9 ¹ Ia ko Saula sa cavutia tiko na vosa vakacudrucudru kei na veivakamatei vei ira sa lotu vua na Turaga, ka sa qai vua na bete levu, ² ka sa tarogia vua nai vola ki na veivale ni lotu mai Tamasiko, kevaka e kunea o koya, se ra tagane se ra yalewa, me vesukia ka yadia ki Jerusalemi. ³ Ia ni sa qai voli, sa voleka lia ki Tamasiko; a sa cila vakavolivoliti koya vakasauri e dua na rarama mai lomalagi: ⁴ a sa bale sobu ki na qele, ka sa rogocia e dua na domo sa tukunia vua, I Saula, i Saula, ko sa vakacacani au ena vuku ni cava? ⁵ A sa tukunia o koya, "O cei ko iko, na Turaga" A sa tukunia ko koya, Oi au ko Jisu, o koya ko sa vakacana. ⁶ A sa sautaninini o koya ka kidacalatia, ka tukunia, "Kemunu na Turaga, a cava ko ni sa vinakatia me'u caka? A sa tukunia vei koya na Turaga, Cavu tu, ka qai ki na koro, ka na tukuni vei iko na ka e dodonu mo caka. ⁷ Ia ko ira na tamata era qai vata tiko, era sa vagagalu lia; era sa rogocia lia na domo, a ra sa yali ni raicia e dua. ⁸ A sa tucake mai na soso ko Saula; ia ni sa dolavia na matana, sa yali ni raicia e dua na ka: a ra sa tuberi koya, ka yadia ki Tamasiko. ⁹ A sa bogi tolu ka yali ni rai rawa, ka sa yali voki lia ni kana se somi. ¹⁰ A sa dua na tisaipeli mai Tamasiko, na yacana ko Ananaiasa; a sa tukunia vei koya na Turaga ena raivotu, "I Ananaiasa." A sa tukunia o koya, "Raicia, koi au, Turaga." ¹¹ A sa tukunia vei koya na Turaga, "Mo cavu tu ka qai ki na salatu, na yacana ko Dodonu, e na vale nei Jutasa, ka tarogia na kai Tarisu ko Saula na yacana; ia raicia, sa masu o koya: ¹² ka sa raicia e na raivotu e dua na tamata, ko Ananaiasa na yacana, sa curu mai ka tabakia na ligana me na rai voki." ¹³ Sa qai tukunia ko Ananaiasa, "Kemunu na Turaga, era sa lewe vuqa ka'u sa rogocia kinia nai tukutuku ni tamata koya, na levu ni ca sa kitakia vei ira na nomunu tamata yalosavasava mai Jerusalemi: ¹⁴ e ke voki lia sa vakarota ko ira na bete levu me vesuki ira kecelia sa masutia na yacamunu." ¹⁵ A sa kaya vei koya na Turaga, "Mo qai lia; o koya koya na tamata koya au sa digitakia, me yadia na yacaqu ki na matadra na veimatanitu tani, kei ira na tui eso, kei ira na luve i Isireli: ¹⁶ ni ka'u na vakatakilatakia vua na levu ni ka e na vosotia e na vuku ni yacaqu." ¹⁷ A sa qai ko Ananaiasa, ka curu ki na vale, a sa tabakia e na ligana, ka tukunia, "Na wekaqu Saula, na Turaga ko Jisu o koya ka rairai vei iko e na gaunisala ko a qai mai kinia, sa talai au mai mo rai rawa, ka mo vakasinaiti voki lia ena Yalo Tabu." ¹⁸ A sa lutu vakasauri mai na matana na ka e vaka lia na vari ni ika: a sa rai rawa sara o koya; a sa tucake, ka sa papitaisotaki. ¹⁹ Ia ni sa kana oti lia, sa kaukauwa mai. A sa tiko me vica voki na siga kei ira sa lotu mai Tamasiko. ²⁰ A sa vunautakia sara ena veivale ni lotu, ni sa Luve ni Kalou na Karisito. ²¹ A ra sa kurabuitakia kecelia ni ra sa rogocia, a ra sa tukunia, "Sai koya beka koya se yali ka vakacacani ira mai Jerusalemi era sa masuta na yaca koya, a sa qai voki lia mai koya me kitakia vakakina, me yadi ira na vesu tu vei ira na bete levu?" ²² A sa kaukauwa cake mai ko Saula, a sa vakataqayataki ira na Jiu era sa tiko mai Tamasiko, ni sa vakadinadinatakia ni sai Jisu na Karisito. ²³ A sa oti e vica na siga, sa ra qai bosea ko ira lia na Jiu me ra vakamatea: ²⁴ a sa kila ko Saula na nodra buki vere. A ra sa vakatawa na matamata kece lia ni koro e na siga kei na bogi me ra vakamatea. ²⁵ Sa ra qai yadi koya ko ira na nona tisaipeli e na bogi, ka tukucia sobu ena dua na sova ki daku ni bai. ²⁶ Ia ni sa yaco ki Jerusalemi ko Saula, sa via la'ki tiko vata kei ira sa lotu: a ra sa rerevakia kecelia, ka ra yali ni vakadinatakia ni sa lotu ko koya. ²⁷ Sa qai yadi koya ko Panapasa vei ira nai apositolo, ka sa tukunia vei ira na nona raicia Turaga ena gaunisala, o koya sa vosa voki lia vua, kei na nona vunau doudou mai Tamasiko ena yaca i Jisu. ²⁸ A sa tiko vata kei ira ka ra qai vata voli mai Jerusalemi: a sa vosatakia vakadoudou na yaca ni Turaga ko Jisu; ²⁹ ka veileti kei ira ka vulagi mai na veimatanitu tani; ia a ra sa tovolea tiko lia me ra vakamatei koya. ³⁰ Ia ni sa kila ko ira na veiwekani, era sa yadi koya ki Sisaria, a ra sa qai vakatala ki Tarisu. ³¹ Sa qai cegu nai soqosoqo lewe ni lotu mai Jutia taucoko kei Kalili kei Samaria, a ra sa vakatataki cake; ka sa dau nodrai valavala lia me ra rerevakia na Turaga, ka sa vakacegui ira na Yalo Tabu, ka ra sa tubu kinia me ra lewe vuqa. ³² Ia ni sa qaivia na veiyasana kecelia ko Pita, sa qai sobu voki lia vei ira na tamata lotu era sa tiko mai Lita. ³³ A sa kunea kinia e dua na tamata ko Inia na yacana, sa davo lia enai mocemoce ka yabaki walu, ni sa tauvi koya na mate sautaninini. ³⁴ A sa tukunia vua ko Pita, "Inia, sa vakabulai iko ko Jisu Karisito, tucake, ka vivirakia na nomunu i mocemoce." A sa tucake sara lia o koya. ³⁵ A ra sa raicia ko ira kecelia era sa tiko mai Lita kei Sarona, ia era sa saumaki lia mai vua na Turaga. ³⁶ A sa tiko mai Jopa e dua sa lotu ko Tapaica na yacana, a kenai balebale ko Tokasa: sa dau oga sara na yalewa koya ena cakacaka vinaka kei na cakacaka lia ni loloma sa kitakia tiko. ³⁷ A sa yaco e na gauna gona, sa tauvimate o koya, ka ciba: ia ni ra sa vakasilima oti, era sa vakotora e na dua lia nai taba loma ni vale icolo. ³⁸ Ia ni sa veivolekati lia ko Jopa kei Lita, ka ra sa rogocia ko ira sa lotu ni sa tiko kinia ko Pita, era sa talai e rua na tagane me rau masuti koya me qai mai vakatotolo vei ira. ³⁹ Sa qai qai vata mai kei rau ko Pita. Ia ni sa yaco mai, era sa yadi koya ki nai taba loma ni vale icolo: a ra sa tu kinia ko ira kecelia na yada, a ra sa tagi, ka vakaraitakia vua nai curucuru e so kei nai sulu voki lia ka cula ko Tokasa, ni se bula vata kei ira. ⁴⁰ A sa vakatalai ira kece yani ki tuba ko Pita, ka sa tekiduru lia, ka masu; ka sa vuki vaka ki na yago, ka tukunia "Tapaica, tucake" A sa dolavia na matana: ia ni sa raici Pita, sa qai duri cake o koya. ⁴¹ A sa dodoka vua na ligana, ka tuberi koya cake; ia ni sa kacivi ira na tamata lotu kei ira na yada, sa vakaraitakia ni sa bula.

⁴² A ka koya sa kilai mai Jopa taucoko; a ra sa lewe vuqa sa vakabautia na Turaga. ⁴³ A sa tiko ka siga vica voki mai Jopa vata kei Saimoni, a matai ni kuli-ni-manumanu.