¹ "Me kakua ni rarawa na lomamudou: dou sa vabautia na Kalou; dou vabauti au voki lia. ² Sa levu na tikinia ena vale ni Tamaqu; kevaka sa yali, au sa tukunia vi ikodou. Ni ka'u sa qai me'u varautakia na tikinia me nomudou. ³ Ia kevaka ka'u sa qai ka varautakia na tikinia me nomudou, au na qai voki mai, ka yadi ikodou vi au: mo dou tiko voki lia ena vanua ka'u sa tiko kinia. ⁴ Ia dou sa kila na vanua ka'u sa qai kinia, dou sa kila voki lia na kena sala." ⁵ Sa tukunia vua ko Tomasi, Ikonu na Turaga, kitou sa yali ni kila se ko ni sa qai kivei; ia kitou kila rawa vavei na sala?" ⁶ Sa tukunia vua ko Jisu, "Oi au na sala, kei na vu-ni-dina, kei na vu-ni-bula; sa yali ni torovi Tamaqu loa lia e dua na tamata, ena vukuqu lia. ⁷ Kevaka dou sa kilai au, dou sa kilai Tamaqu voki lia; ia mai na siga koya dou sa kilai koya ka raici koya." ⁸ Sa tukunia vua ko Filipi, "Turaga, vatakilai Tamamunu vi kitou; kitou na qai vacegu" ⁹ Sa tukunia vua ko Jisu, "Ni'u sa tiko dede vakoya vi ikodou, ko sa yali li ni kilai au, Filipi?" ko koya sa raici au, sa raici Tamaqu: ia ko sa tukunia vacava, 'Vatakilai Tamamu vi kitou?' ¹⁰ O sa yali li ni vadinatakia ni'u sa duavata kei Tamaqu, a sa duavata kei au ko Tamaqu? a vosa ka'u sa vosatakia vi ikodou, ka'u sa yali ni vosatakia vakai au lia; ia ko Tamaqu kirau sa dua vata kaya, sa caka na cakacaka. ¹¹ Dou vadinati au ni'u sa duavata kei Tamaqu, a sa duavata kei au ko Tamaqu, se vadinati au ena vuku ni cakacaka lia. ¹² E dina, e dina, au sa tukunia vi ikodou, O koya lia sa vabauti au, ena caka voki lia na cakacaka ka'u sa caka, ia ena caka na cakacaka e uasivi cake ena ka koya, ena vuku ni'u sa qai vi Tamaqu. ¹³ Ia na ka kece lia dou sa kerea ena yacaqu, au na caka, me varokorokotakitakia na Tamaqu ena vuku ni Luvena. ¹⁴ A ka kece lia dou na kerea ena yacaqu, au na caka. ¹⁵ Kevaka dou sa lomani au, dou talairawarawa ki na noqu vunau. ¹⁶ Ia ka'u na masuti Tamaqu, ena qai solia vi ikodou e dua voki na Dauvivacegui, me tiko lia kei ikodou ka yali ni mudu; ¹⁷ a Yalo Tabu sa vu ni ka dina, ko koya era sa yali ni vabautia rawa na kai vuravura, ni ra sa yali ni raici koya se kila koya: ia sai ikodou lia sa kilai koya: ni sa tiko vata kei ikodou ko koya, ka na curumi ikodou. ¹⁸ Au na yali ni laivi ikodou mo dou luveniyali: au na qai mai vi ikodou. ¹⁹ Malua mada valailai, era na qai yali ni raici au voki na kai vuravura: ia dou sa raici au: ni'u sa bula, dou na bula voki lia. ²⁰ Ena siga ko ya dou na kila ni'u sa duavata kei Tamaqu, ka dou sa duavata ki au, ka'u sa duavata kei ikodou. ²¹ Ko koya sa nanumia na noqu vunau ka talairawarawa kinia, sai koya koya sa lomani au; ia ko koya sa lomani au ena lomani koya ko Tamaqu, ia ka'u na lomani koya, ka vatakilai au vua. ²² Sa tukunia vua ko Jutasa, (e dua tani ko Isikarioti,) "Ikonu na turaga, ko ni na vatakilai ikonu vi kitou e na vuku ni cava, ka yali vi ira na kai vuravura? ²³ Sa vosa ko Jisu, ka tukunia vua, "Kevaka sa lomani au e dua, ena talairawarawa ki na noqu vosa; ena qai lomani koya ko Tamaqu, ia kirau na qai mai kivei koya ka tiko lia vua. ²⁴ O koya sa yali ni lomani au, sa yali ni talairawarawa ki na noqu vosa: ia na vosa dou sa rogocia, sa yali ni noqu loa lia, sa nei Tamaqu sa talai au mai. ²⁵ Au sa vosatakia na veika koya vi ikodou, ni'u sa tiko vata kei ikodou. ²⁶ Ia na Dauvivacegui, na Yalo Tabu, ko koya ena tala mai ko Tamaqu ena yacaqu, ena vavulici ikodou ena ka kece lia ka'u a vosatakia vi ikodou. ²⁷ Au sa dainia vi ikodou na vacegu, au sa solia vi ikodou na noqu vacegu; au sa yali ni solia vi ikodou, me vaka sa solia ko vuravura. Me kakua ni rarawa na yalomudou, se rerevakia. ²⁸ Dou a rogocia ni'u a tukunia vi ikodou, Au sa qai yani, ka qai voki mai vi ikodou. Kevaka dou sa lomani au, dou na reki ni'u sa qai vi Tamaqu: ni sa uasivi cake vi au ko Tamaqu. ²⁹ Au sa qai tukunia e liu vi ikodou ni sa bera ni yaco mai, mo dou vadinatia ena gauna sa yaco kinia. ³⁰ Ena visiga emuri au na yali ni vivosaki valevu kei ikodou: ni sa qai mai na turaga ni vuravura koya, a sa yali ni raicia e dua na ka vi au. Ia me kila lia ko ira na kai vuravura ni'u sa lomani Tamaqu, ³¹ ia me vaka sa vosa vi au ko Tamaqu, au sa caka vakinia. Tu cake tou qai yani.