Me da kakua ni viavia vavuvuli; me da lewa na yameda, 1-12. O ira sa vuku dina, era sa yalo malumalumu, era sa yalovinaka, era sa yali ni dauvuvu, se dauviba, 13-18.

1 Oi ikodou na wekaqu, me kakua ni lewe levu vi ikodou mei vavuvuli, ni dou sa kila eda na cudruvi valevu kinia. 2 Ni da sa cala kece lia e na ka e levu. Kevaka sa yali ni cala e dua e na vosa, sa tamata uasivi sara ko koya, a sa rawarawa vua me tarovia na yagona taucoko 3 Raicia, kevaka eda sa vaciqiria na kedrai tatarovi na ose ki na gusudra, me ra talairawarawa kinia vi ita, eda sa qai saumakia na yagodra taucoko. 4 Raicia voki lia na waqa, ni sa ka levu vaidina, a sa savu kalia e na cagi kaukauwa, ia sa saumaki lia e na uli lailai sara, ki na yasana e vinakatia ko koya sa tauria na uli. 5 Sa vaka voki lia kinia na yameda ni sa tikida lailai lia, a sa vosa vaviavialevu. Raicia, sa vacaudrevia na buka levu na bukawaqa lailai! 6 ia sa bukawaqa na yameda, a ka taucoko ni ca: sa vakinia na yameda e na vitiki ni yagoda taucoko, a sa vacaudrevia nai valavala kece lia ni yagoda; a sa vacaudrevia koya ko eli. 7 Ni sa vamanoatakia na manumanu kece lia e yavai va, ki na manumanu vatabana, ki na ka sa qasi, ki na ka ni waitui, a sa vamanoataki ira tu ko ira na tamata: 8 ia ka sa yali na tamata sa vamanoatakia rawa na yame; a ka ca sa yali ni tarovia rawa, sa sinai e na ka gaga e dauvivamatei. 9 Eda sa vavinavinaka kinia vua na Turaga ko Tamada; eda sa rukaki ira voki lia kinia na tamata, era sa buli me tautauvata ki na Kalou. 10 Sa vu mai na gusu e dua loa lia, na vavinavinaka ki na virukaki. Oi ikodou na wekaqu, e yali ni dodonu me vakinia na veika koya. 11 E dua beka na mata-ni-wai sa vadavea mai na matana e dua loa lia na wai dranu ki na wai gaga voki lia? 12 Oi ikodou na wekaqu, sa dua beka na lolo sa vuatakia rawa na olive? se dua li na vaini, na lolo? sa vakinia, sa yali e dua na mata-ni-wai me tovure mai kinia na waitui ki na wai dranu voki lia. 13 O cei vi ikodou sa vuku ka yalomatua? me vatakila e nai valavala vinaka na nona cakacaka e na vuku sa yalomalua. 14 Ia kevaka sa tu e na lomamudou na dauvuvu e gaga ki na dauviba, dou kakua ni valevulevui ikodou, se lasutakia nai vavuvuli dina. 15 A vuku vaka ko ya sa yali ni qai sobu mai cake, sa vavuravura lia, sa vayalomakawa, sa vatevoro. 16 Io, kevaka sa tu na vuvu ki na viba, sa tu kinia na visei ki na cakacaka kece lia e ca. 17 Ia na vuku mai cake sa savasava mada, emuri sa dauia na vivacegui, sa yalomalua, sa vamasuti rawarawa, sa sinai e na loloma ki na vua vinaka, sa yali ni digitaki ira vatani na tamata, se dauvivaisini. 18 Ia na vua ni valavala dodonu sa kaburaki vata ki na vivacegui vi ira era sa caka tiko na vivacegui.