¹ Ia ni sa bera na kana vata ni qai-sivia, ka sa kila ko Jisu sa yaco mai na nona gauna me qai tani yani e vuravura koya vua na Tamana, ka ni sa lomani ira na nona era sa tiko e vuravura, sa lomani ira ki nai otioti. ² Ia ni ra sa varaiyavi tiko, ni vatuburia oti na tevoro ena loma i Jutasa Isikarioti, na luvei Saimoni, me soli koya yani: ³ a sa kila ko Jisu ni sa solia ko Tamana na ka kece lia ki na ligana, ka ni sa qai mai vua na Kalou ko koya, a sa qai voki yani vua na Kalou; ⁴ sa tucake mai na varaiyavi ka luvatia na nona i sulu, ka yadia mai e dua nai sulu, ka vaucia ki tolona. ⁵ Ni sa oti koya sa livi na wai ki na dari, vatekivu me vuya na yavadra na tisaipeli, ka quwarakia enai sulu sa vau ki tolona. ⁶ Sa qai mai ko koya vi Saimoni Pita: a sa tukunia vua ko koya, "Noqu Turaga, ko ni sa vuya li na yavaqu" ⁷ Sa vosa ko Jisu, ka tukunia vua, "A ka ka'u sa caka ko sa yali ni kila ni kua; ia mai muri lia ko na kila. ⁸ "Sa tukunia vua ko Pita, "Ikonu na yali sara ni vuya na yavaqu." Sa tukunia vua ko Jisu, "Kevaka ka'u sa yali ni vui iko, ko sa yali ni rawatia e dua na ka vi au." ⁹ Sa tukunia vua ko Saimoni Pita, "Noqu Turaga, me yali loa lia na yavaqu, a ligaqu voki lia ki na uluqu." ¹⁰ Sa tukunia vua ko Jisu, "Ko koya sa sili oti, sa yaga vua me vuya na yavana lia, a sa savasava, ka dou sa yali kece:" ¹¹ ni sa kilai koya ena soli koya yani: a ka koya sa tukunia kinia ko koya, "Dou sa yali ni savasava kece" ¹² Ni sa qai vuya oti na yavadra, ka sulumakia voki na nonai sulu, sa tiko sobu voki, ka tukunia vi ira. "Dou sa kila na ka'u sa caka vi ikodou, se yali? ¹³ Dou sa vatokai au me'u i 'Vavuvuli,' me'u 'Turaga' voki lia: ia dou sa vosa dina; ni'u sa vakinia. ¹⁴ Ia kevaka ka''u sa vuya na yavamudou, koi au na Turaga kei nai Vavuvuli, sa dodonu voki lia mo dou vivui yava: ¹⁵ ni'u sa solia e dua nai varau vi ikodou, mo dou caka me vaka ka'u sa caka vi ikodou. ¹⁶ E dina, e dina, au sa tukunia vi ikodou, Sa yali ni levu na tamata ka lailai na nona turaga; se levu ko koya sa talai ka lailai ko koya sa talai koya. ¹⁷ Kevaka dou sa kila na veika koya, dou sa kalougata kevaka dou sa caka. ¹⁸ Au sa yali ni vosataki ikodou kece lia: au sa kilai ira ka'u sa digitakia; ia me vayacoria kinia nai Vola Tabu, 'O koya kirau sa kana madrai vata kaya, sa leqeti au enai bukubuku-ni-yavana.' ¹⁹ Au sa qai tukunia vi ikodou ni sa bera ni yaco mai; mo dou vabautia ni sai au, ni sa yaco mai. ²⁰ E dina, e dina, au sa tukunia vi ikodou, O koya sa vacegui ira yadua ka'u sa tala, sa vacegui ira yadua ka'u sa tala, sa vacegui au; ia ko koya sa vacegui au, sa vacegui koya sa talai au mai." ²¹ Ni sa vosa oti vakoya ko Jisu, sa rarawa na lomana, a sa vatakilataki, ka tukunia, "E dina, e dina au sa tukunia vi ikodou, sa dua vi ikodou ena soli au yani." ²² Era sa qai viraici na tisaipeli, ni ra sa lecavia se vosataki cei ko koya. ²³ A sa vararavi ena lomasere i Jisu e dua vi ira na nona tisaipeli, ko koya sa loma ko Jisu. ²⁴ Sa qai deguvacutaki koya ko Saimoni Pita, me tarogia se vosataki cei ko koya. ²⁵ Ia ko koya sa vararavi ena lomasere i Jisu, sa tukunia vua, "Ikonu na Turaga, ko cei beka ko ya?" ²⁶ Sa tukunia ko Jisu, "Sai koya ka'u na solia vua na tiki ni madrai ni'u sa tokocia." Ia ni sa tokocia oti na tiki ni madrai, sa soli vi Jutasa Isikarioti, na luve i Saimoni. ²⁷ Ia ni sa oti na tiki madrai, sa qai curumi koya ko Setani. Sa qai tukunia vua ko Jisu, "A ka ko sa caka, caka vatotolo." ²⁸ Sa yali ni kila e dua vi ira sa tiko me kana, sa cava sa vosa kinia vakoya vua ko koya. ²⁹ Era vakasama eso, ni sa tauria na taga i lavo ko Jutasa, sa tukunia vua ko Jisu, "Volia na veika ena yaga vi ita ena kana vata; se me solia na ka eso vi ira era dravudravua." ³⁰ Ni sa qai tauria oti na tiki ni madrai ko koya, sa qai sara ki tautuba; a sa bogi. ³¹ Ni sa qai curu yani ko koya, sa tukunia ko Jisu, "Sa qai varokorokotaki na Luve ni tamata, a sa varokorokotakia na Kalou ena vukuna: ³² ka na varokorokotaki koya voki lia na Kalou vakai koya, ia ena varokorotaki koya sara. ³³ Na luvequ lomani, au na tiko valailai lia kei ikodou. Dou na vaqarai au: ia me vaka ka'u a tukunia vi ira na kai Jutia, 'Dou sa yali ni qai rawa ki na vanua ka'u sa qai yani kinia;' au sa tukunia va voki lia kinia vi ikodou. ³⁴ E dua na vunau vou ka'u sa solia vi ikodou, Mo dou vilomani; me vaka ka'u sa lomani ikodou, mo dou vilomani voki lia vakinia. ³⁵ A ka koya era na kila kinia na tamata kece lia ni dou sa noqu tisaipeli, kevaka dou sa vilomani. ³⁶ Sa tukunia vua ko Saimoni Pita, "Ikonu na Turaga, ko ni sa qai kivei?" Sa tukunia vua ko Jisu, "A vanua ka'u sa qai kinia, ko sa yali ni muri au rawa kinia ni kua; ia mai muri lia, ko na muri au. ³⁷ Sa tukunia vua ko Pita, "Ikonu na Turaga, au sa yali ni muri ikonu rawa ni kua ena vuku ni cava? au na solia na noqu bula ena vukumuni," ³⁸ "O na solia li na nomu bula ena vukuqu? E dina, e dina, au sa tukunia vi iko, ni sa bera ni tagi na toa, ko na cakitaki au vatolu."