¹ A sa yadi Jisu ko Pailato ka vakanakuitatakia. ² A sa talia e dua nai sala wa-vavotona ko ira na sotia, ka vaisalataki koya kinia, a ra sa vasulumi ira ena dua nai sulu lokaloka, ³ ka tukunia, "Sa loloma, na nodra Tui na kai Jutia" ka sabici ira ena ligadra. ⁴ Sa qai curu voki yani ko Pailato, ka tukunia vi ira, "Raicia, au sa yadi koya mai vi ikodou, mo dou kila ni'u sa yali ni raicia e dua nai valavala ca vi ira. ⁵ Sa qai curu yani ko Jisu, sa vaisala tu enai sala wa-vavotona, ka vaisulu enai sulu lokaloka. A sa tukunia vi ira ko Pailato, "Raicia, Sa tu koya o koya," ⁶ Ni ra sa qai raici Jisu ko ira na bete levu ki ira na ovisa, era sa qoqolou ka tukunia, "Vakotia ki na kauveilatai, vakotia ki na kauveilatai. Sa tukunia vi ira ko Pailato, "Dou yadi koya ka vakotia ki na kauveilatai: ni'u sa yali ni raicia vi ira e dua nai valavala ca." ⁷ Ko ira na kai Jutia era sa tukunia vua, " Sa dua na nimamu vunau, me mate ko koya, ni sa tukunia ni sa Luve ni Kalou." ⁸ Ni sa qai rogocia na vosa koya ko Pailato, sa levu cake kinia na nona rerevakia; ⁹ a sa curu voki ki na vale ni vilewai, ka tukunia vi Jisu, "O sa qai mai vi?" Ia sa yali ni saumia ko Jisu. ¹⁰ Sa qai tukunia vua ko Pailato, O sa yali li ni vosa mai vi au? ko sa yali beka ni kila ni'u sa rawatia me'u vakoti iko ki na kauveilatai, ka'u sa rawatia voki lia me'u sereki iko?" ¹¹ Sa tukunia ko Jisu, "Ko sa yali ni rawatia e dua na ka vi au, kevaka sa yali ni soli vi iko mai cake: a ka koya sa levu cake kinia na nonai valavala ca sa soli au yani vi iko." ¹² Sa qai vatovolea tiko ko Pailato me sereki Jisu, ia ko ira na kai Jutia, era sa qoqolou, ka tukunia, "Kevaka ko sa sereki koya, ko sa yali ni totaki Sisa: ko koya yadua sa tukunia me tui, sa vosa saqati Sisa." ¹³ Ni sa qai rogocia na vosa koya ko Pailato, sa yadi Jisu yani, ka tiko sobu e nai tikotiko ni vilewai ena tikinia sa vatokai Na Raravatu, ia ena vosa va-Iperiu, ko Kapaca." ¹⁴ a siga koya nai Varau ki na kana vata ni qai-sivia, ia sa kenai ka ono ni aua: a sa tukunia vi ira na kai Jutia ko koya, "Raicia, koya na nomudou Tui!" ¹⁵ A ra sa qoqolou, "Yadia tani, yadia tani, vakotia ki na kauveilatai." Sa tukunia vi ira ko Pailato, "Me'u vakotia li ki na kauveilatai na nomudou Tui?" Ko ira na bete levu era sa tukunia, "Sa yali ni nimamu tui, ko Sisa dua loa lia. ¹⁶ Sa qai soli koya yani vi ira ko koya me vakoti ki na kauveilatai. ¹⁷ A sa colatia na nona kauveilatai ko koya, ka qai yani ki na tikinia sa vatokai "Na vanua ni qavokavoka," sa vatokai ena vosa va-Iperiu, ko "Kolikoca." ¹⁸ a ra sa vakoti koya mai kinia ki na kauveilatai, ka lewe rua voki lia, e dua vaka, ka dua vaka, ki Jisu ena kodrau maliwa. ¹⁹ A sa dua nai vatakilakila sa vola ko Pailato, ka sa toka e cake ena kauveilatai. Sai koya koya na kenai vola, KO JISU NA KAI NASARECI NA NODRA TUI NA KAI JUTIA. ²⁰ A ra sa lewe levu na kai Jutia era sa wilikia nai vatakilakila koya: ni sa voleka ki na koro na tikinia sa vakoti kinia ki na kauveilatai ko Jisu: a sa volai tu ena vosa va-Iperiu, vata ki na vosa va-Kirisi vata ki na vosa va-Roma. ²¹ Era sa qai tukunia vi Pailato ko ira na nodra bete levu na kai Jutia, "Kakua ni vola, 'A nodra Tui na kai Jutia;' ia ni sa tukunia ko koya, 'Oi au na nodra Tui na kai Jutia.' ²² Sa tukunia ko Pailato, A ka ka'u sa vola, ka'u sa vola. ²³ Ia ko ira na sotia, ni ra sa vakoti Jisu ki na kauveilatai, era sa yadia na nonai sulu, ka wasea vava, me ra tauyadua na tikina ko ira na sotia; nai tutuvi voki lia; ia ka sa yali ni bau cula na nonai tutuvi, sa tali taucoko mai na tikinia e colo ka yadia ki ra. ²⁴ O koya era sa vitukuniakia kinia, "Me da kakua ni dresukia, ia me da vawiri madigitakia se na nei cei: me vayacoria kinia nai Vola Tabu, o koya sa tukunia, "Era sa vota na noqui sulu, Ia na noqui tutuvi era vawiri madigi kinia. Ko ira na sotia, era sa caka na veika koya." ²⁵ Ia sa tu voleka ki na kauveilatai i Jisu na tinana vata ki na taci i tinana, ko Meri na wati Kilopa vata ki Meri na yalewa ni Makitala. ²⁶ Ni sa qai raici rau ko Jisu, na tinana vata ki na tisaipeli ka tu volekatia, ko koya sa lomana ko koya, sa tukunia vi tinana, "Yalewa, raicia na luvemu!" ²⁷ Sa qai tukunia vua na tisaipeli, "Raicia na tinamu!" Ia mai na tiki-ni-siga ko ya sa yadi ko ya na tisaipeli ko ya ki nona vale. ²⁸ Ni sa oti koya, ka sa kila ko Jisu sa oti na ka kece lia, me vayacoria kinia nai Vola Tabu, sa tukunia, "Au sa via somi." ²⁹ Ia ka tu e dua na bilo sa sinai ena wai wiwi; a ra sa vasuasuatakia e dua na vutovuto ena wai wiwi ka ciqiria kinia e dua na taba ni isopi, ka vayadia ki na gusuna. ³⁰ Ni sa qai somia na wai wiwi ko Jisu, sa tukunia, "Sa oti." a sa vacuva na uluna ka solia yani na yalona. ³¹ Ia ko ira na kai Jutia, era sa masuti Pailato me musuki na yavadratou ka me ratou yadi tani, e na vuku ni sa siga Varau, me kakua ni rube tu na yagodratou ena kauveilatai ena siga ni vacecegu, (ni sa uasivi na siga ni vacecegu ko ya.) ³² Sa qai qai ko ira na sotia, ka musukia na yavana nai kadua, a yavana voki lia na kenai karua, eratou a vakoti vata kaya ki na kauveilatai. ³³ Ia ni ratou sa qai mai vi Jisu, ka raicia sa mate tu, era sa yali ni musukia na yavadra ³⁴ Ia, sa suakia na sarisarina e dua na sotia ena dua na moto, a sa dave sara mai kinia na dra ki na wai. ³⁵ Ia ko koya ka raicia sa tukunia, a sa dina na nonai tukutuku: a sa kila ko koya ni sa vosa dina, mo dou vabautia. ³⁶ Ni sa caka na veika koya, me vayacoria kinia nai Vola Tabu, Me kakua ni musuki e dua na suina. ³⁷ Ia e dua voki na tiki ni Vola Tabu, sa tukunia, "Era na raici koya era sa suakia." ³⁸ Ia ni sa oti na veika koya, sa masuti Pailato ko Josefa, na kai Arimacea, a tisaipeli i Jisu, ia ka vuni lia ni sa rerevaki ira na kai Jutia, me yadia tani ko koya na yago i Jisu: a sa vatara ko Pailato. Sa qai qai ko koya, ka yadia tani na yago i Jisu. ³⁹ A sa qai vokilia mai ko Nikotimo, ko koya sa qai eliu vei Jisu e na bogi, a sa yadia mai na mura sa viwaki vata kei na yasiyasi, e dua na drauni paudi. ⁴⁰ Erau sa qai yadia na yago i Jisu, ka solega vata enai sole lineni eso kei na ka boi vinaka, me vaka nai valavala ni nodra veibulu na kai Jutia. ⁴¹ Ia ena vanua sa vakoti kinia ko koya; sa tiko volekatia e dua na were, na were koya sa tiko kinia e dua nai bulubulu vou ka se yali ni dua na tamata e bulu kinia. ⁴² Erau sa qai buluti Jisu kinia, ni sa nodra siga Vakarau na kai Jutia; (ka ni sa volekatia nai bulubulu.)