ A sa yali ni dua na tamata sa qai cake ki lomalagi, a Luve-ni-tamata, ko koya sa tiko mai lomalagi ¹⁴ Ia me vaka sa lavetia cake na gata ko Mosese mai na vikau, e dodonu me laveti cake voki lia na luve ni tamata: ¹⁵ me kakua kinia ni rusa ko ira yadua sa vabauti koya me ra rawatia lia na bula yali ni mudu. ¹⁶ Ni sa lomani ira na kai vuravura va koya na Kalou, me solia kinia na Luvena e dua loa lia sa vatuburia, me kakua ni rusa ko ira yadua era sa vabautia, me ra rawatia lia na bula yali ni mudu. ¹⁷ Ni sa yali ni tala mai na Luvena ki vuravura na Kalou me cudruvi ira na kai vuravura; me bula lia ko ira na kai vuravura ena vukuna. ¹⁸ O koya sa vabautia sa yali ni na cudruvi: ia ko koya sa yali ni vabautia sa na qai cudruvi, ni sa yali ni vabautia na yaca ni Luve ni Kalou e lewe dua loa lia sa vatuburia o koya. ¹⁹ Ia ko koya koya era sa cudruvi kinia, ni sa qai mai na rarama ki vuravura, a ra sa vinakatia na butobuto na tamata, ka catia na rarama, ni sa ca na nodrai valavala. ²⁰ Ni sa catia na rarama o koya yadua sai valavala ca, a sa yali ni qai ma ki na rarama, de raici na nonai valavala. ²¹ Ia ko koya na muria nai valavala dina sa qai mai ki na rarama, me varaitakia na nonai valavala ni sa vinaka vua na Kalou. ²² Ni sa oti na veika koya, sa qai ko Jisu ki ira voki lia na tisaipeli ki na vanua ko Jutia; a sa tiko mai kinia ki ira, ka vipapitaisotaki. ²³ A sa vipapitaisotaki ko Joni voki lia mai Inoni sa voleka ki Selimi ni sa levu mai kinia na wai: a sa qai mai eso ka ra sa papitaisotaki. ²⁴ Ni sa bera ni dai ki vale ni vivesu ko Joni. ²⁵ Sa qai viletitakia ko ira na tisaipeli i Joni ki na dua na kai Jutia ena vuku ni vi vasavasavataki. ²⁶ A ra sa qai mai vi Joni, ka tukunia vua, "Vavuvuli, ko koya drau sa tiko kaya ena tai kadua ni Joritani, ko koya ko a tukunia, raicia, sa vipapitaisotaki tiko ko koya, sa qai mai vua ko ira na tamata kece lia." ²⁷ Sa vosa ko Joni, ka tukunia, "E yali e dua na tamata sa rawatia e dua na ka, kevaka sa yali ni soli vua mai lomalagi. ²⁸ Dou sa tukuni au niu sa tukunia, 'Au sa yali ni Karisito koi au, ia ka'u sa vayadi mai me'u liutaki koya.' ²⁹ Sa nei koya na tagane sa qai vakawati ko koya na watina, ia na weka ni tagane, ko koya sa tu ka rogocia na nona vosa sa rekitakia valevu na domo ni tagane: sa qai vayacoria vakinia na noqu reki koya. ³⁰ Sa dodonu me levu cake tiko ko koya, ia me'u lailai sobu tiko lia koi au. ³¹ O koya sa qai mai cake, sa uasivi vi ira kece lia na tani: ko koya sa tubu lia e vuravura sa vavuravura, a sa vosatakia na ka vavuravura ko koya sa qai mai lomalagi sa uasivi vi ira kece lia na tani. ³² Ia na ka sa raicia ka rogocia ko koya sa tukunia koya; a sa yali e dua na tamata sa vabautia na nonai tukutuku. ³³ O koya sa vabautia na nonai tukutuku sa vadinadinatakia koya, ni sa dina na Kalou. ³⁴ O koya sa tala mai na Kalou, sa vosatakia na vosa ni Kalou; ni sa solia vayauyau na Yalo Tabu na Kalou. ³⁵ Sa lomania na Luvena ko Tamana, a sa solia na ka kece lia ki ligana. ³⁶ O koya sa vabautia na Luvena sa rawatia na bula yali ni mudu: ko koya sa yali ni vabautia na Luvena, ena yali ni raicia na bula a sa tiko lia vei koya na cudru ni Kalou.