8 ¹ A sa duavata lia na nona mate ko Saula. Ia e na gauna gona era sa vakacacani vakalevu kinia nai soqosoqo lewe ni soro era sa tiko mai Jerusalemi; a ra sa veiseyaki kinia ki na veiyasana i Jutia kei Samaria, vakavo lia ko ira nai apositolo. ² A ra sa buluti Sitiveni e so na tamata daulotu, a ra sa caka na somate levu ena vukuna. ³ Ia ko Saula sa vakacacani ira vakalevu lia nai soqosoqo lewe ni soro, ni sa curu ki na veivale kecelia, ka yaratakia na tagane kei ira voki lia na yalewa, ka daini ira ki na vale ni veivesu. ⁴ Ia ko ira na tamata vakabulai vakayalo era sa veiseyaki, era sa qai kina veiyasana kecelia ka vunautakia na vosa. ⁵ Sa qai qai sobu ko Filipi ki na koro ko Samaria, a sa vunautakia na Karisito kivei ira. ⁶ Ia ko ira na tamata era sa lomavata me ra vakarogocia na ka sa tukunia ko Filipi, ni ra sa rogocia na raicia na veika-mana sa kitakia ko koya. ⁷ Ni sa qai tani maive ira na lewe levu na yalo velavela sa curumia nodra bula, ni ra sa qoqolou tiko lia e na domo levu; kei ira vokilia era lewe vuqa sa tauvi ira na mate sautaninini, kei na lokiloki, era sa vakabulai. ⁸ A sa ka levu kinia na marau e na koro koya. ⁹ A sa dua na tamata, ko Saimoni na yacana, sa daucakai sausau makawa ena koro ko ya, a sa vakidacalataki ira vakalevu kinia na kai Samaria, ni sa dau tukutukuni koya ni sa uasivi vei ira. ¹⁰ Ko ira kece na kai Samaria, mai vei ira na lalai ki vei ira sa cecere sara, era vakarogoci koya, ka tukunia "O koya koya na kaukauwa levu ni Kalou" ¹¹ A ra sa vakarogocia baletia ni sa vakidacalataki ira vakadede ko koya ena nonai sausau. ¹² Ia ni ra sa vakadinati Filipi ni sa vunautakia na veika ni matanitu ni Kalou, kei na yaca i Jisu Karisito, era sa qai papitaisotaki lia, ko ira na tagane kei ira na yalewa. ¹³ Sa qai vakadinata voki lia ko Saimoni; ia ni sa papitaisotaki oti, erau dau tiko vata kei Filipi; a sa kidacalatakia ko koya ni sa raicia nai vakatakilakila kei na cakacakama levu sa caka tiko. ¹⁴ Ni ra sa qai rogocia ko ira nai apositolo era sa tiko mai Jerusalemi, era sa vakadinatia na vosa ni Kalou ko ira na kai Samaria, era sa talai Pita kei Joi vei ira: ¹⁵ ia koi rau, ni rau sa qai sobu, erau sa masulakia me soli vei ira na Yalo Tabu; ¹⁶ ni se yali ni yacovia e dua vei ira ko koya: era sa papitaisotakia walelia ena yaca ni Turaga ko Jisu. ¹⁷ A rau sa tabaki ira lia ena ligadrau, a ra sa ciqomia na Yalo Tabu. ¹⁸ Ia ni sa raicia ko Saimoni sa soli na Yalo Tabu e na veitabaki ni ligadrau nai apositolo, sa qai via solia vei rau nai lavo, ¹⁹ ka tukunia, "Solia voki lia mai vei au na kaukauwa koya, me yaco kinia na Yalo Tabu vei ira yadua ka'u na tabakia ena ligaqu." ²⁰ A sa tukunia vua ko Pita, Mo drau rusa vata kei na nomu siliva, e na vuku ni ko sa nanumia sa voli rawa nai solisoli ni Kalou e nai lavo. ²¹ Sa yali na nomu tikina se nomui votavota ena ka koya, ni sa yali ni dodonu na yalomu ena mata ni Kalou. ²² O koya koya mo qai vevutunitakia na nomui valavala ca koya, ka masulakia vua na Kalou, me vosotia na nanuma ni yalomu. ²³ Niu sa kunea ko sa tu lia ena ka gaga sara, ko sa vesuki e nai valavala ca. ²⁴ Sa qai vosa ko Saimoni, ka tukunia "Drau masulakia vua na Turaga me kakua ni yaco vei au e dua na ka drau sa vosa kinia." ²⁵ Ia koi rau, ni rau sa tukunia oti ka vunautakia na vosa ni Turaga, erau sa lesu voki ki Jerusalemi, ka rau sa vunautakia nai tukutuku-vinaka e na vei koro lalai e vuqa mai Samaria. ²⁶ A sa vosatakia vei Filipi e dua na agilose ni Turaga, ka tukunia, "Mo ia ka qai vaka ki na mata ni ceva, e na sala sa qai mai Jerusalemi vaka ki Kesa, ko ya e veikau. ²⁷ Sa qai ia ko koya ka qai: ka raicia, e dua na kai Iciopea, a matanivanua, a tamata levu i Kadasi na nodra ranadi na kai Iciopea, a sa nona dauniyau ko koya, sa qai ki Jerusalemi me soro, ²⁸ sa lesu voki tiko, ena nona qiqi-ni-turaga, ka sa wilikia tiko nai vola i Aisea na parofita. ²⁹ Sa qai tukunia vei Filipi na Yalo Tabu, "Qai, ka mo tiko voleka kina qiqi-ni-turaga ko ya" ³⁰ Sa qai cici yani ko Filipi, ka sa rogocia ni sa wilikia tiko nai vola i Aisea na parofita; a sa tukunia, "O sa kila na ka ko sa wilikia, se yali?" ³¹ A sa tukunia ko koya, "Au sa rawatia vakaevei, kevaka sa yali e dua me tuberi au?" A sa sureti Filipi me cabe yani kina qiqi-ni-turaga ka me rau dabe vata kinia. ³² O koya na tiki ni Vola Tabu sa wilikia ko koya, "Sa tuberi o koya me vaka na sipi me vakamatei; Ia me vaka lami sa galu e na mata i koya sa kotivia, Sa vakakinia o koya, ni sa yali ni vosa. ³³ Ni sa malumalumi tiko o koya, sa yali ni lewai vakadodonu: Ia ko cei ena tukunia na nonai tubutubu? Ni sa yadi tani e vuravura na nona bula." ³⁴ Sa qai vosatakia vei Filipi na matanivanua, ka tukunia, "Au tarogia mada, se sa vosa tiko vei cei na parofita, vei koya se dua voki?" ³⁵ Sa qai dalaga ko Filipi, ka sa vakatekivu ena ni Vola Tabu ko ya, a sa vunautakia na kosipeli baleti Jisu vua. ³⁶ Ia ni rau sa toso tiko ena sala, erau sa yacovia e dua na wai: a sa tukunia na matanivanua, "Raicia, sa tu koya na wai; a cava sa tarovia me'u kua kinia ni papitaisotaki?" ³⁷ A sa tukunia ko Filipi, "Kevaka lia ko sa vakadinatia ena yalomu taucoko, sa tara lia" A sa vosa o koya, ka tukunia, "Au sa vakadinata ni sa Luve ni Kalou ko Jisu Karisito." ³⁸ Sa qai tukunia o koya me tu vakadua mada na qiqi-ni-turaga: a rau sa qai sobu ruarua ki wai, ko Filipi kei na matanivanua, a sa papitaisotaki koya kinia ko Filipi. ³⁹ Ia ni rau sa cabe mai wai, sa yadi Filipi tani na Yalo ni Turaga, a sa yali ni raicia voki na matanivanua: ia sa qai e na nona sala o koya ka reki tiko. ⁴⁰ A sa kune ko Filipi mai Asoto: a sa qaivia na veikoro kecelia ka vunautakia nai tukutuku vinaka, a sa yaco sara ki Sisaria.