Sa varotia ko Jemesa me ra reki na tamata lotu ni ra sa vararawataki, 1-12. Oi ita lia eda sa vatekivunia na ca, ia sa vu ni ka vinaka na Kalou, 13-18. Me da daurogocia, ka vananumia ka muria na vosa ni Kalou; kevaka eda yali ni vakinia sa lasu na noda lotu, 19-27.
1
Koi au ko Jemesa, nai talatala ni Kalou ki na Turaga ko Jisu Karisito sa loloma yani vi ira na yavusa e tinikarua era sa Duiveiseyaki.
2
Oi ikodou na wekaqu, dou nanumia me ka ni reki sara, ni dou sa lutu ki na ka e levu sa dauvivatovolei;
3
ni dou sa kila sa vatuburia na dauvosotia na vatovolei ni nomudou vabautia.
4
Ia me tini vinaka na cakacaka ni dauvosotia, mo dou vinaka taucoko sara kinia, me kakua na ka e yali.
5
Ia kevaka sa lailai na vuku vua e dua vi ikodou, me kerea vua na Kalou, o koya sa solia valevu kivei ira kece lia na tamata, a sa yali ni dauvivadirideini; ka na soli lia vua.
6
Ia me kerekere e na vabauta, me kakua ni vatitiqa: ko koya sa vatitiqa, sa vaka na ua ni waitui, sa cagina e na cagi ka vitubuyaki.
7
Ia me kakua ni nanumia na tamata ko ya ni na rawatia e dua na ka mai vua na Turaga:
8
a tamata lomalomarua, sa yamekemeke e na nonai valavala kece lia.
9
Ia me reki na tamata dravudravua e na nona laveti cake:
10
ki koya e vutuniyau, e na nona malumalumu mai: ni na takali lia ko koya me vaka na se ni co.
11
Ni sa cabe cake na siga ki na cagi katakata, ka sa varaqosatakia sara na co, a sa mira na sena, a sa seavu na kena rairai vinaka: ena malai yani vakinia na tamata vutuniyau e na nonai valavala.
12
Sa kalougata na tamata sa vosotia ni sa vatovolei, io, ni sa vatovolei oti, ena rawatia nai sala ni bula o koya sa yalatakia na Turaga kivei ira sa lomani koya.
13
Ni sa dauveretaki e dua, me kakua ni tukunia, Sa dauveretaki au na Kalou: ni sa yali ni dauveretaki rawa na Kalou ki na ka ca, a sa yali ni dauveretakia e dua na tamata ko koya:
14
a sa dauveretakia na tamata yadua, ni sa vecei koya na nona garogaro ca ka bacani koya.
15
Ni sa qai kunekune na garogaro ca, sa vasucumia kinia nai valavala ca: a sa oti nai valavala ca, sa qai vasucumia na mate.
16
Dou kakua ni cala, oi ikodou na wekaqu lomani.
17
Sa qai mai cake nai solisoli vinaka kece lia ki nai solisoli kece lia e yaga sara, a sa qai sobu mai vua na Tama ni rarama, a sa yali vua na vivukiyaki, se yaloyalo ni vigoleyaki.
18
Sa vatuburi ita ko koya e na nona lewa lia e na vosa ni dina, me da vaka nai sevu ni veika sa bulia ko koya.
19
O koya koya, oi ikodou na wekaqu lomani, mo dou vatotolo yadua me varorogo, mo dou berabera lia ni vosa, mo dou berabera ni cudru:
20
ni sa yali ni vatuburia na ka e dodonu vua na Kalou na cudru ni tamata.
21
O koya koya mo dou qai dainia tani na dukadukali ki na ka ca e uasivi tu, ka vabautia e na yalomalua na vosa sa tei e na lomamudou, ko ya sa vabula rawa na yalomudou.
22
Ia dou muria na vosa ka kakua ni rogocia lowa lia, ka vaisini ikodou kinia vakai ikodou.
23
Ia kevaka e dua sa rogocia lowa lia na vosa, ka yali ni muria, sa tautauvata ki na tamata sa qai ki ilova na mata ni yagona e nai iloilo:
24
ni sa ilovi koya oti, a sa qai qai tani yani, a sa guilecavia vasauri se sa vaevei nai valavala ni yagona.
25
Ia ko koya sa varaicia matua na vunau vinaka sara, na vunau ni visereki, ka tu dei kinia, sa yali ni daurogocia ka guilecavia, ia sa caka voki lia na cakacaka, ena kalougata kinia ko koya koya e na nona cakacaka.
26
Kevaka e dua vi ikodou sa nanumia sa lotu, ia ka yali ni tarovia na yamena, a sa dauvaisina voki lia na yalona, sa ka lowa lia na nona lotu na tamata koya.
27
Na lotu savasava ka yali ni cala e mata ni Kalou ko Tamada sa vakoya, Me sa dauraici ira na luveniyali ki ira na yada, ni ra sa rarawa, me sa qarauni koya voki lia me kakua ni tauvi koya na duka ni ka vavuravura.