Sa cudruvi ira na tamata vutuniyau na Kalou ni ra sa tamatai valavala ca, 1-6. Ai valavala e kilikili ki ira na tamata lotu, 7-12. Sa yaga sara na masu, 13-18. Sa ka vinaka na saumaki ira na tamata sa cala, 19,20.
1
Dou qai mai, oi ikodou na tamata vutuniyau, dou tagi ka qoqolou ena vuku ni nomudou ka rarawa ena yaco mai.
2
Sa vuca na nomudou yau, a sa kania na nomudou sulu na sarasara.
3
Sa veveka na nomudou koula ki na siliva, ka na tukuni ikodou na lewemudou me vaka na bukawaqa. Dou sa kumunia vata nai yau me yacovia mai muri sara.
4
Raicia, sa tagi na kedrai voli na tamata daucakacaka era sa tamusukia na nomunu viwere, o koya dou sa bureitakia: ia sa curu ki na daligana na Turaga ni lewe levu na nodra tagi era sa dautamusukia.
5
Dou a marau ki vuravura, dou a daukana tiko, dou a dau vakania na lomamudou, ena siga sa ia kinia na dauvivamatei.
6
Dou sa valewai koya ka vamatei na yalododonu. Sa yali ni voratia ikodou ko koya.
7
O koya lia koya, na viwekani, mo dou vosotia, me yacovia na nona lesu voki mai na Kalou. Raicia, nai vatau-ni-were sa warakia na vua ni qele talei, sa vosotia vadede me yacovia ni ciqomia na uca sa liu, ki na uca sa muri.
8
Vaka voki lia o ikodou, mo vosotia vadede. Bulia e lomamunu ni sa voleka na nona lesu voki mai na Kalou.
9
Oi ikodou na taciqu, mo dou kua ni vicudruvi vakai ikodou, me rawa ni dou kua ni lewai, raicia, na daunilewa sa tu e mata ni darava.
10
Oi ikodou na taciqu, vadamurimuri ira na parofita, e na nodra vosotia na ka rarawa, ki na nodra dauvosotia, era sa vosa ena yaca ni Turaga.
11
Raicia, eda sa dauvatokai ira era sa vosotia mera kalougata. Dou a rogocia, na dauvosotia ni Jope, dou sa raicia voki lia ni sa tinia vaevei na Turaga; ni sa yalovinaka sara na Turaga, ka sa dauloloma.
12
Ia na ka levu sara koya, oi ikodou na wekaqu, mo dou kakua sara ni bubului, kakua ki lomalagi, se ki vuravura, se ki na dua tani na ka, me io lia na nomudou io, ia me yali lia, na yali, de dou cudruvi kinia.
13
Kevaka e dua vi ikodou sa vararawataki, me masu tiko. Kevaka e dua sa marau, me sere.
14
Kevaka e dua vi ikodou sa tauvi-mate, me kacivi ira na matua ni soqosoqo lewe ni lotu; ia me ra masulaki koya, ka lumutia e na waiwai e na yaca ni Turaga:
15
ia na masu ni vabautia ena vabulai koya sa tauvi mate, ka na vabulai koya na Turaga, ia kevaka ka caka na valavala ca, ena yali ni cudruvi kinia.
16
Dou dui vivatusa na nomudoui valavala ca, ka vimasulaki, mo dou vabulai kinia. Sa yaga valevu na nona masu gumatua na tamata yalododonu.
17
A tamata sa vataki ita sara ko Ilaijia, a sa masu vagumatua sara me kakua ni tau mai na uca e vuravura, a sa oti mada na yabaki tolu ki na vula ono.
18
A sa qai masu voki, a sa tau na uca mai Lomalagi, a sa vuatakia na vuana na qele.
19
Oi ikodou na viwekani, kevaka e dua vi ikodou sa qai tani mai nai vavuvuli dina, a sa valesui koya voki mai e dua;
20
me kila ko koya koya, o koya sa valesuya voki na tamata caka cala mai na nonai valavala e cala kinia ka sa vabula na yalo mai na mate, a sa bulutia voki lia nai valavala ca e levu.