5 ¹ A sa dua na tamata ko Ananaiasa na yacana, kei Savaira na watina, sa volitakia e dua na vanua, ² a sa vunia eso ka taucia kina yavadra nai apositolo. ³ A sa tukunia ko Pita, "Ananaiasa e vakaevei ni sa vakasinaitia na yalomunu ko Setani mo lasutakia kinia vua na Yalo Tabu, mo vunia eso nai voli ni vanua? ⁴ Ni sa tu lia eliu, sa yali ni nomunu lia? Ia ni sa volitakia oti, ko sa yali ni veitalia kinia? "E vakaevei ni ko sa vakananumia kinia na ka koya ena lomamunu? Ko sa yali ni lasu vei ira n tamata ko sa lasu lia vua na Kalou." ⁵ Ia ni sa rogocia na vosa koya ko Ananaiasa, sa bale sobu, ka ciba. A ra sa rere vakalevu kinia ko ira kece lia sa rogocia na ka koya. ⁶ A sa tucake ko iratou na cauravou, ka solegi koya, ka colatia ki tautuba, ka bulutia. ^{7 8} Ia ni sa oti e tolu na aua, sa qai curu mai na watina, a sa yali ni kila na ka sa caka. ⁸ A kaya vua ko Pita, Tukunia mai vei au se drau sa volitakia na vanua enai lavo vaka ko ya, se yali? A sa tukunia ko koya, "Io e vaka lia ko ya" ⁹ Sa qai tukunia vua ko Pita, E vakaevei ni drau sa lomavata lia mo drau vakatovolea vakaca na na Yalo ni Turaga? raicia, na yavadratou na tamata ratou a bulutia na watimu sa tu koya ena darava, eratou na colati iko voki lia ki tautuba. ¹⁰ Sa qai bale sobu sara ki yavana ko koya, ka ciba: a ratou sa curu mai na cauravou, ka kunea ni sa ciba ko koya, a ratou sa colatia yani, ka bulutia vata lia kei na watina. ¹¹ A ra sa rerevakia vakalevu kinia ko ira kece nai soqosoqo lewe ni lotu, kei ira vakaadualia era sa rogocia na veika koya. ¹² Sa vuqa nai vakatakilakila kei na ka e veivakurabuitaki a vakayacori vei ira na tamata mai na ligadra lia nai apositolo: a ra tiko lomata kece lia e na varada nei Solomoni; ¹³ a yali dua vei ira sa vosa doudou me to vata kei ira: a sa vakarokorokotakia ko ira na tamata: ¹⁴ A sa lewe vuqa voki na turaga kei na marama era vakabautia na Turaga ka vakaikuritaki lia na kedra levu, ¹⁵ a ra sa yadi ira kinia na tauvi-mate ki na vei gaunisala, a ra sa vakadavora enai mocemoce lelevu kei nai mocemoce lalai, me vakaruruga eso vei ira na yaloyalo i Pita ni sa qa yani kinia. ¹⁶ Era sa lewe vuqa voki lia sa qai mai na veikoro sa vakavolivoliti Jerusalemi, a ra sa yadia mai na tamata eso sa tauvimate, kei ira sa vakararawataki ira na yalo velavela eso: a ra sa vakabulai vakaadua lia. ¹⁷ Sa qai tu cake na bete levu, kei ira kece lia era sa dautiko vata kaya, (ko ira lia nai tokani i Setoki,) ¹⁸ a ra sa sinai lia ena cudru, a ra sa tauri iratou nai apositolo, ka daini ratou ki na vale ni veivesu. ¹⁹ Ia ni sa qai bogi sa dolavia na darava ni vale ni veivesu e dua na agilose ni Turaga, ka yadi ratou mai kinia ka tukunia ²⁰ "Dou qai, ka laki tu e na vale ni soro, ka tukunia vei ira na tamata na vosa kece lia ni Bula koya. ²¹ Ia ni ratou sa rogocia, eratou sa curu ki na vale ni soro, ni sa vulaci caca ka vakatavuvuli lia. Ia o koya na bete levu kei ira kece lia era sa dau tiko vata, ra soqoni vata na mataveilewai, kei ira voki lia na na nodra qase na luvei Isireli, a ra sa tala eso ki na vale ni veivesu me ratou yadi mai. ²² A ratou sa yaco kinia na ovisa, ka raicia ni sa yali dua e tu kinia , a ratou sa lesu voki ka tukuna, ²³ ka tukunia "Keitou sa raicia na vale ni veivesu ni sa sogo kaukauwa tu vata kei ira na kenai vakatawa ni ra tucake tu e mata ni darava, ia ni keitou sa dolavia na darava, sa yani ni dua e tu kinia. ²⁴ Ia ni ra sa rogocia na veika ka koyana turaga ni vale ni soro kei ira voki lia na bete turaga, erasa kidroa kinia se na tubu beka me vakaevei na ka koya. ²⁵ Sa qai qai mai edua, ka tukunia vei ira, Raicia, ko iratou na tamata dou a dainia ki na vale ni veivesu eratou sa tiko ena vale ni soro, ka vakavulici ira na tamata. ²⁶ Sa qai qai na turaga kei iratou na ovisa, ka yadi ratou mai, ia eratou a yali ni caka vakaukauwa, ka ni ratou rerevakia de ratou na vakaviriki ena vatu mai vei ira lia na tamata ra tu kinia. ²⁷ Ia ni ratou sa yadi ratou mai, eratou sa vkatura ena matadra na mataveilewai: a sa tarogi iratou na bete levu, ²⁸ ka tukunia, Keitou a yali beka ni vakarotia matua vei kodou mo dou kakua ni vakatavuvuli ena yaca koya, oi? ka raicia, dou sa vakasinati Jerusalemi ena nomudoui vakavuvuli, dou sa nakitia me keitou tarogi voki lia ena dra ni tamata koya. ²⁹ Sa qai vosa ko Pita kei ratou nai apositolo, ka tukunia, Sa dodonu lia me keitou talairawarawa vua na Kalou, yali ni vei ira na tamata. ³⁰ Na Kalou nodra na noda qase sa vakaturi Jisu cake voki mai, o koya dou a vakamatea ka vakarubecia e na dua na kau. ³¹ O koya sa vakaceceretakia na Kalou e na ligana i matau me Turaga kai Vakabula, me solia kinia na veivutuni ki vei ira na Isireli, kei na vakabokoci lia ni valavala ca. ³² Keitou sa yaco voki lia mei vakadinadina ena veika koya: ka sa vaka kinia na Yalo Tabu, o koya sa solia na Kalou vei ira sa talairawarawa vua. ³³ Ia ni ra sa rogocia, era sa cudru vakalevu, a ra sa bose mera vakamatei iratou. ³⁴ Sa qai tu cake lia e dua ena kedra maliwa na mataveilewai, a Farisi, ko Kamelieli na yacana, a vu-ni-vuau, sa rogorogo vinaka vei ira na tamata kecelia, a sa tukunia me yadi vakalailai lia ki tuba ko iratou nai apositolo; ³⁵ ka sa qai tukunia vei ira, "Oi kodou na tamata na Isireli, dou lewai kodou vinaka ena vuku ni ka dou sa nanumia mo dou kitakia vei iratou na tamata koya. ³⁶ Ni sa tubu cake ena gauna gona ko Cuta, a sa dautukuni koya ka dau nanumia ni sa o koya lia, a ra lewe va na drau na tamata era muri koya. E a qai vakamatei kei ira kece lia era dau talairawarawa vua era sa vakasesei, ka oti yani. ³⁷ Sa oti koya sa qai tubu cake ko Jutasa na kai Kalili ena gauna sa volai kinia na tamata, a ra sa lewe vuqa sa yadia vakatani ko koya me ra muri koya: sa rusa voki lia o koya koya: kei ira vakaadua lia era sa talairawarawa vua, era sa vakasesei. ³⁸ Ia koya, au sa tukunia vei kodou, Dou kakua ni torovi iratou ka daini ratou lia: ia kevaka sa i naki se cakacaka vakatamata koya ena vakarusai lia: ³⁹ ia kevaka e sa mai vua na Kalou, dou na yali sara lia ni vakarusa rawa; dou na laurai voki lia ni dou veivala kei na Kalou." ⁴⁰ A ra sa qai yalovata kaya: ia ni ra sa kacivi iratou nai apositolo, ka vakanakuitataki iratou, ka vakatulewatakia matua vei iratou me ratou kakua sara ni vosa ena yaca i Jisu, a ra sa qai sereki iratou me ratou qai. ⁴¹ Ia ni ratou sa qai tani e matadra na mataveilewai, eratou sa reki ni ratou sa yaga me ratou vakacacani ena vuku ni yacana. ⁴² Ia ena veisiga kecelia ena vale ni soro, kei na veivale kecelia, era sa yali ni mudu ni vakatavuvulitakia ka vunautakia ni sai Jisu na Karisito.