¹ Sa oti na veika koya, sa varaitaki koya voki ko Jisu vi iratou na tisaipeli mai na wai mai Taiperia: ia ka varaitaki koya vakoya: ² Eratou sa tiko vata ko Saimoni Pita vata ki Tomasi, sa vatokai ko Titimo, vata kei Nacanieli na kai Kena e Kalili vata ki rau na luvei Sepete, ka lewe rua voki na nona tisaipeli. ³ Sa tukunia vi iratou ko Saimoni Pita, "Au sa qai ki qoli." Eratou sa tukunia kece vua, "Kitou na qai ki voki lia ki iko." Eratou sa qai yani, ka vodokia sara na waqa; a sa yali rawa e dua ena bogi gona. ⁴ Ia ni savulaci mai, sa tu mai matasawa ko Jisu; ia sa yali ni kila ko ira na tisaipeli ni sai Jisu. ⁵ Sa qai tukunia vi ira ko Jisu, Ragone, "sa tu vi ikodou na kakana, se yali" Era sa tukunia vi ira, "Sa yali." ⁶ A sa tukunia vi ira ko koya, "Dou kolotakia na lawa ki nai matau ni waqa, ka dou na kunea kinia." Era sa qai kolotakia, a ra sa yali ni yavitia rawa, ni sa ka levu sara na ika. ⁷ A ka koya sa tukunia kinia vi Pita na tisaipeli koya ka lomana ko Jisu, "Na Turaga bagi koya". Ni sa rogocia ko Saimoni Pita ni sai koya na Turaga, sa vasulumi koya ena nonai curucuru vagonedau, (ni sa luvawale,) a sa rika ki wai. ⁸ Ia ko ira na tisaipeli tani, era sa soko ena waqa lailai; (ni sa yali ni yawa na vanua, me vaka lia na katu limasagavulu,) a ra sa yaratakia na lawa sa sinai e na ika. ⁹ Ia, ni ra sa qai sobu ki vanua, era sa raicia sa tu na qilaiso sa waqa tu, ki na ika sa tu kinia vata ki na madrai. ¹⁰ Sa tukunia vi ira ko Jisu, "Yadia mai eso na ika dou sa qai rawatia. ¹¹ Sa qai cake ko Saimoni Pita ka yavitia na lawa ki vanua sa sinai ena ika lelevu, e dua na drau limasagavulu ka mani tolu; ia ni sa ka levu vakoya, sa yali ni kabasu na lawa. ¹² Sa tukunia vi ira ko Jisu, "Dou mai katalau." Ia sa yali e dua vi ira na tisaipeli sa doudou me tarogia, "O cei koi ikonu" ni ra sa kila sai koya na Turaga. ¹³ Sa qai qai mai ko Jisu, ka tauria na madrai ki na ika voki lia, ka solia vi ira. ¹⁴ Sai koya koya na kenai ka tolu ni gauna sa varaitaki ira kinia ko Jisu vi ira na nona tisaipeli, ni sa tucake voki mai na mate. ¹⁵ Ni ra sa katalau oti, sa tukunia vi Saimoni Pita ko Jisu, Saimoni, na luvei Jona, ko sa lomani au valevu, ka valailai ko iratou koya, se yali?" Sa tukunia vua ko koya, "Io na Turaga; ko nu sa kila ni'u sa lomani ikonu. Sa tukunia vua ko ira, "Vakani ira na noqu lami. ¹⁶ Sa tukunia voki varua vi koya, Saimoni, na luve i Jona, ko sa lomani au, se yali? Sa tukunia vi ira ko koya, "Io na Turaga; ko ni sa kila ni'u sa lomani ikonu. Sa tukunia vua ko ira, "Vatawana na noqu sipi." ¹⁷ A sa tukunia vatolu vua, "Saimoni, na luve i Jona, ko sa lomani au, se yali? Sa rarawa na loma i Pita ni sa tukunia vatolu vua ko koya, "O sa lomani au, se yali?" A sa tukunia vi ira, "Ikonu na Turaga, ko nu sa kila na ka kece lia; ko ni sa kila ni'u sa lomani ikonu." Sa tukunia vua ko Jisu, "Vakani ira na noqu sipi." ¹⁸ E dina, e dina, au sa tukunia vi iko, Ni ko a gone, ko a dauvauci iko, ka qai vavitalia voli lia; ia ni ko sa qase mai, ko na dodokia na ligamu, ka na vauci iko e dua tani, ka yadi iko ki na tikinia ko na yali ni vinakatia." ¹⁹ Ia sa vosa vakoya ko koya, me vatakila na mate ena varokorokotakia kinia na Kalou ko koya. Ia ni sa vosa oti vakoya, a ra sa tukunia vi Pita,, "Muri au." ²⁰ Sa qai vuki ko Pita, ka raicia na tisaipeli sa lomana ko Jisu, ni sa muri tiko, ko koya sa vararavi voki lia ki na lomaserena enai varaiyavi, ka tukunia, "Ikonu na Turaga, ko cei ko koya ena soli iko yani?" ²¹ Ni sa raici koya ko Pita, sa tukunia vi Jisu, "Na Turaga, na cava ena caka na tamata koya?" ²² Sa tukunia vua ko Jisu, "Kevaka ka'u na vinakatia me bula tiko lia me yacovia na gauna ka'u na qai voki mai kinia, a cava koya vi iko? ko iko, mo muri au." ²³ Sa qai rogo yani vi ira na viwekani na vosa koya, ni na yali ni mate na tisaipeli ko ya: ia ka yali ni tukunia vua ko Jisu vi Pita, ni na yali ni mate na tisaipeli gona, ia sa tukunia lia, "Kevaka ka'u vinakatia me bula tiko lia ko koya ka yacovia na siga ka'u na qai voki mai kinia, a cava koya vi iko?" ²⁴ Sai koya koya na tisaipeli sa tukunia na ka kece koya, ka vola na veika koya: ia eda sa kila sa dina na nonai tukutuku. ²⁵ Sa levu voki lia na ka sa caka ko Jisu, ia kevaka sa volai kece lia, au sa vabautia ni na oso ko vuravura ena vivola e volai. Emeni.