4 ¹ Ia ni rau sa vosa tiko vei ira na tamata, sa qai mai vei rau ko ira lia na bete kei na turaga ni valenisoro, kei ra nai tokani i Setoki; ² ni ra sa cudru ni rau sa vakavulici ira na tamata, ka vunautakia na tu cake voki mai na mate ena vuku i Jisu. ³ A ra sa tauri rau ka daini rau ena vale ni veivesu ena raiyavi gona ka yacovia na vulaci voki ni siga taravia. ⁴ Ia ka lewe vuqa era sa rogocia na vunau, era sa vakabautia; ia na kedrai wiliwili na tagane sa le lima beka na udolu. ⁵ Ia ni sa vulaci, era sa soqoni vata mai Jerusalemi ko ira na nodra turaga, kei ira na qase, kei ira na vu-ni-vola, ⁶ kei Anasa na bete levu, kei Kaiafa kei Joni, kei Alekisada, ki ira kece lia na mataqali ni bete levu. ⁷ Ia ni ra sa vakaturi rau ena kedra maliwa, era sa tarogia, "A kaukauwa cava se na yaca i cei drau sa caka kinia na ka koya?" ⁸ Sa qai vakasinaiti ena ko Pita ena Yalo Tabu, a sa tukunia vei ira, Oi konu na nodra turaga na tamata, kei na nodra qase na Isireli, ⁹ kevaka keirau sa tarogi ena siga koya ena cakacaka vinaka vua na tamata lokiloki, se cava sa qai bula kinia; ¹⁰ mo nu kila kece lia kei ira kece lia na Isireli ni sa yaca i Jisu Karisito na Kai Nasareci, o koya konu a vakotia ki na kauveilatai, o koya sa vakatura cake voki na Kalou mai na mate, io, ena vukuna lia sa tu kinia koya o koya koya ena matamunu ka sa bula vinaka. ¹¹ O koya na vatu konu a cata sara koi konu na matai ni vale, ko ya sa yacovia me kenai vakadei lia ni yavu enai tutu ni vale. ¹² A sa yali na bula ena vukuna e dua tani: sa yali sara e dua voki na yaca e ruku i lomalagi sa soli kivei ira na tamata, me da bula rawa kinia. ¹³ Ia ni ra sa raicia na nodrau doudou ko Pita kei Joni, ni ra sa kila voki lia erau sa yali so ni vuku, se tamata vuli, e ra sa kurabui kinia, a ra sa qai vakasami rau, ni ratou a dautiko vata kei Jisu. ¹⁴ Ia ni ra sa raicia na tamata ka vakabulai, ni sa tu vata kei rau, e ra sa yali ni vakatitiqatakia rawa. ¹⁵ Ia ni ra sa vakatalai rau me rau qai tani ena vale ni bose, era sa qai bose lia vakai ira, ¹⁶ ka tukunia, "A cava me da kitakia ve rau na tamata koya? ni ra kila ko ira kece lia sa tiko e Jerusalemi ni sa dua na cakacka mana rogo era sa caka; Ia a eda sa yali ni vakatitiqatakia rawa. ¹⁷ Ia de tukuni vakalevu vei ira na tamata, me da tukunia lia, me rau cudruvi sara kevaka e rau vakavuvulitakia voki vua e dua na tamata ena yaca koya." ¹⁸ A ra sa kacivi rau ka vakarota vei rau me rau kakua sara lia ni vosa se vakatavuvulitakia na yaca i Jisu. ¹⁹ Sa qai vosa ko Pita kei Joni, a rau sa tukunia vei ira, "Mo nu lewa lia se sa dodonu se yali ena mata ni Kalou me keirau vakarorogo vei konu ka kua vua na Kalou: ²⁰ ni sa dredre sara lia vei keirau me keirau kua ni tukunia na veika keirau a raicia ka rogocia." ²¹ Ia ni ra sa yali ni kunea e dua na ke me rau cudruvi kinia, era sa vosa vakacudrucudru voki vei rau, a ra sa qai serekia me rau qai, ena vukudra lia na tamata ni ra sa vakarokorokotakia na Kalou ko ira kece lia ena vuku ni ka sa qai caka. ²² Ni sa vasagavulu vakacaca na nona yabaki, o koya na tamata sa caka vua na cakacaka mana koya ka bula kinia. ²³ Ia ni rau sa sereki, erau sa tukunia vei ira na nodraui tokani na ka kece lia era sa vosatakia vei rau ko ira na bete levu kei ira na qase. ²⁴ Ia ni ra sa rogocia, era sa lomavata ka tabalakia icolo na domodra vua na Kalou, "konu a bulia na lomalagi kei vuravura, kei na waitui kei na ka kece lia sa tu kinia: ²⁵ ena gusui Tevita na nomunu tamata ko nu a tukunia, sa dau cudrutakia na veimatanitu ena vuku ni cava, ka sa vakananumia na ka wale ko ira na lewe ni veivanua?" ²⁶ Era sa tuvai valu na tui kei vuravura, A ra sa soqoni vata ko ira na turaga me ra veivala kei Jiova kei na nona Karisito. ²⁷ Ni sa dina era sa soqoni vata lia ena koro koya me ra veivala kaya na Luvemunu savasava ko Jisu, o koya ko nu a lumutia, koi rau o Eroti kei Ponitio Pailato, kei ira na veimatanitu, kei ira na Isireli ²⁸ me ra kitakia kece lia na ka konu a lesia e liu me caka, me vaka na nomunu kaukauwa kei na nomunu i naki. ²⁹ Ia koya, konu na Turaga, mo nu raicia na nodra vosa vakacudrucudru, ka solia kivei ira na nomunu talatala me ra doudou vakalevu ni ra tukunia na nomunu vosa, ³⁰ ni konu sa dodoka tiko na ligamunu me ia na veivakabulai, me caka voki lia nai vakatakilakila eso kei na ka e veivakurabuitaki, ena yaca ni Luvemunu yalosavasava ko Jisu. ³¹ Ia ni ra sa masu oti, sa vakayavalatia na vale era soqoni vata kinia: a ra sa dui vakasinaiti kece lia ena Yalo Tabu, a ra sa doudou kinia ni ra sa tukunia na vosa ni Kalou. ^{32 33} Ia ko ira na lewevuqa era sa vakabautia, era sa lomavata ka yalovata; a sa yali e dua e tukunia me nona duadua lia na ka sa tu vua; a ra sa taukena vata li na nonai yau yadua. A sa levu na nodra kaukauwa nai apositolo, ni ra sa tukunia ni sa tucake voki mai na mate na Turaga ko Jisu: a sa vinakatia vakalevu ko ira kece lia. ³⁴ Ni sa yali e dua vei ira sa dravudravua; ko ira kece lia sa taukena na vanua se na vei vale, era sa volitakia, a ra sa yadia nai voli ni ka era sa volitakia, ³⁵ a ra sa taucia kinia ki yavadra nai apositolo: a sa votai vei ira kece lia me vaka na nodra dui dravudravua. ³⁶ Ko Josese voki lia, o koya era sa vakatoka ko ira nai apositolo me Panapasa, (a kenai balebale, A gone ni vakacevu) a luvei Livai, a kai Kipiro, ³⁷ o koya sa taukena e dua na tiki-ni-vanua, sa volitakia, ka yadia na kenai voli, ka taucia ki na yavadra nai apositolo.