Sa tukunia ni sa tubu na i valu mai na yaloca, 1; a sa yali ni yaco na noda gagadre ni da sa yaloca, 2,3. Me da kakua ni lomavata ki ira na tamata e yali ni lotu, 4,5. E ca na viavialevu, 6-16. Sa ca ko ira era sa kila na ka dodonu, ka yali ni muria, 17.

1 Sa vu mai vi na viba ki na vivala vi ikodou? sa yali li ni vuna na nomudou gagadre ca sa vivala e na vitiki ni yagomudou? 2 Dou sa kocokoco, ka yali ni rawatia: dou sa ravuravu, ka daugagadre, ka yali ni tauria rawa me nomudou: dou sa vivala ka viba, ia dou sa yali ni rawatia, ni dou sa yali ni kerekere. 3 Dou sa kerekere lia, ka yali ni rawatia, ni dou sa kerekere vaca, mo dou vayalia e na nomudou gagadre ca. 4 Oi ikodou na dauyalewa ki na dautagane, dou sa yali beka ni kila, ni sa vicati ki na Kalou na vivinakati ki vuravura? ia sa vimecaki ki na Kalou ko koya sa via viwekani ki vuravura. 5 Dou sa vasama beka ni sa tukunia lowa lia nai Vola Tabu, Sa gadrevia vavuvu na Yalo sa tiko e na lomada? 6 Ia sa solia valevu na loloma ko koya. O koya sa tukunia kinia ko koya, O ira sa viavialevu sa vorati ira na Kalou, ia sa solia na loloma vi ira era sa yalomalumalumu. 7 O koya mo dou qai vamalumalumutaki ikodou vua na Kalou. Voratia na tevoro, ena dro tani kinia vi ikodou ko koya. 8 Toro voleka yani vua na Kalou, ka na toro voleka mai vi ikodou ko koya. Vasavasavatakia na ligamudou, oi ikodou na lomalomarua. 9 Dou mai rarawa, ka qoqolou, ka tagi: me vuki na nomudou dredre me qoqolou, ki na nomudou marau me mataveveku. 10 Dou vamalumalumutaki ikodou e na mata ni Turaga, ka na laveti ikodou cake ko koya. 11 Kakua ni dou vikaseti, na viwekani. O koya sa kasetia na wekana, ka lewai koya na wekana, sa kasetia na vunau voki lia, ka sa lewa na vunau: ia kevaka ko sa lewa na vunau, ko sa qai yali ni muria na vunau, ko sa lewa lia. 12 Sa dua loa lia sa vatura na vunau, ko koya sa rawatia na vivabulai, ki na vivarusai: o cei ko iko mo lewa na tani? 13 Dou qai mai, oi ikodou sa dau tukunia, ni kua se na mataka eda na qai ki na koro ko ya, ka tiko kinia ka yabaki dua, ka vivoli kinia, ka rawatia nai yau: 14 ia dou sa yali ni kila na ka sa na yaco e na mataka: A cava na nomudou bula? Na kabukabu loa lia koi ikodou, sa rairai ka sa vadede valailai lia, a sa qai seavu yani. 15 Ia koya mo dou tukunia, Kevaka sa vinaka vua na Turaga, eda na bula, ka caka na ka koya, se na ka ko ya. 16 Ia dou sa qai marau ka dokadokai ikodou: e ca na marau kece lia sa vaka ko ya. 17 O koya sa ca kinia vua sa kila me caka vinaka, ka yali ni caka.