7 ¹ Sa qai tukunia na bete levu "sa vaka ko ya na veika koya, se yali?" ² Sa qai tukunia ko Sitiveni, "oi kodou na mataveiwekani, kei na qase, dou rogocia mada: A Kalou vakaiukuuku sa rairai na gauna gona vua na noda qase ko Eparaama ena gauna a tiko kinia mai Mesopotemia, a tiko e muri mai Karana, ³ a sa tukunia vua, Dainia na vanua koya kei ira na wekamu, ka qai ki na vanua ka'u na vakatakila vei kemunu. ⁴ Sa qai dainia na vanua ko Kalitia, a sa laki tiko ki Arana: mai kea, ni sa mate ko tamana sa yadi koya na Kalou ki na vanua e sa tiko kinia ena gauna koya. ⁵ E a yali ni soli vua e dua na vanua me taukena, e yali mada lia ni rautia me butukia na yavana: a sa yalayala lia vua ni na solia vei koya e dua na vanua me taukena, kei ira voki lia na nona kawa, dina ni se yali dua na luvena. ⁶ A sa tukunia vaka koya na Kalou, ni ko ira na nona kawa era na tiko vakavulagi lia ena vanua e yali ni nodra; ka ra na vakabobulataki ka vakararawataki me va na drau na yabaki. ⁷ A sa tukunia na Kalou, 'Na matanitu era sa bobula kinia, au na lewa; ka oti, era na qai qai tani mai, ka qaravi au ena vanua koya.' ⁸ A sa solia vei Eparaama na veiyalayalati ni veicili; a sa tamai Aisake ko koya, a sa bogi walu sa qai cilivia ko koya; a sa tamai Jekope ko Aisake; a sa tamadra na qase e le tinikarua ko Jekope. ⁹ Ia ni ra sa vuvutaki Josefa ko ira na qase gona, era sa volitaka ki Ijipita: ia sa tiko vata lia kei koya na Kalou ¹⁰ ka sa vakabulai koya mai na nona rarawa kece lia, ka solia vua me vinaka ka vuku ena matai Fero na tui Ijipita; a sa lesi voki lia me kovana me lewai Ijipita kei ira kece lia na nona lewe ni vale. ¹¹ Sa qai yaco na dausiga kei na rarawa levu ena vanua taucoko ko Ijipita kei Kenani, a ra sa yali ni kune kakana ko ira na noda qase. ¹² Ia ni sa rogocia ko Jekope ni sa tu mai Ijipita na sila, sa qai talai ira na noda qase enai matai ni qaiqai. ¹³ Ia enai karua ni qaiqai, e a vakatakilai koya ko Josefa vei ira na tuakana; a sa vakatakilai voki lia na mataqaili i Josefa vei Fero ¹⁴ Sa qai talai ira na tuakana ko Josefa me lakovi ko Jekope na tamana kei ira kece voki lia na nona mataqali era lewe vitusagavulu ka lima. ¹⁵ A sa qai sobu ki Ijipita ko Jekope, a sa mate o koya kei ira na noda qase, ¹⁶ a ra sa yadi ki Sikemi, a ra sa bulutia ena i bulubulu ka volia ko Eparaama ena tiki ni siliva e so vei ira na luve i Emori mai Sikemi. ¹⁷ Ia ni sa voleka na gauna me vakayacori kinia na vosa ni yalayala, ka bubului kinia na Kalou vei Eparaama, era sa qai tubu ko ira na tamata me ra lewe levu mai Ijipita, ¹⁸ ka yacovia na gauna sa buli kinia e dua tani na tui, sa yali ni kilai Josefa. ¹⁹ Sa lawakitakia na wekada o koya koya, ka sa vakacacani ira na noda qase, me ra sa daini ira kinia na nodra gone ki tautuba, me ra kakua ni bula. ²⁰ A sa sucu ko Mosese ena gauna gona, a sa mata vinaka sara ena mata ni Kalou, ka sa susugi vula tolu ena vale nei tamana. ²¹ Ia ni sa dai ki tautuba ko koya, sa roqotia mai na luve i Fero yalewa, a sa susuga me luvena. ²² A sa vakavulici ko Mosese ena nodra vuku kecelia na kai Ijipita, a sa kaukauwa ena nona vosa kei na cakacaka. ²³ Ia ni sa yabaki vasagavulu, sa qai tubu ena lomana me via laki raici ira na wekana na luve i Isireli. ²⁴ Ia ni sa raicia e dua vei ira sa vakacacani, sa totakia, a sa cudruvaki koya lia sa vakararawataki, ka sa yavitia na kai Ijipita: ²⁵ ka sa nanumia ko koya era na kila na wekana ni sa ligana ena vakabulai ira kinia na Kalou: ka ra sa yali lia ni kila. ²⁶ Ia ena sa vulaci ni siga tarava, sa rairai ko koya ki na lewe rua erau sa veivala, a sa via vaka veivinakatitaki rau voki, a sa tukunia, 'Oi kodrau na turaga, drau sa veiwekani lia; a cava drau sa veivakacacani kodrau kinia?' ²⁷ Ia sa biligi koya tani ko koya sa vakacacana na wekana ka tukunia, 'Ko cei sa lesi iko mo turaga mo mai lewai kimamu' ²⁸ ko sa via vakamatei au beka, me vaka lia ko a vakamatea na kai Ijipita enanoa?' ²⁹ Sa qai dro ko Mosese ena vuku ni vosa gona, a sa laki vulagi tiko ena vanua ko Mitiani, a sa mani sucu kinia e le rua na luvena tagane. ³⁰ Ia ni sa oti e vasagavulu na yabaki, sa qai rairai vei koya mai veikau e dua na agilose ni Turaga, ena ulu-ni-vanua ko Saineai, e na yameyame ni buka ena dua na kau. ³¹ Ia ni sa raicia ko Mosese, sa kidacalatakia na ka sa raicia: ia ni sa torovia me vakaraicia, sa yaco mai vua na vosa ni Turaga, ³² Oi au na nodra Kalou na nomu qase, na Kalou i Eparaama, kei na Kalou i Aisake, kei na Kalou i Jekope. A sa sautaninini ko Mosese ka sa rerevakia ni vakaraicia. ³³ Sa qai tukunia vei koya na Turaga, 'Luvatia na nomui vava mai na yavamu: ni sa qele tabu na tikina ko sa tu kinia. ³⁴ Au a raicia dina sara na nodra rarawa na noqu tamata era sa tiko mai Ijipita, ia ka'u a rogocia na nodra vutugu; ia kau sa lako sobu mai me'u vakabulai ira; ia koya, mo ia, au na talai iko ki Ijipita.' ³⁵ Ko Mosese koya, o koya era sa cata, ka tukunia 'Ko cei sa lesi iko mo turaga ka mo lewa?' o koya lia koya ka tala na Kalou me turaga kai vakabula e na ligana na agilose sa rairai mai vua ena kau. ³⁶ Ko Mosese sa yadi ira tani mai Ijipita ni sa kitakia oti eso na ka e veivakidacalataki kei nai vakatakilakila kei na waitui damudamu kei na veikau, ka yabaki vasagavulu. ³⁷ Ko Mosese koya sai koya ka tukunia vei ira na luve i Isireli, 'Ko Jiova na nomudou Kalou, ena vakatubura mai vei ira na wekamunu, e dua na parofita me vakataki au.' ³⁸ Ko koya koya, sa tiko kei ira nai soqosoqo lewe ni soro ena vei kau, kei na agilose sa vosa vua e na ulu-ni-vanua ko Saineai, kei ira na noda qase: a sa rawatia ko koya na vunau bula me solia vei ita: ³⁹ era sa bese ni talairawarawa vua ko ira na noda qase, a ra sa biligi koya tani vei ira a sa suka voki na yalodra ki Ijipita, ⁴⁰ a ra sa tukunia vei Eroni, 'Caka eso na noda kalou me ra liutaki ita: ko Mosese koya, o koya ka yadi keda mai na vanua ko Ijipita, eda sa yali ni kila se cava beka sa yaco vua.' ⁴¹ A ra sa caka e dua na luve ni pulumokau ena gauna gona, a ra sa vakacabora lia nai soro ki na matakau, a ra sa rekitakia na cakacaka ni ligadra. ⁴² Sa qai vuki tani na Kalou, ka daini ira tu me ra qaravia na veikalokalo ni lomalagi; me vaka ka a volai ena nodrai vola na parofita, 'Oi kodou na mataqali nei Isireli, dou a vakacabora vei au na manumanu sa vakamatei, kei nai madrali, e na veikau ka yabaki vasagavulu, se yali? ⁴³ Io, dou a colatia na vale nei Moloke, kei na kalokalo ni nomudou kalou ko Remifani, a matakau dou a caka mo dou soro kinia: Ia ka'u na yadi kodou yani me sivi ko Papiloni.' ⁴⁴ Sa tu lia vei ira na noda qase e na veikau na vale ni Kalou sa tu kinia na vunau, me vaka sa vosa kinia o koya, ni sa tukunia vei Mosese, me caka me vaka lia na kenai vakatakarakara sa raicia: ⁴⁵ o koya voki lia era sa tauria emuri na noda qase, era sa qai yadia mai ko ira vei Josua ki na nodra vanua na veimatanitu, ko ira sa vakaseva tani na Kalou e na matadra na noda qase, ka yacovia na gauna i Tevita; ⁴⁶ o koya sa kune loloma mai vua na Kalou , a sa kerea lia me nonai tavi e dua na vale me nei koya na Kalou i Jekope. ⁴⁷ Ia ko Solomoni lia sa tara na vale me nona. ⁴⁸ Ia sa yali ni tiko o koya sa cecere sara ena vale sa caka e na liga; me vaka na vosa ni parofita, ⁴⁹ 'A noqui tikotiko vakaturaga ko lomalagi, Kei nai tutu-ni-yavaqu ko vuravura: A vale cava dou sa tara me noqu? sa taroga ko Jiova: Se na tikina cava me na noqui vakavakacegu? ⁵⁰ Sa yali li ni caka na kecelia gona na ligaqu?' ⁵¹ Oi kodou sa yalokaukauwa, ka yali ni cili na yalomudou kei na daligamudou, dou sa dauvorata tiko lia na Yalo Tabu; ia koi kodou dou sa kitakia me vakataki ira na nomudou qase. ⁵² Ko cei vei ira na parofita sa ra yali ni vakacacana ko ira na nomudou qase? a ra sa ena vakamatei ira era a tukunia ena gauna gona ni na qai mai o koya na Yalododonu; o koya dou sa qai solia yani ka vakamatea: ⁵³ ia sa soli vei kodou na vunau ni sa tukunia eso na agilose, ia dou a yali lia ni vakabautia. ⁵⁴ Ia ni ra sa rogocia na mataveilewai na veika koya, sa laucoka na yalodra, a ra sa vakasequruquru bati lia vei Sitiveni. ⁵⁵ Ia ko koya ni sa vakasinaiti tu ena Yalo Tabu, sa rai matua ki lomalagi, a sa raicia nai ukuuku ni Kalou, kei Jisu ni sa tucake tu ena liga i matau ni Kalou, a sa tukunia, ⁵⁶ "Raicia, au sa qai kunea sa wase rua na lomalagi, ka sa wavu tu na Luve ni tamata e na liga i matau ni Kalou." ⁵⁷ Era sa qai qoqolou e na domo levu, ka tabonaka na qara ni daligadra, ka cici vakaukauwa vua ni ra sa lomavata, ⁵⁸ a ra sa dainia ki nai bili ni koro, ka vakavirikia ena vatu; ia ko ira era sa beitakia, era sa kotora sobu na nodrai sulu ki na yavana e dua na cauravou, a yacana ko Saula. ⁵⁹ A ra sa vakaviriki Sitiveni e na vatu, ni sa masu tiko lia, ka tukunia "Kemunu na Turaga Jisu, tauria na yaloqu." ⁶⁰ A sa tekiduru sobu ko koya a sa kaci e na domo levu, Kemunu na Turaga, kakua ni cudruvi ira enai valavala ca koya. Ia ni sa vosa oti vakoya, sa qai moce.