2 ¹ Oi ikodou na taciqu, me kakua na vivaduiduitaki, tauria matua na vabauta ni noda Kalou Jisu Karisito, na Kalou lagilagi. ² Kevaka sa qai mai e dua na tamata ka daramakia mai na mama koula ki nai sulu talei, ka curu voki lia mai na tamata dravudravua ka vaisulu ca tu lia, ³ kevaka iko kawaitakia na tamata vamama koula ka vaisulu vinaka ka tukunia vua, "mo dabe ena vanua vinaka koya" ia ko qai tukunia vua na tamata dravudravua, "mo tucake tu lia ena vanua gona," se, "dabe tiko lia ena vanua gona." ⁴ dou sa yali li ni ia na vatulewa ena ikodou maliwa, ka sa yaco kinia mo dou daulewa ena vasama ca? ⁵ Dou rogocia, oi ikodou na wekaqu lomani, sa yali li ni digitaki ira na dravudravua na Kalou e vuravura me ra vutuniyau ena vabautia ka mera taukenia na matanitu valomalagi, me vaka sa yalatakia tu vi ira era lomani koya. ⁶ Ia dou beci ira na tamata dravudravua. Sa yali li ni o ira na tamata vutuniyau koya,, era yadi ikodou kina mataveilewai? ⁷ Sa yali li ni o ira ke era sa vosa vacacatakia na yaca ni varokoroko dou dau kacivi kinia? ⁸ Kevaka iko sa vayacoria na lawa vaturaga me vaka e tukunia nai Vola Tabu, "mo lomania na kai nomu me vataki iko," ko sa caka vinaka. ⁹ Ia kevaka ko sa lomania lia eso, o iko sa coriti ena i valavala ca, ka sa beitaki vi iko na lawa ni valavala ca. ¹⁰ Ia ko koya yadua na muria na vunau taucoko, ka cala ena dua na tikinia sa yaco me lewai kinia vunau taucoko. ¹¹ NI sa tukunia ko koya, "Kakua ni dauyalewa," sa tukunia voki lia, "kakua ni laba", ia kevaka ko sa yali ni dauyalewa, ka ia na laba sa qai yaco mo talaidredre ena lawa. ¹² Dou vosa ka valavala vakinia me vataki ira era na lewai ena lawa ni visereki. ¹³ Ni vilewai sa yali kinia na loloma, ki vi koya sa yali ni dau loloma. Ni loloma sa rawa na vilewai. ¹⁴ Na cava na kena yaga, ikodou na taciqu, kevaka e dua e tukunia ni tamata vabautia, ia ka yali ni dau cakacaka? Sa rawa li ni vabulai na vabauti koya? ¹⁵ Kevaka e dua na taciqu se ganequ sa yali ni vaisului vinaka ka lailai vua na kakana ena dua na siga, ¹⁶ ka qai dua vi ikodou e tukunia. "Qai ena vacegu, dou vakatakatai ikodou ka vakamaumautaki; a cava na kena vinaka ni sa yali soli vei ira na veika e gadrevia na yagodra? ¹⁷ Sa vaka voki lia na vabautia, kevaka e yali na cakacaka, sa mate. ¹⁸ Kevaka e dua sa tukunia, "E tiko vi ikonu na vabautia ka tiko vi au na cakacaka," Varaitakia mai vi au na nomu vabautia, ka kakua na cakacaka, au na qai varaitakia vi ikonu na noqu vabautia mai na noqu cakacaka. ¹⁹ O sa vabautia ni dua lia na Kalou; o sa caka vinaka. Io na tevoro voki lia e vabautia ka sautaninini. ²⁰ O sa via laurai, tamata lialia, ni vabautia ka yali na cakacaka sa mate? ²¹ Sa yali beka ni vadonui o Eparama na tamada na nona cakacaka nona vacabori Aisake na luvena enai cabocabo ni soro? ²² Ko sa raicia ni vabauta sa yavala vata kei na nona cakacaka, ki na vabauta sa vataucokotakia na nona cakacaka. ²³ Sa vataucokotakia nai Vola Tabu ni sa tukunia, "Eparama sa vabautia na Kalou, ka sa wili kinia o koya me tamata yalododonu", ka sa kacivi mei tokani ni Kalou. ²⁴ Ko sa raicia ni tamata sa vadonui mai na nona cakacaka ka yali lia ena vabautia. ²⁵ Sa vaka voki lia o Repeka na dautagane, sa vadonui mai na nona cakacaka ni sa ciqomia na dau vayadi tukutuku ka talai koya tani kinia dua voki na gaunisala. ²⁶ Ni sa mate na yago ni sa yali na yalo, sa vaka voki lia na vabautia ka yali na cakacaka.