¹ Sa bogi tolu sa qai caka e dua na vawati mai Kena e Kalili; a sa tiko kinia na tinai Jisu: ² a sa sureti ko Jisu, kei iratou voki lia na tisaipeli, ki na soqo ni vawati. ³ Ia ni sa oti na waini, sa tukunia vi Jisu na tinana, "Sa yali vi ira na waini" ⁴ Sa tukunia vua ko Jisu, "Yalewa a cava vi iko kei au, sa yali ni yaco mai na noqu gauna." ⁵ Sa tukunia vi ira na tamata ko tinana, "A ka kece lia sa tukunia vi ikodou ko koya, dou caka." ⁶ Ia sa tu mai kinia e ono na saqa vatu ni wai, sa dau vasavasavataki ira kinia na kai Jutia sa tauyarua se tauyatolu nai vakarau. ⁷ Sa tukunia vi ira ko Jisu, " Vasinaitia na saqa ni wai e na wai." A ra sa vasinaitia me vuabale sara. ⁸ A sa tukunia vi ira ko koya, "Dou qai talocia, ka yadia vua sa lewa na magiti," A ra sa yadia. ⁹ Ia ni sa tovolea na wai sa vuki me wai ko koya sa lewa na magiti, a sa yali ni kila se sa mai vei: (ia ko ira na tamata sa takivia na wai era sa kila,) ko koya sa lewa na magiti sa kacivia na wati ni yalewa, ¹⁰ ka tukunia vua, "A tamata yadua sa dautaucia e lia na waini vinaka: ia ni ra sa somia vakalevu na tamata, sa qai muri na waini sa vinaka valailai lia! ia ko iko, ko sa maninitakia na waini vinaka ka yacovia na tikini siga koya." ¹¹ Ai vatekivu koya ni cakacaka mana sa caka o Jisu mai Kena e Kalili, a sa varaitakia kinia na nonai ukuuku: a sa vabauti koya ko iratou na nona tisaipeli. ¹² Ni sa oti koya eratou sa qai sobu ki Kapenaumi, ko koya, kei na tinana kei iratou voki lia na tacina, kei iratou voki lia na nona tisaipeli; a ratou sa yali ni bogi levu kinia. ¹³ A sa voleka na nodra kana vata ni qai sivia na kai Jutia; a sa qai cake ki Jerusalemi ko Jisu; ¹⁴ a sa raici ira ena valenisoro era sa volitakia eso na bulumakau kei na sipi, kei na ruve, kei ira voki lia sa visau i lavo era sa tiko voki lia. ¹⁵ Ia ni sa caka oti e dua na kuita wa qaliqali, sa vasavi ira kece lia mai na valenisoro, vata kei na sipi, vata kei na pulumakau; a sa sovarakia yani na nodrai lavo era sa visau i lavo, a sa mani vukicia na nodra tepeli; ¹⁶ a sa tukunia vi ira sa volitaki ruve, "Yadia tani na veika koya; kakua ni caka na vale nei Tamaqu me vale ni vivoli." ¹⁷ A sa nanumia ko iratou na nona tisaipeli ni sa volai, "Sa kani au na loloma katakata ki nomu vale. ¹⁸ Sa qai cavutia ko ira na kai Jutia, ka tukunia vua, "A cava nai vatakilakila ko sa vatakila vi kitou, ni ko sa caka na veika koya?" ¹⁹ Sa cavutia ko Jisu ka tukunia vi ira, "Dou talarakia na vale koya, kau na qai tara vaoti ena bogi e tolu." ²⁰ Era sa qai tukunia na kai Jutia, A vale ni soro koya sa vasagavulu ka mani ono na yabaki ni sa tara tiko: ia ko na tara vaoti li ena bogi e tolu?" ²¹ Ia na vale sa vosatakia ko koya, na yagona. ²² Ni sa qai tu cake voki mai na mate ko koya, sa nanumia ko ira na nona tisaipeli, ni sa tukunia vi ira ko koya na ka koya; a ra sa vadinadinatakia nai Vola Tabu, kei na vosa sa tukunia ko Jisu. ²³ Ia ni sa tiko ko koya mai Jeruisalemi, ni sa caka tiko na kana vata ni qai-sivia, sa lewe levu era sa vadinatia na yacana, ni ra sa raicia na veika-mana sa caka ko koya. ²⁴ A sa yali ni vararavi vi ira ko Jisu, ni sa kilai ira kece lia, ²⁵ a sa yali ni yaga vua me dua me vatakilai ira na tamata: ni sa kila ko koya na ka sa tu voki lia e loma ni tamata.