¹ Ia enai matai ni siga ni wiki, sa qai mai ko Meri na yalewa ni Makitala e na savulaci caca, ni sa butobuto tu, ki nai bulubulu, ka raicia ni sa yadi tani na vatu mai nai bulubulu. ² Sa qai cici ko koya sa lomana ko Jisu ka tukunia vi rau, "Era sa yadia tani na Turaga mai nai bulubulu, ia kitou sa yali ni kila na tikinia era sa vakotori koya kinia." ³ Erau sa qai qai yani ko Pita, ki na tisaipeli kadua, a rau sa qai ki nai bulubulu. ⁴ A rau sa cici vata ruarua: a sa sivi Pita na tisaipeli kadua, ka sa liu ki nai bulubulu. ⁵ A sa cuva sobu ko koya, ka sa rai ki loma; ka raicia nai sole lineni sa no: ia a yali curu ki loma ko koya. ⁶ Sa qai muri mai ko Saimoni Pita, ka curu ki nai bulubulu, ka raicia nai sole lineni sa koto, ⁷ ki nai tavoi sa viviraki ena uluna, ia sa yali ni koto vata ki nai sole lineni, sa lobi dua loa lia koto ena dua na tikinia vaikoya. ⁸ A sa qai curu voki lia na tisaipeli kadua, ko koya sa liu ki nai bulubulu, a sa raicia ko koya, ka vabautia. ⁹ A rau sa yali lia ni kila nai Vola Tabu, ni sa dodonu me tu cake voki mai na mate ko koya, ¹⁰ Oi rau na tisaipeli erau sa qai qai voki ki nodrau vale. ¹¹ Ia sa tu ko Meri e tautuba ni bulubulu, ka tagi: ia ni sa tagi tiko, sa cuva sobu ka rai ki loma ni bulubulu: ¹² a sa raicia e lewe rua na agilose enai sulu vulavula, a rau sa tiko, e dua ki uluna, ka dua ki yavana, ena tikinia ka koto kinia na yago i Jisu. A rau sa tukunia vua, ¹³ "Yalewa, ko sa tagi ena vukuni cava?" Sa tukunia vi rau ko koya, "Ena vuku ni ra sa yadia tani na noqu Turaga, ia kau sa yali ni kila na tikinia era sa vakotori koya kinia." ¹⁴ Ni sa qai vosa vakoya, sa vuki vanadaku, ka raici Jisu ni sa tu, ia sa yali ni kila ni sai Jisu. ¹⁵ Sa tukunia vua ko Jisu, "Yalewa, ko sa tagi ena vuku ni cava? ko ci ko sa vaqara? Sa nanumia ko koya ni sai vatau-ni-were, a sa tukunia vua, Kevaka ko sa yadi koya tani, tukunuia beka vi au na tikinia ko sa vakotori koya kinia, ka'u na qai laki yadi koya tani." ¹⁶ Sa tukunia vua ko Jisu, : "I Meri!" Sa vuki ko koya, ka tukunia ua, Raponai! (a kenai balebale, Vavuvuli) ¹⁷ Sa tukunia vua ko Jisu, "Kakua ni tarai au; ni'u se bera ni qai cake vi Tamaqu; ia mo qai vi ira na wekaqu, ka tukunia vi ira, Au sa qai cake vi koya sa Tamaqu, ka Tamamudou; vi koya sa noqu Kalou, ka nomudou Kalou." ¹⁸ Sa qai yani ko Meri na yalewa ni Makitala, ka tukunia vi ira na tisaipeli "Au sa raicia na Turaga," ka sa tukunia vi koya na ka kece koya. ¹⁹ Ena raiyavi ni siga gona, enai matai ni siga ni wiki, sa sogo tu na darava ni vale, era a soqoni vata tiko kinia na tisaipeli, ni ra sa rerevaki ira na na kai Jutia, sa curu mai ko Jisu ka tu ena kedra maliwa, ka tukunia vi ira, "Dou vacegu." ²⁰ Ia ni sa vosatakia vakoya, sa varaitakia vi ira na ligana ki na sarisarina. A ra sa rekitakia na tisaipeli, ni ra sa raicia na Turaga. ²¹ Sa qai tukunia voki vi ira ko Jisu, "Dou vacegu:" me vaka sa talai au mai ko Tamaqu, au sa talai ikodou vaka voki lia kinia. ²² Ia ni sa vosa vakoya ko koya, sa ceguvi ira, ka tukunia, "Me curumi ikodou na Yalo Tabu:" ²³ nai valavala ca ni tamata yadua dou sa bokocia, ena bokoci: nai valavala ca ni tamata yadua dou sa yali ni serekia, ena yali ni sereki." ²⁴ A sa dua vi ira na lewe tinikarua, ko Tomasi, sa vatokai ko Titimo, sa yali ni tiko vata ki ira ni sa qai mai ko Jisu: ²⁵ Ko iratou na tisaipeli sa tukunia vua, " Kitou a raicia na Turaga." A sa tukunia vi ira ko koya, "Kevaka ka'u na yali ni raicia na we ni vako, ka daramakia na ligaqu ki na sarisarina, au na yali ni vabautia. ²⁶ Ni oti e bogi walu, eratou sa tiko voki e loma ni vale na tisaipeli vata ki Tomasi, ka sa curu mai ko Jisu ni a sogo tu na darava, ka tu e na kedra maliwa, ka tukunia, "Dou vacegu." ²⁷ Sa qai tukunia vi Tomasi, "Dodokia mai na nomui qaqalo, ka raicia na ligaqu: ia dodokia na ligamu ka daramakia ki na sarisariqu: ia mo kakua ni vatitiqatakia, mo vabautia lia. ²⁸ A sa vosa ko Tomasi, ka tukunia vi ira, "Noqu Turaga, ka noqu Kalou!" ²⁹ Sa tukunia vua ko Jisu, "Ni ko sa raici au, Tomasi, ko sa vabautia: sa kalougata ko ira era sa yali ni raicia, ka ra sa vabautia." ³⁰ A sa levu voki na cakacaka-mana sa caka dina ko Jisu ena matadra na nona tisaipeli, a ra sa yali ni volai enai vola koya: ³¹ ia sai koya, mo dou vabautia ni sa Karisito ko Jisu, na Luve ni Kalou; ia mo dou rawatia na bula ena yacana, ni dou sa vabautia.